Search form

DIPESALEME 19

Modimo o itshenolela batho ka mesebetsi ya wona le ka lentswe la wona.

Ho monga baphokodi. Pesaleme ya Davida.

1Mahodimo a bolela kganya ya modimo, mme sebaka sa lehodimo se bonahatsa mosebetsi wa diatla tsa wona. 2Letsatsi le ho pakela letsatsi le leng, bosiu bo ho tsebisa bosiu bo bong. 3Hase polelo, hase mantswe ao modumo wa wona o sa utlwahaleng. 4Tumo ya tsona e hasane lefatsheng lohle, dipolelo tsa tsona di ile pheletsong ya lefatshe. O hlometse letsatsi ntlo ya lona teng; 5le tloha jwaloka monyadi ha a tloha tlung ya hae, le thaba jwaloka mohale ya mathelang lephallong; 6le tloha pheletsong ya mahodimo, mme phallong ya lona le fella pheletsong e nngwe: ha ho letho le ipatelang lebatama la lona.

7Molao wa Jehova o lokile, o kgatholosa moya; bopaki ba Jehova bo a tshepeha, bo hlalefisa sethoto. 8Ditemoso tsa Jehova di lokile, di thabisa pelo; ditaelo tsa Jehova di hlwekile, di edisa mahlo. 9Tshebeletso ya Jehova e hlwekile, e hloleha kamehla; dikahlolo tsa Jehova ke nnete, di lokile kaofela; 10di fetisa kgauta ka theko, le kgauta e ngata e tshekehileng, di fetisa le dinotshi ka monate, le tse rothang kgekgeng ya tsona. 11Mohlanka wa hao o ediswa ke tsona; ho bolokweng ha tsona ho na le moputso o moholo. 12Ke mang ya ka lemohang diphoso tsa hae kaofela? O ntshwarele tse nkgakileng! 13Hape, o boloke mohlanka wa hao ho baikakasi, ba se ke ba rena hodima ka; ke moo ke tla hloka ho nyatseha, mme etlaba ke sesefile ditlolo tse kgolo. 14O amohele mantswe a molomo wa ka, o kgahliswe ke ho nahana ha pelo ya ka, wena, Jehova, lefika la ka le monamoledi wa ka!

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index