Search form

DIPESALEME 25

Thapelo e qelang tshireletso le tiso.

Pesaleme ya Davida.

1Oho Jehova, ke phahamisetsa moya wa ka ho wena. 2Modimo wa ka, ke beile tshepo ya ka ho wena; oho, ke se ke ka swaba! bao e leng dira ho nna ba tle ba se ke ba thaba ka nna! 3E mong le e mong ya itshepetseng wena, a ke ke a swaba; tshwabo ke ya ba iketsetsang bolotsana ka boomo.

4Jehova, mpontshe ditsela tsa hao, o nthute mekgwa ya hao. 5O ntsamaise nneteng ya hao, o nthute, hobane ke wena Modimo wa poloko ya ka; kamehla ke ntse ke bea tshepo ya ka ho wena.

6Jehova, o elellwe mehauhelo ya hao le lereko la hao, hobane ke tsa kamehla! 7O lebale dibe tsa botjha ba ka le ditlolo tsa ka! 8O nkelellwe ka lereko la hao ka baka la mohau wa hao, Jehova!

9Jehova o molemo, o lokile; ke ka baka leo a bontshang baetsadibe tsela, a tsamaisang ho lokeng ba bonolo pelong, a ba rutang tsela ya hae.

10Ditsela tsa Jehova kaofela ke mohau le nnete ho bohle ba bolokang selekane sa hae le ditaelo tsa hae. 11Ka baka la lebitso la hao, Jehova, o ntshwarele bokgopo ba ka, leha bo le boholo.

12Na motho ke ofe ya tshabang Jehova? Jehova o tla mmontsha tsela eo a tshwanetseng ho ikgethela yona. 13Moya wa hae o tla iketla lehlohonolong, ditloholo tsa hae di tla rua lefatshe.

14Lekunutu la Jehova ke la ba mo tshabang, o ba ruta selekane sa hae. 15Mahlo a ka a tadima Jehova kamehla, hobane o tla tshwasolla maoto a ka lerabeng.

16Jehova, o retelehele ho nna, o nkgauhele, hobane ke nnotshi, ke madimabe! 17Matswalo a pelo ya ka a eketsehile; o ntokolle tsietsing tsa ka.

18Tadima bomadimabe le bohloko ba ka, o ntshwarele dibe tsa ka tsohle. 19O tadime bongata ba dira tsa ka, le hloyo e mpe eo ba ntlhoileng ka yona.

20O boloke moya wa ka, o ntopolle; ke se ke ka swaba, hobane ke beile tshepo ya ka ho wena. 21Bokgabane le ho loka a di ke di ntiise, hobane ke o tshepile.

22Oho Modimo, o ntshe Iseraele matswalong a hae kaofela.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index