Search form

DIPESALEME 31

Thapelo ya motho ya itshepetseng Modimo, bakeng sa bahlorisi ba lakatsang ho mmolaya.

Ho monga baphokodi. Pesaleme ya Davida.

1Jehova, ke balehela ho wena; ke se ke ka swabiswa le ka mohla o le mong! O mpholose ka ho loka ha hao! O sekehele tsebe tsa hao ho nna! 2Phakisa o mpoloke! O be lefika ho nna, le setshabelo, le qhobosheane ya poloko! 3Hobane o lefika la ka le qhobosheane ya ka; mme ka baka la lebitso la hao, o tla mpontsha tsela o ntsamaise ho yona; 4o tla nkgula lerabeng leo ba ntjhehileng ka lona sephiring tlasa maoto a ka, hobane o tshireletso ya ka!

5Ke laeletsa moya wa ka matsohong a hao; o ntopolotse, Jehova, Modimo wa nnete! 6Ke hloile barapedi ba medimo ya lefeela; empa ke beile tshepo ya ka ho Jehova! 7Ke tla ithabisa, ke ithabisetse mohaung wa hao; ka baka la hobane o lemohile bomadimabe ba ka, o qamakisitse matswalo a moya wa ka, 8mme ha o a ka wa nneela matsohong a bao e leng dira ho nna, empa wa phetlela maoto a ka sebaka se phatlaletseng.

9Jehova, nkutlwele bohloko, hobane ke matswalong! hobane hlomoho e qetile mahlo a ka, le moya wa ka, le mala a ka. 10Hobane bophelo ba ka bo omella ke mahlomola, le dilemo tsa ka ke masisapelo. Matla a ka a robehile ke molato wa ka; masapo a ka a nyebeletse. 11Ka baka la bohle bao e leng dira ho nna, ke fetohile ntho e dihlong tse kgolo ho ba ahisaneng le nna, le setshosa ho metswalle ya ka; ba mponang lepatlelong ba mpalehela; 12ho batho ke lebalehile jwaloka mofu ya seng a le siyo mehopolong, ke jwaloka moeta o lahlwang; 13hobane ke utlwa ditshebo tse wewetswang ke bongata; tshoho e ntlela kahohle, ha ba botsana hammoho bakeng sa ka, ba rera ho tlosa bophelo ba ka.

14Empa ke itshepela wena, Jehova; ke re: O Modimo wa ka! 15Matsatsi a ka a letsohong la hao, o nkgule letsohong la bao e leng dira ho nna, le ho ba mphallelang! 16O kgantshetse sefahleho sa hao hodima mohlanka wa hao! O mpoloke ka baka la mehauhelo ya hao! O mpoloke ka baka la mehauhelo ya hao! 17Jehova, ke se ke ka swaba, hobane ke bitsa ho wena! Ho ke ho swabe bakgopo, ba be ba kgutse nqalong ya bafu. 18O mumufatse melomo ya leshano, e bolelang dipolelo tsa bohata ka boikgohomoso le ka nyefolo hodima ya lokileng!

19Le leholo hakakang lereko leo o le boloketseng ba o tshabang, leo o le hlahisetsang ba itshepetseng wena pontsheng ya bana ba batho; 20o ba sirela moriting wa sefahleho sa hao hole le merero ya batho; o ba boloka tenteng ya hao hole le ditshebo tsa leleme.

21Ho roriswe Jehova, hobane o bonahaditse molemo wa hae ho nna, ka ho mpea motseng wa diqhobosheane. 22Ka na ka re tsietsing ya ka: Ke tlositswe pela mahlo a hao. Empa o utlwile lentswe la thapedisiso ya ka, ha ke ne ke bitsa ho wena.

23Ratang Jehova, lona bakgethwa bohle ba hae! Jehova o boloka batshepehi, o otla baikgohomosi ka ho fetisisa. 24Betang dipelo, le tiye, lona kaofela ba itshepelang Jehova!

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index