Search form

DIPESALEME 49

Maruo a lefatshe ke lefeela.

Ho monga baphokodi. Pesaleme ya bara ba Kore.

1Mamelang ditaba tsena, lona ditjhaba kaofela; le sekehe ditsebe, lona batho bohle ba ahileng lefatsheng: 2bao e leng batho feela, le lona marena, le ya ruileng le ya fumanehileng, bohle hammoho! 3Molomo wa ka o tla bolela bohlale, dinahano tsa pelo ya ka di rute kutlwisiso. 4Ke sekehela polelo tsa hlalefo ditsebe tsa ka, ke lotha selotho sa ka, ke ntse ke letsa harepa.

5Nka tshaba eng ka letsatsi le lebe, ha ke teetswe hare ke bolotsana jwa ba ntjhehelang, 6ba itshepetseng menono ya bona, ba ithorisang ka bongata ba maruo a bona? 7Ha ho le a mong wa bona ya ka tsebang ho lopolla ngwanabo, leha e le ho ntshetsa Modimo topollo bakeng sa hae. 8Topollo ya bophelo ba motho e fetisa matla a hae, e tla nne e mo hlole kamehla. 9Ha ho kamoo motho a ka lopollwang kateng hore a nne a phele ka ho sa feleng, a se ke a bona lebitla. 10Tjhe, o tla le bona. Ba bohlale ba ya shwa; lewatla le sethoto le bona ba ya shwa, ba tlohelle basele maruo a bona. 11Ba lekanya hore matlo a bona a tla ba teng kamehla, le meaho ya bona e dule ho isa ditloholong le ditloholwaneng; e leng bao mabitso a bona a hlomphuwang lefatsheng. 12Empa motho, hara bokgabane ba hae, ha a hlole kamehla; o tshwana le diphoofolo tse hlajwang.

13Ke yona tsela ya ba itshepang, le ya ba ba latelang ke ho kgolwa ke dipolelo tsa bona. (Sela.) 14Ba soteletswa jwaloka dinku nqalong ya bafu, moo lefu e tla ba modisa wa bona; ka hosasa, ba lokileng ba tla bewa marena a bona; bokgabane ba bona bo ya fela, nqalo ya bafu ke moo ba tla aha teng. 15Empa Modimo o tla hlwibila moya wa ka matleng a nqalo ya bafu, hobane o tla nkamohela. (Sela.)

16O se ke wa tshoha leha motho a atisa maruo a hae, mme matlotlo a ntlo ya hae a eketseha! 17Hobane mohla a shwang, a ke ke a nka letho, mme kganya ya hae e ke ke ya theohela lebitleng le yena. 18Leha a ka ithoka a sa phela, leha batho ba ka o rorisa ka baka la menono ya hao, 19e ka kgona o ye ho moloko wa bontatao, ba ke keng ba boela ba bona lesedi. 20Motho, bokgabaneng ba hae, ya mpang a se na kutlwisiso, o tshwana le diphoofolo tse hlajwang.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index