Search form

DIPESALEME 59

Thapelo ya motho ya se nang molato ha a nanarelwa.

Ho monga baphokodi. Ka pina ya Aletashethe. Sefela sa Davida, sa mohla Saule a rometseng ho lebela ntlo, a tle a bolawe.

1Ntwele ho bao e leng dira ho nna, Modimo wa ka! O mpee qhobosheaneng hole le ba ntsohelang matla! 2O nnamolele ho banna ba etsang hampe; o mpoloke ho banna ba madi! 3Bona, ba tjhehetse bophelo ba ka maraba, Jehova; banna ba bohale ba nkopanetse, ke se na molato, leha e le sebe. 4Leha ke se na molato, ba titima ba ntlhomeletse. Fadimeha, o tle ho nna, o tadime! 5Wena, Jehova, Modimo wa makgotla, Modimo wa Iseraele, tsoha ho laya ditjhaba tsohle! O se ke wa hauhela le a mong wa baeki le ba bolotsana bao! (Sela.)

6Ba kgutla mantsiboya, ba bohola jwaloka dintja, ba ntse ba potoloha motse. 7Bona, ka melomo ya bona ba phutsalatsa mahlapa a bona, marumo a melomong ya bona, ba re: Na ho utlwa mang na? 8Empa wena, Jehova, o a ba tsheha, o soma ka ditjhaba kaofela. 9Wena, matla a ka, ke tadimile ho wena, hobane Modimo ke qhobosheane ya ka.

10Modimo wa ka o nthakile ka mohau wa wona, Modimo o thabisa mahlo a ka ka tshenyeho ya bao e leng dira ho naa. 11O se ke wa ba bolaya, esere mohlomong setjhaba sa ka sa lebala! ... O ba qhalanye ka matla a hao, o ba dihele, wena, Morena, thebe ya rona! 12Ka mantswe wohle a melomo ya bona ho tswa dibe. A ba ke ba tshwaswe sefing sa boikgohomoso ba bona! Ba bolela mahlapa le mashano feela. 13Senya, o ba senye kgalefong ya hao, hore ba se hlole ba eba teng! Ho tle ho tsejwe le dipheletsong tsa lefatshe hoba Modimo o busa Jakobo. (Sela.)

14Ba kgutla mantsiboya, ba bohola jwaloka dintja, ba potoloha motse. 15Ba ya nne ba tjhobatjhobele nama, bosiu bo ba sele ba eso ho kgore! 16Empa nna, ke tla bina matla a hao, ke bolele dithoko tsa mohau wa hao e sa le kameso, hobane o qhobosheane ya ka le setshabelo sa ka tsatsing la matswalo. 17Ke rata ho o rorisa, wena, o leng matla a ka! Hobane Modimo ke qhobosheane ya ka, ke Modimo o nkgauhelang.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index