Search form

DIPESALEME 7

Thapelo e bitsang Moahlodi wa lefatshe lohle bakeng sa diketselletso.

Sefela sa dillo tsa Davida, seo a se binetseng Jehova ka baka la Kushe wa Benjamine.

1Jehova, Modimo wa ka, ke balehela ho wena; o mpoloke ho bohle ba ntlhorisang, mme o ntokolle; 2esere sera sa nthusolla jwaloka tau, sa ntshetlakela ha ke hloka monamoledi. 3Jehova, Modimo wa ka, ha ke entse ho hong, ha bokgopo bo le matsohong a ka, 4ha ke lefetse ka bobe ya neng a phela le nna ka kgotso, ha ke hlobodisitse ya ntlhoileng feela, 5sera a se ke se phallele moya wa ka, se ntshware, se setlakelle bophelo ba ka fatshe, se hulanye kganya ya ka leroleng. (Sela.)

6Tsoha, Jehova! ka bohale ba hao o phahamele ho itshena ha bao e leng dira ho nna! Tsoha, o nkemele, o laele kahlolo! 7Phutheho ya ditjhaba a e ke e o teele hare! O hlwelle dinqalong tse phahameng o okametse! 8Jehova o ahlola ditjhaba. Jehova, o ntokisetse! Nke ke etswe ka ho loka ha ka le ka bokgabane ba ka. 9Lonya la bakgopo ha le ke le fele, o tiise ya lokileng, wena ya lekolang dipelo le matheka, Modimo o lokileng!

10Thebe ya ka e ho Modimo o lwelang ba pelo tse lokileng. 11Modimo ke moahlodi ya lokileng, ke Modimo o halefelang ba babe ka matsatsi wohle. 12Ekare ha e mobe a sa kgutle, Modimo seqha sa wona, o se tjhehile, 13o mo phosetsa metsu e bolayang, metsu e tukang.

14Bonang, e mobe o na be a emotse bobe feela, a bo emere sefubeng, mme o tswetse thetso. 15O na be a tjhekile lemena, a le fatile, empa o wetse lemeneng leo a le tjhekileng. 16Bolotsana ba hae bo tla wela hodima hlooho ya hae, bokgopo ba hae bo wele phatleng ya hae.

17Ke tla rorisa Jehova ka baka la ho loka ha hae, ke binele lebitso la Jehova, la Mookamedi ya phahameng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index