Search form

DIPESALEME 96

Ho atametse mmuso wa Modimo.

1Binelang Jehova sefela se setjha; binelang Jehova, lona, baahi bohle ba lefatshe! 2Binelang Jehova, le rorise lebitso la hae, le bolele poloko ya hae ka matsatsitsatsi. 3Le bolele kganya ya hae hara ditjhaba, le mehlolo ya hae hara mefuta yohle! 4Hobane Jehova o moholo, o lokelwa ke ho roriswa ka ho fetisisa; o tshabeha ho fetisa medimo kaofela; 5hobane medimo yohle ya ditjhaba ke ditshwantsho feela, empa Jehova o entse mahodimo. 6Kganya le letlotlo di pela hae, matla le botle di sehalalelong sa hae.

7Lona, mefuta ya ditjhaba, busetsang ho Jehova, busetsang ho Jehova kganya le matla. 8Busetsang ho Jehova kganya e tshwanelang lebitso la hae; tlisang dinyehelo, le kene mabaleng a hae! 9Kgumamang pela Jehova ka bokgabane bo halalelang. Le thothomele pela hae, lona baahi bohle ba lefatshe! 10Ereng hara ditjhaba: Jehova o a busa! lefatshe le tiya ke hona, ha le sisinyehe; o ahlola ditjhaba ka ho loka.

11Mahodimo a ke a thabe, mme lefatshe le hlasimolohe; lewatle a le ke le dume le tsohle tse ho lona; 12dithota di ke di nyakalle le tse ho tsona kaofela; difate tsohle tsa meru di etse ditlatse tsa thabo pela Jehova! 13Hobane o ya tla ho ahlola lefatshe. O tla ahlola lefatshe ka ho loka, le ditjhaba ka nnete ya hae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index