Search form

SEFELA SA SALOMONE 5

1Ke tlile serapeng sa ka, ngwaneso, molebeletswa wa ka, ke ikgoletse mirra ya ka le nonetso ya ka, ka ja kgekge ya dinotshi tsa ka, ka nwa veine ya ka le lebese la ka ... Oho metswalle, jang, le nwe, le tahwe lerato.

2Ke ne ke robetse, empa pelo ya me e ne e fadimeha ... Ke lentswe la moratuwa wa me! o a kokota: Mpulele, ngwaneso, thatohatsi ya ka, leebakgorwana la ka, mohlweki wa ka! Hobane hlooho ya ka e tletse phoka, thitsane ya ka e kolobile ke marothodi a bosiu. 3Ke hlobotse kobo ya ka; ke tla e apara jwang? ke hlatswitse maoto a ka; ke tla a silafatsa jwang? 4Moratuwa wa me a kenya letsoho la hae ka lesobeng la monyako, mme pelo ya me ya mo opela. 5Ka tsoha ho bulela moratuwa wa me, mme matsoho a me a ne a rotha mirra, le menwana ya me e ne e rotha mirra e kwellang ditshepeng tsa senotlolo. 6Ka bulela moratuwa wa me, empa moratuwa wa me o ne a se a tlohile, a ile; moya wa me o ne o idibana ha a bua le nna; ka mmatla, mme ha ke a ka ka mmona; ka mmitsa, mme ha a ka a araba. 7Ka fumanwa ke dibohodi tse potapotang motseng; tsa nkotla tsa nthoba; ba lebelang marako ba nkamoha lesira la me. 8Baradi ba Jerusalema, ke a le antsha, ke re: Ha le bona moratuwa wa me, na le tla reng ho yena? ... Le re: Ke bohloko ke lerato.

9Moratuwa wa hao o na le eng eo a fetang moratuwa e mong ka yona, wena e motle hara basadi? Moratuwa wa hao o na le eng eo a fetang moratuwa e mong ka yona, ha o re antsha hakalo?

10Moratuwa wa me o mosweu, o bile o mofubedu; o kgetheha mahareng a ba dikete tse leshome; 11hlooho ya hae ke kgauta e tshekehileng, thitsane e forehileng ya hae e tshwana jwaloka lepheo la mokgwabane; 12mahlo a hae a jwaloka a maebakgorwana pela melatswana, a hlatswehileng ka lebese, a dutseng naleng. 13Marama a hae a jwaloka tema ya dinonetso le leifo la ditlama tse monko o monate; melomo ya hae ke mehaladitwe e rothanga mirra e kwellang; matsoho a hae ke moholoko ya kgauta e rokelletsweng dikrisolithe; 14sefuba sa hae ke mosebetsi wa manaka a tlou a homilweng ka disafire; maoto a hae ke ditshiya tsa maramore tse tshetlamisitsweng dihlomellong tsa kgauta; 15ponahalo ya hae e ka ya Lebanone, e kgethehile jwaloka ya dikedare. Lentswe la hae le monate haholo, mme botho ba hae kaofela ke bo kgahlisang. 16Moratuwa wa me o jwalo, mokgotsi wa me o jwalo, lona baradi ba Jerusalema!

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index