Search form

DIPALO 15

Melao ya mahlabelo

1Morena a bua ho Moshe, a re: 2“Bua le bana ba Iseraele, o re: <Ha le fihla naheng eo le tla aha ho yona, eo ke le neang yona, 3le nyehelle Morena ka nyehelo ya mollo, e leng nyehelo ya setjheso, kapa sehlabelo sa ho etsa kano, kapa nyehelo ya boithaopo, kapa ya mekete ya lona e kgethehileng, e le nyehelo e monko o monate, e amohelehang ho Morena, e tswang mohlapeng wa dikgomo kapa wa dinku. 4Jwale ya nyehellang Morena a be a tlise le nyehelo ya dijo, ya phofo e thumisehileng, e boima ba kilo e le nngwe, e dubilweng ka ole e etsang lethara e le nngwe; 5le veine e etsang lethara e le nngwe, e le nyehelo ya seno. Nyehelo ena o tla nyehela ka yona mmoho le nyehelo ya setjheso, kapa sehlabelo bakeng sa konyana e nngwe le e nngwe.

6“ <Kapa bakeng sa pheleu o tla nyehela ka nyehelo ya dijo, ya phofo e thumisehileng, e boima ba dikilo tse pedi; phofo ena e be e dubilweng ka ole e etsang lethara e le nngwe le halofo. 7Bakeng sa nyehelo ya seno o nyehele ka veine e etsang lethara e le nngwe le halofo, e be e monko o monate, e amohelehang ho Morena.

8“ <Ha o nyehela ka pohwana e le nyehelo ya setjheso, kapa e le sehlabelo, kapa e le ya ho etsa kano, kapa e le nyehelo ya teboho e nyehellwang Morena; 9o tla nyehela ka nyehelo ya pohwana mmoho le nyehelo ya dijo. E be phofo e boima ba kilo tse tharo, e thumisehileng, e dubilweng ka lethara tse pedi tsa ole. 10Bakeng sa nyehelo ya seno o nyehele ka veine e etsang dilethara tse pedi, e le nyehelo ya setjheso e monko o monate, e amohelehang ho Morena.

11“ <Oetse jwalo ka pohwana e nngwe le e nngwe, kapa ka pheleu e nngwe le e nngwe, kapa ka konyana e nngwe le e nngwe, kapa ka potsanyane e nngwe le e nngwe. 12Ho ya ka palo ya diphoofolo tseo o nyehelang ka tsona, le tla etsa jwalo ka e nngwe le e nngwe ho latela palo ya tsona.

13“ <Letswallwa le leng le le leng la naha le tla etsa dintho tsena ka mokgwa ona, ha le nyehela ka nyehelo ya mollo e monko o monate, e amohelehang ho Morena. 14Haeba mojaki ya jakileng hara lona, kapa mang kapa mang ya jakileng hara lona melokong ya lona, a rata ho nyehella Morena ka nyehelo ya mollo e monko o monate, e amohelehang ho Morena, o tla etsa jwalokaha le etsa. 15Ho tla ba le molao o le mong ho setjhaba, le ho mojaki ya jakileng hara lona. Ona ke molao wa mehla yohle melokong ya lona. Seo le leng sona, le mojaki o tla ba sona kapele ho Morena. 16Molao o tla ba mong, le taelo e tla ba nngwe ho lona le ho mojaki ya jakileng hara lona.> ”+

17Morena a bua ho Moshe, a re: 18“Bua le bana ba Iseraele, o re ho bona: <Ha le fihla naheng eo ke le isang ho yona, 19e tle ere ha le eja dijo tsa naha eo, le nyehelle Morena ka nyehelo e phahamiswang. 20Ka bohobe bo entsweng ka koro ya dilopotsiya, o tla nyehella Morena, e le nyehelo e akgotswang. O tla e phahamisa jwalokaha o etsa ka nyehelo e akgotswang e tswang seotlong. 21Melokong yohle ya lona le tla nyehella Morena ka hlama ya dilopotsiya tsa koro, e le nyehelo e akgotswang.

Dinyehelo tse tlosang sebe

22“ <Ha le etsa phoso, mme le sa boloke melao ena yohle eo Morena a e boleletseng Moshe; 23esita le tsohle tseo Morena a le laetseng tsona ka Moshe, ho tloha mohla Morena a le laelang ho ya fihla melokong ya lona; 24haeba setjhaba se etsa phoso e se ka morero, setjhaba sohle se tla nyehela ka pohwana e le nyehelo ya setjheso, e monko o monate, e amohelehang ho Morena. Setjhaba se tla nyehela le ka nyehelo ya dijo e tsamayang le nyehelo ya pohwana, le ka nyehelo ya seno e tsamayang le yona, ho ya ka taelo. Le nyehele le ka phooko e le nngwe e le nyehelo e tlosang sebe. 25Moprista o tla etsetsa setjhaba sohle sa bana ba Iseraele tefelo ya sebe, mme ba tla tshwarelwa, hobane ba entse phoso, mme ba tlisitse nyehelo ya mollo ho Morena, le nyehelo e tlosang sebe, ka baka la phoso ya bona. 26Setjhaba sohle sa bana ba Iseraele se tla tshwarelwa, mmoho le mojaki ya jakileng hara sona, hobane ho entswe phoso.

27“ <Haeba e mong a etsa sebe e se ka morero, o tla nyehela ka podi e tshehadi, e nang le selemo, e le nyehelo e tlosang sebe. 28Moprista o tla etsetsa motho eo ya entseng sebe e se ka morero tefelo ya sebe kapele ho Morena; o tla mo etsetsa tefelo ya sebe, mme o tla tshwarelwa.+ 29Ho ya etsang sebe e se ka morero, ho tla ba le molao o le mong ho letswallwa la naha, le ho mojaki ya jakileng hara lona.

30“ <Empa motho ya tlolang molao ka boomo, e ka ba letswallwa la naha kapa mojaki, eo o nyefola Morena, mme o tla kgaolwa setjhabeng sa habo. 31Motho eo o nyedisitse lentswe la Morena, o tlotse molao wa hae, mme eka kgona a kgaolwe ho hang, a jare bokgopo ba hae.> ”

Monna ya tlotseng molao wa Sabatha

32Ha banna ba Iseraele ba sa le lehwatateng, ba fumana motho a ntse a rwalla patsi ka letsatsi la Sabatha. 33Ba mo fumaneng a ntse a rwalla patsi ba mo tlisa ho Moshe, le ho Arone, le ho setjhaba sohle. 34Ba mo kenya tjhankaneng, hobane ho ne ho eso bolelwe hore na a etswe jwang. 35Morena a re ho Moshe: “Ruri motho eo a bolawe. Setjhaba sohle se mo tlepeletse kantle ho diahelo, ka majwe.” 36Yaba setjhaba sohle se mo ntshetsa kantle ho diahelo, se mo tlepetsa ka majwe, a ba a shwa jwalokaha Morena a ne a laetse Moshe.

Taelo ya ho etsa ditjellane diaparong

37Morena a bua ho Moshe, a re: 38“Bua le bana ba Iseraele, o re ho bona ba iketsetse ditjellane diqoleng tsa diaparo tsa bona, melokong yohle ya bona, mme hodima tjellane e nngwe le e nngwe e qoleng ya seaparo ho rokellwe kgwele e putswa.+ 39Ha le bona ditjellane tsena le tla hopola melao yohle ya Morena, mme le e phethe. Le se ke la phetha ditakatso tsa dipelo tsa lona le tsa mahlo a lona, e leng tse etsang hore le se ke la tshepahala. 40Ka mokgwa o jwalo, hopolang melao ya ka yohle, le e phethe, mme le tla halalela ho Modimo wa lona. 41Ke nna Morena Modimo wa lona, ya le ntshitseng naheng ya Egepeta, hore ke be Modimo wa lona. Ke nna Morena Modimo wa lona.”

BIBELE

© 1989 Bible Society of South Africa. Used by permission. All rights reserved.

More Info | Version Index