Search form

يّتّ سْتْي 14

مِسِرَكَيٍ عِسِرَيِلَكَيٍ سَفَتَقٍ

1عَلَتَلَ نَشَ عَ مَسٍن مُنسَ بّ، 2«عَ قَلَ عِسِرَيِلَكَيٍ بّ عٍ شَ فبِلٍن، عٍ شَ قَ يٌنكِن ثِ هَشِرْتِ مَبِرِ رَ، مِفِدٌلِ نُن بَا تَفِ. عٍ شَ لُ بَا دّ رَ بَالِ سٍقٌن يَ رَ. 3قِرَوُنَ عَ مَحْشُنمَ نّ، عَ عِسِرَيِلَكَيٍ بَرَ لْي فبٍنفبٍرٍنيِ مَبِرِ. 4ﭑ قِرَوُنَ شَشِلِ رَشْرْشْمَ نّ، عَلَكٌ عَ شَ بِرَ وٌ قْشْ رَ. نَ كُي ﭑ قَمَ مَتْشْي سْتْدٍ قِرَوُنَ نُن عَ شَ سْورِيٍ سَابُي رَ. مِسِرَكَيٍ قَمَ نّ عَ كٌلٌندٍ عَ ﭑ تَن نَن نَ عَلَتَلَ رَ.» عِسِرَيِلَكَيٍ عَ رَبَ نَ كِ نّ.

5مِسِرَ مَنفّ نُن عَ شَ كُنتِفِيٍ تٌ عَ كٌلٌن، عَ عِسِرَيِلَكَيٍ بَرَ سِفَ، عٍ نَشَ نَتّ مَسَرَ، عَ قَلَقٍ رَ، «وٌن مُنسٍ رَبَشِ يِ كِ؟ وٌن تٌ عِسِرَيِلَكَيٍ بّحِنشِ، عٍ مُ وَلِمَ وٌن بّ سْنْن!» 6قِرَوُنَ نَشَ يَامَرِ قِ سٌي شَ شِرِ سْورِ رَفِسٍيٍ رَ، سْورِيٍ شَ مَلَن يِرٍ كٍرٍن. 7عَ نَشَ سْورِ رَفِسٍ قَنيِ كّمّ سٍننِ سُفَندِ، سْورِ رَفِسٍ نَشَن بِرِن نَ مِسِرَ عٍ قَ بِرَ عٍ قْشْ رَ. سْورِ كُنتِفِ نُ بَكِشِ عٍ بِرِن كُي. 8عَلَتَلَ نَشَ مِسِرَ مَنفّ قِرَوُنَ شَشِلِ رَشْرْشْ، عَ قَ بِرَ عِسِرَيِلَكَيٍ قْشْ رَ، نَشٍيٍ نُ سِفَقٍ شُن نَكٍلِ كُي. 9قِرَوُنَ نُن عَ شَ سْورِ بِرِن نَشَ بِرَ عِسِرَيِلَكَيٍ قْشْ رَ عٍ شَ سٌي نُن عٍ شَ سْورِ رَفِسٍيٍ رَ. مِسِرَكَيٍ نَشَ عٍ لِ بَا دّ رَ، عٍ نُ يٌنكِنشِ دّننَشّ، ثِ هَشِرْتِ مَبِرِ رَ، بَالِ سٍقٌن يَ رَ.

10قِرَوُنَ تٌ مَكْرّ عٍ رَ، عِسِرَيِلَكَيٍ نَشَ عٍ يَ رَكٍلِ، عٍ نَشَ مِسِرَكَيٍ تٌ قَ رَ. عٍ نَشَ فَاشُ كِ قَنيِ رَ، عٍ قَ عٍ مَوَ عَلَتَلَ بّ. 11عٍ نَشَ عَ قَلَ مُنسَ بّ، «عِ وٌن نَمِنِشِ مِسِرَ بْشِ رَ مُنقٍ رَ؟ يَكْسِ وٌن قَشَمَ نّ فبٍنفبٍرٍن يِرٍ. عَ مُ نُ قِسَ وٌن شَ قَشَ مِسِرَ؟ 12وٌن نُ نَ مِسِرَ بْشِ مَ تّمُي نَشّ، مُشُ عَ قَلَ نّ عِ بّ، ‹مُشُ وَلِقٍ مِسِرَكَيٍ بّ، نَ قِسَ مُشُ بّ دِنّ قَشَقٍ رَ فبٍنفبٍرٍنيِ مَ.›» 13مُنسَ نَشَ حَمَ يَابِ، «وٌ نَشَ فَاشُ، وٌ شَ لِمَنِيَ. تٌ وٌ قَمَ عَلَتَلَ شَ كِسِ تٌدٍ. مِسِرَكَيٍ نَشٍيٍ يِ كِ، وٌ مُ عٍ تٌمَ سْنْن. 14عَلَتَلَ نَن فٍرٍ سٌمَ وٌ بّ. وٌ سَبَرِ.»

15عَلَتَلَ نَشَ عَ مَسٍن مُنسَ بّ، «عِ مَوَقٍ ﭑ بّ مُنقٍ رَ؟ عَ قَلَ عِسِرَيِلَكَيٍ بّ، عٍ شَ تِ كِرَ شْن مَ. 16عِ شَ يِسُشُوُرِ رَتٍ، عَ عِتَلَ بَا شُن مَ، عَلَكٌ بَا شَ رَبِ، عِسِرَيِلَكَيٍ شَ عِفِرِ بْشِ شَرَشِ رَ. 17ﭑ مِسِرَكَيٍ شَشِلِ رَشْرْشْمَ نّ، عَلَكٌ عٍ شَ بِرَ وٌ قْشْ رَ. نَ كُي ﭑ مَتْشْي سْتْمَ قِرَوُنَ، عَ شَ سْورِيٍ، عَ شَ سْورِ رَفِسٍيٍ، نُن عَ شَ سٌي رَفِمَيٍ سَابُي رَ. 18ﭑ نَ فّ مَتْشْي سْتْدٍ قِرَوُنَ، عَ شَ سْورِ رَفِسٍيٍ، نُن عَ شَ سٌي رَفِمَيٍ سَابُي رَ، مِسِرَكَيٍ عَ كٌلٌنمَ نّ عَ ﭑ تَن نَن نَ عَلَتَلَ رَ.»

19عَلَ شَ مَلٍكّ نَشَن نُ نَ سِفَقٍ عِسِرَيِلَ حَمَ يَ رَ، عَ نَشَ فبِلٍن عٍ شَنبِ رَ. نُشُي قَن نَشَ كٍلِ عٍ يَ رَ، عَ قَ تِ عٍ شَنبِ رَ 20مِسِرَكَيٍ نُن عِسِرَيِلَكَيٍ تَفِ. نَ نُشُي نَشَ عَ نِيَ مِسِرَكَيٍ شَ لُ دِ مِ كُي، عِسِرَيِلَكَيٍ تَن شَ لُ نَءِيَلَنيِ كُي. عٍ مُ نْ عٍ مَكْرّدٍ عٍ بٌورٍ رَ نَ كْي رَ.

21مُنسَ تٌ عَ بّلّشّ عِتَلَ بَا شُن مَ، عَلَتَلَ نَشَ بَا تُتُن كْي بِرِن نَ قٌيٍ شُنفبٍ رَ كٍلِقٍ سٌفٍتٍدٍ. عَ نَشَ كِرَ شَرَشِ رَ مِنِ بَا تَفِ. 22عِسِرَيِلَكَيٍ دَنفِمَ دّننَشّ، بَا يٍيٍ نَشَ مَلَن عٍ يِرٍقَنيِ مَ نُن عٍ كْولَ مَ. 23مِسِرَكَيٍ نَشَ عٍ سَفَتَ. قِرَوُنَ شَ سٌي، عَ شَ سْورِ رَفِسٍيٍ، نُن عَ شَ سٌي رَفِمَيٍ بِرِن نَشَ بِرَ عٍ قْشْ رَ بَا تَفِ. 24سُبَشّ مَ، عَلَتَلَ نَشَ عَ يَ رَ سِفَ مِسِرَ شَ سْورِيٍ مَ كٍلِقٍ كٌورٍ مَ، تّ نُن نُشُي نَ دّننَشّ، عَ قَ عٍ عِقُ. 25عَ نَشَ عَ رَفِرِ سْورِيٍ رَفِسٍيٍ سَنيِيٍ شَ بَ نَ، عٍ شَ حّرّ شَ شْرْشْ. نَ كُي، مِسِرَكَيٍ نَشَ عَ قَلَ، «وٌن شَ وٌن فِ عِسِرَيِلَكَيٍ مَ، بَرِ مَ عَلَتَلَ نَن نَ عٍ شَ فٍرٍ سٌقٍ.»

26عَلَتَلَ نَشَ عَ مَسٍن مُنسَ بّ، «عِ بّلّشّ عِتَلَ بَا شُن مَ، يٍ شَ رَدِن مِسِرَكَيٍ، عٍ شَ سْورِ رَفِسٍيٍ، نُن عٍ شَ سٌي رَفِمَيٍ شُن نَ.» 27مُنسَ تٌ نَ رَبَ سُبَشّ مَ، بَا نَشَ فبِلٍن عَ يِرٍ. مِسِرَكَيٍ نُ نَ عٍ فِقٍ تّمُي نَشّ، عَلَتَلَ نَشَ يٍ دُ سُ عٍ بِرِن شُن نَ. 28يٍ نَشَ قِرَوُنَ شَ سْورِيٍ، عَ شَ رَفِسٍيٍ، سٌي رَفِمَيٍ، نُن عَ شَ سْورِ بِرِن مَكٌتٌ. نَشٍيٍ نُ بِرَشِ عِسِرَيِلَكَيٍ قْشْ رَ بَا كُي، نٍيٍ بِرِن نَشَ لْي.

29كْنْ عِسِرَيِلَكَيٍ نَشَ بَا عِفِرِ كِرَ شَرَشِ شْن مَ. يٍ نُ مَلَنشِ عٍ يِرٍقَنيِ مَ نُن عٍ كْولَ مَ. 30نَ لْشْي عَلَتَلَ نَشَ عِسِرَيِلَكَيٍ رَتَنفَ مِسِرَكَيٍ مَ. عِسِرَيِلَكَيٍ نَشَ مِسِرَكَيٍ قُرٍيٍ تٌ بَا دّ رَ. 31عِسِرَيِلَكَيٍ تٌ عَلَتَلَ سّنبّ تٌ عَ نَشَن نَوَلِشِ مِسِرَكَيٍ شِلِ مَ، عٍ نَشَ فَاشُ عَلَتَلَ يَ رَ، عٍ قَ عٍ تَشُ عَلَتَلَ نُن عَ شَ شّيرَ مُنسَ رَ.

سٌسٌ كِتَابُييٍ؛ تَوُرٍتَ، يَبُرَ، عِنيِلَ

© 2015—Mission Evangélique Reformée Néerlandaise et les Traducteurs Pionniers de la Bible

More Info | Version Index