Search form

قٍ قْلْ قْلّ 37

يُسُقُ شَ شِيٍ سِنفٍيٍ

1يَشُبَ سَبَتِ نّ كَنَان بْشِ مَ، عَ بَبَ نُ نَ دّننَشّ. 2يَشُبَ بْنسْي شَ تَرُشُي نَن يَ. يُسُقُ، نَشَن شَ سِمَيَ نُ بَرَ حّ قُ نُن سٌلٌقٍرٍ لِ، عَ نُ شُرُ سٍيٍ نَن كَنتَمَ عَ نُن عَ تَارَيٍ، نُن عَ بَبَ شَ فِنّيٍ بِلَ نُن سِلِثَ شَ دِيٍ. يُسُقُ نُ عَ تَارَيٍ شَ قٍ حَاشِيٍ دّنتّفّ سَمَ عَ بَبَ بّ. 3يُسُقُ نَن نُ رَقَن عِسِرَيِلَ مَ دَنفِ عَ شَ دِ بِرِن نَ، بَرِ مَ عَ تَن بَرِ عَ شَ شّمّقٌرِحَ نَن كُي. نَ كُي عَ نَشَ دٌنمَ كُيٍ تٌقَنيِ قِ عَ مَ. 4يُسُقُ تَارَيٍ نَشَ عَ كٌلٌن عٍ شُنيَ نَن نَقَن عٍ بَبَ مَ دَنفِ عٍ بِرِن نَ. عٍ نَشَ عَ رَحَاشُ قْلْ، عٍ مُ نُ وْيّن قَنيِ قَلَمَ عَ بّ كْرّ.

5نَ تّمُي يُسُقُ نَشَ شِيٍ ندٍ سَ. عَ تٌ نَ عِبَ عَ تَارَيٍ بّ، عٍ نَشَ عَ رَحَاشُ دَنفِقٍ عَ سِنفٍ رَ. 6عَ نَشَ عَ قَلَ عٍ بّ، «وٌ تُلِ مَتِ ﭑ مَ شِيٍ رَ، ﭑ نَشَن سَشِ. 7وٌن بِرِن نُ نَ شّ نَن مَ مّنفِ رَشِرِدٍ. نَ نَن لَن، ﭑ مَ مّنفِ شِرِ نَشَ كٍلِ، عَ تِ. مّنفِ شِرِ نَشٍيٍ نُ سُشُشِ وٌ تَن يِ رَ، عٍ نَشَ ﭑ فبٍ شِرِ رَبِلِن، عٍ بِرِن قَ عٍ كُنتِن ﭑ مَ شِرِ بُن.» 8عَ تَارَيٍ نَشَ عَ مَشْرِن، «ثٍ، عِ وَ مَ قِندِقٍ مُشُ شَ مَنفّ نَن نَ، عَلَكٌ عِ شَ نُ مُشُ يَمَرِ؟» عٍ نَشَ عَ رَحَاشُ دَنفِقٍ عَ سِنفٍ رَ عَ شَ شِيٍ نُن عَ شَ مَسٍنيِ شَ قٍ رَ.

9يُسُقُ تٌ شِيٍ فبّتّ سَ، عَ نَشَ نَ قَن عِبَ عَ تَارَيٍ بّ. عَ نَشَ عَ قَلَ عٍ بّ، «ﭑ مَن بَرَ شِيٍ سَ. سٌفٍ، كِكٍ، نُن تُنبُي قُ نُن كٍرٍن نُ نَ ﭑ بُن مَ.» 10عَ نَشَ نَ شِيٍ تَفِ رَبَ عَ بَبَ نُن عَ تَارَيٍ بّ. عَ بَبَ نَشَ شَاحّ عَ مَ، عَ قَ عَ قَلَ عَ بّ، «عِ شِيٍ نَشَن سَشِ يِ كِ، عَ قِندِشِ شِيٍ مْولِ مُندُن نَ؟ عِ وَشِ نّ عِ نفَ، عِ تَارَيٍ، نُن ﭑ تَن، مُشُ شَ قَ مُشُ عِفٌرٌدٍ بْشِ مَ عِ بّ؟» 11عَ تَارَيٍ نَشَ بِرَ عَ تْونّ قٍ قْشْ رَ، كْنْ عَ بَبَ نَشَ عَ حّنفِ سَ عَ شِيٍ شْن مَ.

12يُسُقُ تَارَيٍ نَشَ سِفَ سِكٍمِ عٍ بَبَ شَ شُرُ سٍيٍ دّ مَدٌندٍ. 13عِسِرَيِلَ نَشَ عَ قَلَ يُسُقُ بّ، «عِ تَارَيٍ بَرَ سِفَ شُرُ سٍيٍ دّ مَدٌندٍ سِكٍمِ. ﭑ نَشَن نَبَمَ، ﭑ شَ عِ شّي عٍ شْن مَ.» يُسُقُ نَشَ عَ يَابِ، «عَوَ.» 14عِسِرَيِلَ نَشَ عَ مَسٍن عَ بّ، «سِفَ مَقُرٍن عِ شَ سَ عَ مَتٌ شَ عِ تَارَيٍ مُ قُرَشِ، شَ سٍ مُ شُرُ سٍيٍ قَن تٌشِ عَلَكٌ عِ شَ قَ نَ دّنتّفّ سَ ﭑ بّ.» عَ نَشَ عَ شّي كٍلِ هٍبِرٌن لَنبَنيِ سِفَقٍ رَ سِكٍمِ.

15شّمّ ندٍ نَشَ يُسُقُ تٌ سِكٍمِ بْشِ مَ، عَ نَ حّرّقٍ وُلَ عِ. نَ شّمّ نَشَ عَ مَشْرِن، «عِ مُنسٍ قٍنقٍ؟» 16عَ نَشَ عَ يَابِ، «ﭑ نَ ﭑ تَارَيٍ نَن قٍنقٍ. يَندِ، عَ قَلَ ﭑ بّ عٍ نَ شُرُ سٍيٍ دّ مَدٌنقٍ دّننَشّ.» 17نَ شّمّ نَشَ عَ قَلَ عَ بّ، «عٍ مُ نَ بٍ. ﭑ بَرَ عٍ شُي مّ عَ قَلَ رَ عٍ شَ سِفَ دٌتَن.» نَ كُي يُسُقُ نَشَ بِرَ عَ تَارَيٍ قْشْ رَ هَن عَ سَ عٍ لِ دٌتَن.

18عٍ تٌ سَ عَ تٌ يِرٍ مَكُيٍ، عٍ نَشَ لَن عَ مَ عٍ شَ عَ قَشَ. 19عٍ نُ قَ عَ قَلَ رَ عٍ بٌورٍ بّ، «يِ شِيٍ سَ مَنفّ نَن نَ قَقٍ يِ كِ. 20وٌ قَ بٍ، وٌن شَ عَ قَشَ، وٌن شَ عَ رَفٌرٌ كْلْنيِ ندٍ كُي. وٌن نْمَ عَ قَلَدٍ سُبٍ شَاحّ ندٍ بَرَ عَ عِبْو. نَ تّمُي وٌن قَمَ عَ كٌلٌندٍ عَ شَ شِيٍ قِندِ مَ عَ بّ قٍ نَشَن نَ.»

21رُبٍن تٌ نَ مّ، عَ نَشَ عَ بَ عٍ يِ رَ يِ مَسٍنيِ رَ، «وٌن نَشَ عَ قَشَ دٍ. 22عَ مُ لَنمَ وٌ شَ عَ وُلِ رَ مِنِ. وٌ شَ عَ رَفٌرٌ يِ كْلْنيِ كُي نَشَن نَ يِ فبٍنفبٍرٍن يِرٍ. مِشِ يٌ نَشَ عَ بّلّشّ دِن عَ رَ.» عَ نُ وَ مَ عَ بَقٍ نّ عٍ يِ رَ عَلَكٌ عَ شَ نْ عَ رَفبِلٍندٍ عَ بَبَ شْن.

23يُسُقُ تٌ عَ تَارَيٍ يِرٍ لِ، عٍ نَشَ عَ شَ دٌنمَ كُيٍ تٌقَنيِ رَتٍ عَ مَ. 24عٍ نَشَ يُسُقُ رَفٌرٌ كْلْنيِ ندٍ كُي، يٍ مُ نُ نَ نَشَن كُي.

25نَ دَنفِ شَنبِ، عٍ نُ نَ عٍ دّفٍقٍ تّمُي نَشّ، عٍ نَشَ سُمَيِلَ دِ ندٍيٍ تٌ قَ رَ كٍلِقٍ فَلٍدٍ. عٍ نُ نَ سُرَيِ، سٍرِ، نُن لَبُندّ شَنِنقٍ مِسِرَ بْشِ مَ حْشْمّيٍ قَرِ. 26يُدَ نَشَ عَ مَسٍن عَ شُنيَيٍ بّ، «وٌن نَ وٌن شُنيَ قَشَ فُندٌ كُي، نَ مُنسٍ قَنمَ وٌن تَن مَ؟ 27وٌ قَ، وٌن شَ عَ مَتِ سُمَيِلَ بْنسْي مِشِيٍ مَ. وٌن نَشَ عَ قَشَ، بَرِ مَ وٌن شُنيَ نَ عَ رَ. وٌن وُلِ كٍرٍن قَسّ كٍرٍن.» عَ شُنيَيٍ بِرِن نَشَ تِن عَ شَ مَسٍنيِ رَ.

28نَ مَدِيَن يُلّيٍ تٌ عٍ يِرٍ لِ، يُسُقُ تَارَيٍ نَشَ عَ رَتٍ كْلْنيِ كُي، عٍ قَ عَ مَتِ نٍيٍ مَ كْبِرِ كٌلٍ مْشْحّن نَ. نَ يُلّ نَشٍيٍ قَتَنشِ سُمَيِلَ بْنسْي رَ، نٍيٍ نَشَ يُسُقُ شَنِن مِسِرَ بْشِ مَ.

29نَ دَنفِ شَنبِ رُبٍن نَشَ فبِلٍن كْلْنيِ يِرٍ يُسُقُ قْشْ رَ، كْنْ عَ مُ عَ لِ نَا. عَ نَشَ عَ شَ دٌنمَ بِرِن عِبْو عَ مَ سُننُنيِ كُي. 30عَ نَشَ فبِلٍن عَ شُنيَيٍ يِرٍ، عَ عَ قَلَ عٍ بّ، «يُسُقُ مُ نَ يِرٍ وٌن نَ لُ دّننَشّ، ﭑ قَ مُنسٍ رَبَمَ كْرّ؟» 31عٍ نَشَ سِ كٍرٍن قَشَ، عٍ قَ يُسُقُ شَ دٌنمَ كُيٍ تٌقَنيِ مَتُرُشُن نَ سُبٍ وُلِ. 32نَ شَنبِ، عٍ نَشَ نَ دٌنمَ كُيٍ تٌقَنيِ شَنِن عٍ بَبَ شْن مَ. عٍ نَشَ عَ قَلَ عَ بّ، «مُشُ بَرَ يِ تٌ. يِ دٌنمَ مَتٌ بَ شَ عِ شَ دِ نَن فبٍ عَ رَ.» 33يَشُبَ نَشَ نَ دٌنمَ كٌلٌن، عَ قَ عَ قَلَ، «ﭑ مَ دِ شَ دٌنمَ نَ عَ رَ! وُلَ سُبٍ شَاحّ ندٍ بَرَ ﭑ مَ دِ يُسُقُ قَشَ! عَ بَرَ عَ عِبْو!» 34يَشُبَ نَشَ عَ شَ دٌنمَ عِبْو عَ مَ سُننُنيِ كُي. عَ نَشَ سُننُن دُفِ رَفٌرٌ عَ مَ، عَ عَ شَ دِ حْن قٍ رَبَ شِ وُيَشِ. 35عَ شَ دِ شّمّيٍ نُن عَ شَ دِ فِنّيٍ نَشَ قٍ بِرِن نَبَ عَ بّ عَلَكٌ سُننُنيِ شَ بَ عَ مَ، كْنْ يَشُبَ مُ دُندُ. عَ نَشَ عَ قَلَ، «ﭑ نَن ﭑ مَ دِ شَ سُننُنيِ شَنِنمَ هَن ﭑ سَ عَ لِمَ تّمُي نَشّ عَلِفِيَمَ.» يَشُبَ نَشَ وَ عَ شَ دِ بّ.

36مَدِيَنكَيٍ تٌ مِسِرَ لِ، عٍ نَشَ يُسُقُ مَتِ ثٌتِقَرِ مَ، نَشَن قِندِشِ مِسِرَ مَنفّ كَنتَمِشِيٍ شُنيِ رَ.

سٌسٌ كِتَابُييٍ؛ تَوُرٍتَ، يَبُرَ، عِنيِلَ

© 2015—Mission Evangélique Reformée Néerlandaise et les Traducteurs Pionniers de la Bible

More Info | Version Index