Search form

كْنتِ تِقٍ 22

بَلَكِ شَ شّيرَيَ

1عِسِرَيِلَكَيٍ نَشَ سِفَ عٍ سَ يٌنكِن مٌوَبَ قِيلِ مَ، يُرُدّن شُرٍ دّ، يٍرِكٌ يَ تَفِ. 2سِثٌرٌ شَ دِ شّمّ بَلَكِ نُ بَرَ عَ مّ عِسِرَيِلَكَيٍ نَشَن نَبَشِ عَمٌرِكَيٍ رَ. 3مٌوَبَكَيٍ نُ بَرَ فَاشُ عِسِرَيِلَ حَمَ بٍلٍبٍلٍ شَ قٍ رَ. 4نَ كُي، عٍ نَشَ عَ قَلَ مَدِيَن كُنتِفِيٍ بّ، «يِ حَمَ بٍلٍبٍلٍ قَمَ وٌن مَ بْشِ بِرِن شُن نَكَنَدٍ، عَلْ نِنفٍيٍ مّرّ شُن نَكَنَمَ كِ نَشّ.» بَلَكِ نَن نُ نَ مٌوَبَ مَنفّ رَ نَ تّمُي.

5عَ نَشَ شّيرَيٍ شّي بٍيٌرِ شَ دِ شّمّ بَلَمِ يِرٍ، نَشَن نُ سَبَتِشِ ثٍتٌرِ، عَ بَرِ تَا شُرٍ دّ رَ، عَ قَلَقٍ رَ، «حَمَ بٍلٍبٍلٍ ندٍ بَرَ كٍلِ مِسِرَ بْشِ مَ، عٍ قَ يٌنكِن ﭑ مَ بْشِ سّيتِ مَ. 6يَندِ، عِ شَ قَ يِ حَمَ دَنكَدٍ، بَرِ مَ عٍ سّنبّ فبٌ ﭑ بّ. تّمُندٍ، نَ كِ ﭑ نْمَ نّ عٍ بْنبْدٍ، ﭑ عٍ كٍرِ يِ بْشِ مَ. ﭑ عَ كٌلٌن، عِ نَ دُبَ نَشَن بّ، نَ بَرَ بَرِكَ. عِ مَن نَ نَشَن دَنكَ، نَ قَن بَرَ دَنكَ.» 7مٌوَبَ كُنتِفِيٍ نُن مَدِيَن كُنتِفِيٍ نَشَ سِفَ سٍ مَتٌي سَرٍ رَ بَلَمِ شْن، عٍ قَ بَلَكِ شَ شّيرَيَ عِبَ عَ بّ.

8بَلَمِ نَشَ عَ قَلَ عٍ بّ، «وٌ شَ كْي رَدَنفِ بٍ. عَلَتَلَ نَ يَابِ سٌ ﭑ يِ، ﭑ نَ قَلَمَ نّ وٌ بّ.» نَ كُي، مٌوَبَ كُنتِفِيٍ نَشَ شِ بَلَمِ شْنيِ. 9عَلَتَلَ نَشَ مِنِ بَلَمِ مَ، عَ عَ مَشْرِن، «ندٍ نَ يِ مِشِيٍ رَ عِ نَشٍيٍ رَ سّنّشِ عِ شْنيِ يِ كِ؟» 10بَلَمِ نَشَ عَ يَابِ، «مٌوَبَ مَنفّ سِثٌرٌ شَ دِ شّمّ بَلَكِ نَن يِ مِشِيٍ شّي، عَ عٍ شَ قَ عَ قَلَ ﭑ بّ، 11‹حَمَ بٍلٍبٍلٍ ندٍ بَرَ كٍلِ مِسِرَ بْشِ مَ، عٍ قَ سَبَتِ ﭑ مَ بْشِ سّيتِ مَ. عِ شَ قَ يِ حَمَ دَنكَ، عَلَكٌ ﭑ شَ نْ عٍ كٍرِدٍ.›» 12عَلَتَلَ نَشَ عَ مَسٍن بَلَمِ بّ، «عِ نَشَ بِرَ يِ مِشِيٍ قْشْ رَ، عِ نَشَ نَ حَمَ دَنكَ. بَرَكَتْي حَمَ نَ عَ رَ.»

13نَ كُيٍ عِبَ بَلَمِ نَشَ كٍلِ، عَ عَ قَلَ بَلَكِ شَ كُنتِفِيٍ بّ، «وٌ فبِلٍن وٌ شَ بْشِ مَ، بَرِ مَ عَلَتَلَ مُ تِنشِ ﭑ شَ بِرَ وٌ قْشْ رَ.» 14نَ كُي، مٌوَبَ كُنتِفِيٍ نَشَ فبِلٍن بَلَكِ يِرٍ، عٍ عَ قَلَ عَ بّ، «بَلَمِ بَرَ تٌندِ بِرَدٍ مُشُ قْشْ رَ.»

15بَلَكِ مَن نَشَ كُنتِفِ فبٍفبٍ فبّتّ شّي، نَشٍيٍ تِدٍ دَنفِ عَ سِنفٍيٍ رَ. 16عٍ نَشَ سِفَ بَلَمِ يِرٍ، عٍ عَ قَلَ عَ بّ، «بَلَكِ شَ مَسٍنيِ نَن يَ؛ ‹ﭑ تَن سِثٌرٌ شَ دِ شّمّ بَلَكِ، ﭑ بَرَ عِ مَيَندِ، عِ نَشَ تٌندِ تَلُقٍ رَ ﭑ يِرٍ! 17ﭑ عِ سَرٍ قِمَ نّ عَ قَنيِ رَ. عِ وَ مَ نَشَن يٌ شْن، ﭑ نَ قِمَ نّ عِ مَ. يَندِ عِ شَ يِ حَمَ دَنكَ ﭑ بّ.›» 18كْنْ بَلَمِ نَشَ بَلَكِ شَ شّيرَيٍ يَابِ، «هَلِ بَلَكِ عَ شَ بَنشِ رَقٍ فبٍتِ نُن شّيمَ رَ، عَ عَ سٌ ﭑ يِ رَ، ﭑ مُ نْمَ قٍقٍ رَبَدٍ ﭑ مَرِفِ عَلَتَلَ مُ ﭑ يَمَرِ نَشَن نَ. 19وٌ نَشَن نَبَمَ، وٌ قَن شَ لُ بٍ هَن تِنَ فّيسّفّ. ﭑ مَن شَ عَلَتَلَ شَ مَسٍنيِ رَ مّ.» 20عَلَتَلَ نَشَ مِنِ بَلَمِ مَ كْي رَ، عَ عَ مَسٍن عَ بّ، «يِ مِشِيٍ تٌ بَرَ قَ عِ شِلِدٍ، عِ شَ بِرَ عٍ قْشْ رَ، كْنْ ﭑ نَ نَشَن قَلَ عِ بّ، عِ نَ نَن نَبَمَ.»

21نَ كُيٍ عِبَ بَلَمِ نَشَ بَكِ عَ شَ سٌقَلٍ قَرِ، عَ بِرَ مٌوَبَ كُنتِفِيٍ قْشْ رَ. 22بَلَمِ سِفَقٍ نَشَ عَلَتَلَ رَشْنْ. عَلَتَلَ شَ مَلٍكّ نَشَ سِفَ كِرَ عِبٌلٌندٍ بَلَمِ يَ رَ. عَ نُ دْشْشِ عَ شَ سٌقَلٍ قَرِ، عَ شَ وَلِكّ قِرِنيِيٍ نُ نَ عَ قْشْ رَ. 23بَلَمِ شَ سٌقَلٍ تٌ عَلَتَلَ شَ مَلٍكّ تٌ كِرَ تَفِ، سَنتِدّفّمَ سُشُشِ عَ يِ، عَ رَ مِنِشِ عَ تّ عِ، عَ نَشَ كٍلِ كِرَ شْن مَ، عَ سٌ شّ رَ. بَلَمِ نَشَ سٌقَلٍ بْنبْ، عَلَكٌ عَ شَ عَ شُن تِ كِرَ رَ.

24عَلَتَلَ شَ مَلٍكّ مَن نَشَ سَ تِ عٍ شَ كِرَ دِ شْن مَ وّنِ بِلِيٍ تّتّ قِرِنيِيٍ تَفِ. 25سٌقَلٍ تٌ عَلَتَلَ شَ مَلٍكّ تٌ، عَ نَشَ عَ رَشّتّن تّتّ رَ، عَ بَلَمِ سَنيِ شّتّن تّتّ رَ عَ حَاشِ رَ. بَلَمِ نَشَ فبِلٍن عَ بْنبْ رَ. 26عَلَتَلَ شَ مَلٍكّ مَن نَشَ سَ تِ يِرٍ رَشّتّنشِ عَ قَنيِ رَ. دَنفِدٍ يٌ مُ نُ نَ. 27سٌقَلٍ تٌ عَلَتَلَ شَ مَلٍكّ تٌ، عَ نَشَ عَ سَ بَلَمِ بُن مَ. بَلَمِ نَشَ شْنْ عَ مَ، عَ عَ بْنبْ عَ شَ يِسُشُوُرِ رَ.

28نَ كُي، عَلَتَلَ نَشَ سٌقَلٍ دّ رَ مِنِ، عَ عَ نِيَ عَ شَ عَ قَلَ بَلَمِ بّ، «عَ سَشَن ندٍ نَن يِ كِ عِ ﭑ بْنبْمَ. ﭑ مُنسٍ رَبَشِ عِ رَ؟» 29بَلَمِ نَشَ عَ يَابِ، «عِ ﭑ مَتَندِشِ نّ. شَ سَنتِدّفّمَ نَ ﭑ يِ رَ نُ، ﭑ عِ قَشَمَ نّ كٍرٍن نَ.» 30سٌقَلٍ نَشَ عَ قَلَ بَلَمِ بّ، «ﭑ تَن شَ مُ عِ شَ سٌقَلٍ رَ، عِ تٍمَ نَشَن قَرِ تّمُي بِرِن؟ ﭑ دَرِشِ يِ مْولِ رَبَ رَ؟» بَلَمِ نَشَ عَ يَابِ، «عَدٍ.»

31نَ تّمُي عَلَتَلَ نَشَ بَلَمِ يَ رَبِ مَلٍكّ تٌقٍ رَ، عَ تِشِ كِرَ تَفِ، عَ شَ سَنتِدّفّمَ بَشِ عَ تّ عِ، عَ سُشُشِ عَ بّلّشّ. بَلَمِ نَشَ عَ قٍلٍن، عَ سُيِدِ كٍرٍن نَ. 32مَلٍكّ نَشَ عَ مَشْرِن، «مُنقٍ رَ عِ بَرَ عِ شَ سٌقَلٍ بْنبْ سَنيَ سَشَن؟ ﭑ قَشِ نّ ﭑ شَ كِرَ عِبٌلٌن عِ يَ رَ، بَرِ مَ عِ نَ كِرَ نَشَن شْن يِ كِ، مُرُتّلَ شَ كِرَ نَ عَ رَ. 33عِ شَ سٌقَلٍ بَرَ عِ رَتَنفَ ﭑ مَ سَنيَ سَشَن. شَ عَ تَن مُ عَ رَ نُ، ﭑ بَرَ عِ قَشَ نُ، كْنْ ﭑ مُ عَ تَن قَشَمَ.» 34بَلَمِ نَشَ عَ قَلَ عَ بّ، «ﭑ بَرَ يُنُبِ رَبَ! ﭑ مُ نُ عَ كٌلٌنشِ، عِ تِشِ ﭑ يَ رَ. كْنْ يَكْسِ، شَ يِ بِيَاسِ مُ عِ كّنّنشِ، ﭑ شَ فبِلٍن ﭑ شْنيِ.» 35عَلَتَلَ شَ مَلٍكّ نَشَ عَ مَسٍن، «عَدٍ، عِ شَ بِرَ يِ مِشِيٍ قْشْ رَ، كْنْ ﭑ نَ مَسٍنيِ نَشَن مَسٍن عِ بّ، عِ نَ نَن قَلَمَ.» نَ كُي، بَلَمِ نُن بَلَكِ شَ شّيرَيٍ نَشَ سِفَ.

36بَلَكِ تٌ عَ مّ عَ بَلَمِ نَ قَقٍ، عَ نَشَ سِفَ عَ رَلَندٍ تَا ندٍ مَ عَرِنٌن شُرٍ دّ رَ، مٌوَبَ شَ نَانِنيِ يِرٍ. 37عَ نَشَ بَلَمِ مَشْرِن، «مُنقٍ رَ عِ مُ قَ ﭑ مَ شّيرَيَ سِنفٍ شِلِ مَ؟ عِ حْشْ عَ مَ ﭑ مُ نْمَ عِ سَرٍ قِدٍ؟» 38بَلَمِ نَشَ بَلَكِ يَابِ، «ﭑ بَرَ قَ عِ شْن، كْنْ ﭑ مُ نْمَ وْيّندٍ نَ كِ تُن. عَلَتَلَ مَسٍنيِ نَشَن سَمَ ﭑ دّ عِ، ﭑ نَ نَن تُن قَلَمَ.» 39بَلَمِ نُن بَلَكِ نَشَ سِفَ، عٍ سٌ كِرِيَتِ شُسٌتِ. 40بَلَكِ نَشَ نِنفٍيٍ نُن يّشّييٍ بَ سّرّشّ رَ، عَ ندٍ سٌ بَلَمِ يِ رَ عَ نُن كُنتِفِ نَشٍيٍ نُ نَ عَ قْشْ رَ. 41نَ كُيٍ عِبَ، بَلَكِ نَشَ بَلَمِ شَنِن بَمٌتِ بَالِ فٍيَ قَرِ. مّننِ عَ نَشَ عِسِرَيِلَ حَمَ سّيتِ ندٍ تٌ.

سٌسٌ كِتَابُييٍ؛ تَوُرٍتَ، يَبُرَ، عِنيِلَ

© 2015—Mission Evangélique Reformée Néerlandaise et les Traducteurs Pionniers de la Bible

More Info | Version Index