Search form

Luk 14

Yesus tebe tinum yaan so sagaal so fitobesu nala telela dosa uta ko

Luk 6:6-10, 13:10-17; Jon 7:21-23

1Kale tam God imi ifin am ko age ulotu am maak daanu e, Yesus iyo no Falosi kamogim maak imi am kal iman unan-bala e, alugum tinum kutam albip iyo, Yesus imi kuguup umaak utamum o agan-bilipta, 2tinum yaan so sagaal so fitobesu iyo tal Yesus imi miit tem tama 3Yesus iyo atam-nala e, ulo utamsip tinum sino Falosi sino imi aget fugun-bilip uyo utam no ke-nala e, dagala ko. “Ibaa. Numi ulo uyo bogobe-nuluta, ‘Intap numin o,’ agesu a? Ulo uyo bogobe-nulu, ‘God imi ifin am daanbu uyo, ibo tinum mafak umobip iyo telela imkamin o,’ agesu bele ki, agesaalu o?” agela e, 4iyo weng umaak bogobelin-tem kelip ko. Kale Yesus iyo tinum mafak umosa iyo aafuu telela do-nala e, daala ilami am iina ko. 5Kale Yesus iyo kamogimal imi bogobe-nala e, “Ibaa. God imi ifin am daanbu uyo, tinum ibo kapmi man min, kao min umaak kumen ok kumun tem una umdii, kabo maak fagalin tap kapmi man min, kong min beyo dep mitam daalan-temap bele ki, dupkalan-temap o?” agela e, 6Falosi iyo bagang-kaleta imi weng uyo yan kepmomip binim kelip ko.

Yesus imi bogo-nala, “Ilipmi win uyo kufumin ba kale, ipmi win boyo afak tem kal bom-buluta o,” agesa uta ko

Mat 23:6

7Kale Yesus iyo utamata e, tinum iyo afeta-bom, iman bo unan-kulum o age tal abe mitam am tele-bom-nilip e, kanu-bulupta, unang tinum iyo itamin o age-nilipta, abiin miton umi fen tal tonamip kalaa age-nala e, kota tinum kutam albip imi do weng maak bogobe-nala e, 8“Tinum iyo dok ita, unang kulan o age kapmi olapke-nala, ‘Talapta, iman tigi-bom unan-bom deng tebemum o,’ agela no abe tam am unap umdii, kabo tam abiin miton uyo tonamin ba ko. Kale kabo win binim kale minte, tinum win so maak tolon-tema uyo, tinum, unang kulan o agan-be beyo imi olabe-nala e, ‘Kabo tal abiin miton kagal tonal o,’ age-nala e, 9dep tal bogopke-nala e, ‘Kabaa. Daak abiin miton boyo kabo kupkaa tinum win so kemi kobe o,’ agelan-tema kota, kabo unanbu yang daang tem kugol ton-nalapta, fitom tebep-kaman-temu ko. 10Kale minte tinum iyo maak olapke-nala, ‘Talapta, iman tigi-bom unan-kulum o,’ agela unap umdii, no abe unanbu yang magaang tem kugol tonamin ko. Kanupman-temap kota, tinum olapkeba beyo tal bogopke-nala e, ‘Nugum kabaa. Tal abiin miton kagal tonal o,’ agelan-tema kota, alugum kutam albip iyo utamipta e, kabo win so kelap kalaa age-nilip e, kapmi win uyo kufukeman-temip ko. 11Ulutap kale, tinum iyo dok ita ilimi win uyo kufumip umdii, biilan-temu uyo, God iyo bogobe-nala, ‘Nimi tiin diim uyo kanupmin tinum ibo kubaganip win binim o,’ agelan-tema kale minte, tinum iyo dok ita ilimi win uyo kufumin binim kemip umdii, biilan-temu uyo, God iyo kanupmin tinum bilip imi win uyo kufu-e-bom bogobe-nala, ‘Nimi tiin diim uyo ibo kwiin kiim o,’ agelan-tema o,” age Yesus iyo baga-ema ko.

Yesus imi tebe kapmi tinum olapmap tilip iman unan-kalin kuguup umi sang bogosa uta ko

12Kale Yesus iyo kam age-nala e, fupkela tinum olapma tal tama iman unan-bilip bemi bogobe-nala e, “Kabo iman tigimap umdii, kapmi aget fugunin uyo, ‘Nugumal bilip iyo olabeli tal nimi iman uyo une-nilipta, isiik nimi iman bo yan kepnelin o,’ age-nalapta, kapmi duup-afin sino kapmi abiip kasel mufekmufek so kasel so ita olemin ba kale, kanubelap umdii, tinum kulip ita kup kapmi iman umi yan uyo kepkelan-temip ko. 13Boyo kanumin ba kale, kabo iman tigimap umdii, kabo ki bulup man so tinum ibiit sino tinum yaan ugum sino tinum tiin mafak sino bilip ita olapmap tal iman unan-kalin o ageta kale, 14unelan-temip kuta, kanupmin bilip iyo kapmi iman boyo yan kepke-nimip binim kale, son-temu nala tol tinum kaansip bilip imi fen tigi molan-temip kota, God iyo kapmi kuguup tambal kafin diim komi kanumsap uyo yan kepkelata, kota deng kup tebeman-temap o,” age Yesus iyo bogobela ko.

Yesus imi felep yak iman tigimin umi diim to do weng bogosa uta ko

Mat 22:1-10; Luk 13:29

15Kale tinum Yesus so iman unan-bilip ilimi iibak tem kulagal tinum maak iyo Yesus imi weng uyo tinangku-nala e, bogopma, “Kamogim kabaa. Biilan-temu kutop uyo tinum iyo God imi abiip no tama God imi iman tigi-bala unelan-tema uyo, tinum beyo deng kup tebeman-tema o,” agela e minte, 16Yesus isiik do weng maak bogobela, “Tam tinum maak, iman tigiman o age-nala e, unang tinum kwiin tagang iyo bogobe-nala e, ‘Am kanupmin diim kota tilin o,’ agela ko. 17Kale agela bo nala e, utamata, kota iman unan-kalin am uyo daanu kalaa age-nalata, ilami ogok kemin tinum maak asok daala no tinum siin bogobeba iyo no bogobe-nala e, ‘Ibaa. Kota unan-kalin uyo kan kelu kale, tilin o,’ agela kuta, 18tinum alugum imi aget fugunin uyo, iman boyo falalum o age-nilipta, bisop baga-e-bom-nilip e, tinum maak iyo bogobela, ‘Niyo iman ilang maak mobi kale, no utam-nilita o ageta kale, niyo no tolon-temaali umaak tap kale, bogobelal o,’ agela e, 19tinum maak iyo bogobela, ‘Nimi ting kulupne telemin o age-nilita, kao nagaal kal maak mobi kale, no im-kugu-nilita o ageta kale, niyo no tolon-temaali umaak tap kale, bogobelal o,’ agela e, 20tinum maak iyo bogobela, ‘Niyo unang maak kamaa kubi kale, no tolon-temaali o,’ agela no kemip ko.

21“Kale tinum bilip iyo kam agelip kalaa age-nala e, asok ogok kemin tinum beyo tal ilami kamogim iyo tinum bilip imi weng uyo bogobela e, kamogim iyo tinum bilip imi olsak uyo kobe-nala e, ilami ogok kemin tinum beyo bogobela, ‘Kabo yuut no abiip umi ilep kiim sino minte ilep kangkang sino ku-tele tiine-bom-nalapta, bulup man sino tinum ibiit sino tinum yaan ugum sino tinum tiin mafak sino iyo afeta-bii kulep tal tolap iman koyo unan-kalin o,’ agela ko. 22Kale kamogim imi ogok kemin tinum beyo kanube-nalata, yuut tal ilami kamogim iyo bogobela ko. ‘Kamogim kabaa. Niyo kapmi weng uyo tinangku-nilita, kanubeli kuta, am katam uyo abiin atuk uyo bisop albu o,’ agela e, 23tam kamogim iyo ilami ogok kemin tinum beyo bogobela ko. ‘Unang tinum ita tebe-nilipta, nimi am katam uyo mitam tilipta, dongenuk o agan-bii kale, kabo no ilanggiip ilep ku-tele no ilanggiip maak maak kugol unang tinum iyo afetam tiinan-bii asit kup biinga kulep tal nimi am tolap iman unan-kalin o,’ age-nala e minte, 24fupkela unang tinum ilami am kutam albip imi bogobe-nala e, ‘Niyo mangkal ninggil ibo weng maak bogobelan o ageta kale, siin unang tinum imi bogobe-nili, “Tilipta, nimi am kagal nisino iman unan-kulum o,” ageli kupka-silip ita nimi iman koyo unelan-temaalip binim kale minte, unang tinum tal nimi am talbip ipta nimi iman uyo unelan-temip o,’ agela o,” age Yesus iyo unang tinum son-temu nala no God imi abiip iman unan-kalon-temip imi sang uta felep yak ku to do weng uyo baga-ema ko.

Yesus imi bogo-nala, “Kabo kamaa kagal tele aget fuguno-nalapta, meng nimi okumop man kelal o,” agesa uta ko

Mat 10:37-39; Mat 16:24-26; Luk 9:23, 18:28-30

25Am maak daanu e, unang tinum kwiin tagang iyo Yesus sino ilep abe-bom-nilip e, Yesus iyo fupkela kek fen-nala e, unang tinum iyo bogopma, 26“Kabo, meng nimi ogok uyo waafulan o agelap umdii, tele aget fuguno-nalapta o ageta ko. Kale kabo nimi ilak dugamin uta kwiin kiim keluta minte, kapmi kogen kaalap imi ilak dugamin min, kalel umi ilak dugamin min, man isak atuk imi ilak dugamin min, kalapmi kaal ilak dugamin min boyo kubaganuta, nimi ilak dugamin bota kwiin kiim keluk o ageta ko. Kale kabo kulip iyo imkaa meng nimi miit tem e tolom nimi ogok uta kemap umdii, kabo nimi okumop man kelan-temap ko. 27Kale dogap kapta, nimi tinum kelan o agelap kuta, nimi kaal fuyap at diim kal kulan-temi ulutap ke, ‘Ku-nimi bole, ku-nimi o,’ agelin-tem ke-bom-nalap e minte, nimi daang begepne nimi bogo-nili, ‘Bota kanumal o,’ agan-bii uyo waafulin-tem ke-bom no kemap umdii, kabo dogobeta nimi tinum kelan-temaalap binim ko. (Kuta minte kabo boyo alugum kanumap umdii, bota kabo nimi tinum kelan-temap ko.)

28“Kabo, nimi ogok uyo waafulan o agelap umdii, kamaki uyo bong fagamin kwek umi aget uyo tele fuguno-nalapta, meng nimi ogok uyo waafuu o ageta kale, do weng bogolan-temi koyo tebe ipmi aget fugunin uyo bam daa imolan-temu kale, ibo tele tolong do-silipta. Tinum ibo dok ita maak, am kwiin kiim maak de kolan o agela umdii, kamaki uyo ton-bom tuumon uyo tiki utamata e, am bomi kun uyo tii kalaa minte, tii ba kalaa agelan-tema kale minte, 29boyo kanupmin-tem kela umdii, am kun uta kup moli tuumon uyo binimanu kalaa age kupkalan-tema uyo, alugum unang tinum iyo utam-nilip e, aban dii-e-bom titul weng baga-e-bom no ke-bom-nilip e, 30‘Tinum beyo atamin. Beyo, am kwiin kiim uyo dinan-kalon-temi o age dinan-nak-be kuta, tuumon uyo binimanebebu kale, am uyo de ko binimanu kupkalan-temaala o,’ agan-kalon-temip ko.

31“Ulutap kale, kamogim iyo maak tolong dolata e, tinum iyo bogo-nilip, ‘Waasi ilimi kamok so minte ilami tinum ilimi kup twenti tausen (20,000) isino iyo tal, numi kamogim so dinan-kulum o age talan-bilip o,’ agelip kalaa agela umdii, yagal ilami aget fugunin uyo tambaliim telela kolin-tem ke-nala e, tinum ilimi kup ten tausen (10,000) ita kup dulep no tama isino dinan-kalon-temip bele ki? Umbae. Kamaki uyo yagal ton-bom aget fugun-bomta e, ilami tinum iso minte yagal no iyo tii waasi imi kamogim isino imi dinan-kalin tinum sino dinan-kalon-temup uyo, nuta nuta kelan-temup kalaa age-nalata, telela kolan-tema ko. 32Minte iyo utamata, nuyo tii ba kalaa agelan-tema uyo, utamata e, waasi iyo simanim kugol talan-bilip kalaa agon-tema uyo, ilami kalaan weng kwep unemin tinum ita imdala no waasi imi kamok iyo bogobe-nilip e, ‘Kabaa. Numi kamogim iyo imdala tal bogopke-nulup, “Dinan-kalon-temaalup kale, weng uta kup telela-nulupta, kupkalum o,” agelata, tulup o,’ agelan-temip ko.

33“Ulutap kale, kabo, meng nimi ogok waafulan o agelap uyo, kamaki uyo tele aget fuguno-nalapta. Kapmi mufekmufek so kapkumal sino iyo alugum imkaa meng-nalap nimi miit tem e tilin-tem kelap umdii, kabo nimi okumop man kelan-temaalap o,” age bogobela ko.

Yesus imi felep yak yol umi diim to do weng bogosa uta ko

Mat 5:13; Mak 9:50

34Yesus iyo do weng maak bogo-nala e, tam bogola, “Yol boyo mufekmufek tambal abalim tebesu kuta, kanube yol uyo abaal tebelin binim kelu umdii, dogobeta telela kolupta, yol bomi abaal uyo tabon-temu a? Boyo atin binim ko. 35Kale yol abaal binim kesu boyo kwaalip daak kafin tambal diim abelan-temu uyo, yol boyo tebe kafin tambal uyo kufak daalu ason san uyo tebelan-temaalu kale, kwaalip yang iinon-temu o,” age-nala e minte, bogola, “Ipkil tolong sino kale, nimi weng ko bagan-bii koyo tele tolong dolin o,” age baga-ema ko.

God Imi Weng

© 1988, Wycliffe Bible Translators, Inc. All rights reserved. More Info | Version Index