Search form

Rom 6

Nuyo Yesus imi kaan-se ulutap ke-sulup uta ko

Ef 2:1-10; Kol 2:11-15, 2:20–3:4; 1 Fit 2:24

1Kale agesu kale, intaben o agelan-temup? Bogo-nulup, “God imi i-filinin uyo uta uta kemin kale, nuyo fengmin kup ke-bulupta, God iyo atin nuyo i-filin daalak o,” agelan-temup a? 2Umbae. Nuyo tinum kaana ilami fengmin umi kupkaa uneba ulutap ke fengmin umi mok unan-kalin uyo kupka-sulup kale, intaben o ageta kamano koyo nuyo fengmin uyo waafulin kup ke-bulup a? 3Kale numi ok sam ugo-sulup boyo ki, Yesus Krais imi win tolop diim uta ok sam bo ugo-sulup kale, ko kanube-sulup kota, God imi tiin diim uyo nuso Krais sino maagup kaanabup ulutap ke-nulupta, ok sam uyo ugo-sulup kale, ibo boyo utamsaalip aga? 4Kale numi ok sam ugo-sulup kwek uyo ki, Yesus Krais imi kaana duba-silip ulutap kelupta, God iyo nuso Yesus Krais so nuyo imdep daak kafin tem imala albip ulutap ke-se kale, Aalap ilami titil afek uta ku-nalata, Krais iyo dufo-se kale, ulutap nugol mungkup kota telela imolata, mitamta kamaa unang tinum ke-sulup ko.

Numi Yesus imi diim feba mitam suun nin unang tinum ke-sulup uta ko

Ef 2:1-10; Kol 2:11-15, 2:20–3:4; 1 Fit 2:24

5Kale Krais iyo maak fenga kosaala kale, nugol mungkup yak imi diim kal feba-nulupta, tinum kaan-nala ilami fengmin umi kupkaa uneba ulutap ke-sulup kale, ulutap mungkup son-temu nala uyo yak imi diim kal feba-nulupta, asok imi kanube fen-se ulutap kelan-temup ko. 6-7Kale nugol utamsup kale, Krais bemi at diim angkolip kaan-se ulutap kale, numi siin kuguup uyo God iyo tebe ungkwala kaanuta, fengmin numi diim albu umi titil uyo binimanu kupka-se ko. Kale tinum kaana iyo dogobeta fengmin uyo asok maak so fengaman-temaala kale, nuyo fengmin umi ogok uyo maak so waafunamin ba kale, kupkalum o ageta ko.

8Nuyo utamupta, Krais imi kaan-se ulutap ke-sulup kalaa agelup umdii, nugol mungkup tele utamupta, nuyo waalan-nulupta, Krais iso nan-temup kalaa agelan-temup ko. 9Kale nugol utamsup kale, Krais iyo asok mitam fen-se kale, kaanamin boyo maak so titil fagaa daak tamalan-temaalu e minte, beyo asok maak so kaanan-temaala kale, 10Krais iyo ilep maagup bota kup fagaa kaanata, tii ke-suu kale, ko kaan-se kota, fengmin umi titil uyo kulupma unu kupkaa mitam fen waalan-nalata, tam iin-se kale, kamano komi Yesus imi tiinan-be tonan-be uyo God imi ogok uyo tubu-bom ogok ke-balata, God iyo Yesus imi deng uyo taban-be kale, 11ulutap kale, bogobelan-temi koyo ipkil aget fugunolin. Ibo tinum kaana ilami fengmin umi kupkaa uneba ulutap kesip kale, fengmin umi titil uyo bagang-kale maak so ibo imdaak tama-numu binim kale, ibo, yak Yesus Krais imi diim kal febata waalan-nulupta, ogok ke-bulupta, God iyo numi deng uyo tebemak o age-nilipta, God imi ogok uyo ke-bilip ko.

12Kale kanube fengmin uyo tebe ipmi dam kaanamin uyo bogobe-nulu, “Boyo kanumal o,” agelu umdii, ibo boyo kanumin ba e minte, fengmin uyo tebe-nulu ibo imtamo yang daalu ibo aget fugunin mafak umi tebe-nulu, bota kanubelin o agelu uta kup abo dulu-nilip e, yang tem diinan-temip kale, utama-bom-nilipta o ageta ko. 13Kale ibo tinum kaana dubalip asok fen mitam tigi mo alba ilatap kesip kale, ipmi yaan aa sagaal aa uyo kulep yang kuguup mafak umi diim uyo tolip fengmin ba kale, alugum ipmi dam kuso aget fugunin kuso uyo kulep yak God imi diim tolipta, ipmi yaan aa sagaal aa boyo kuguup tambal uta kup ke-buluta o ageta ko. 14Kale ibo Moses imi ulo umi diim kal albaalip kale, ibo God imi i-filinin umi diim kal albip kale, ibo tebe-nilip kupkalip fengmin uyo tebe ibo de imkamin ba ko.

Fol imi bogo-nala, “Nuyo kuguup tambal umi ogok tubulin tinum o,” agesa uta ko

Jon 8:34-36; 2 Fit 2:19; 1 Jon 3:3-10

15Kale kanubelu umdii, nuyo dogonubelan-temup a? Nuyo ulo uyo kupka-nulupta, God imi i-filinin umi diim kal nup kalaa age-nulupta, bota nuyo felepmu fengmum a? Umbae. 16Ibo utamsaalip a? Kanube nuyo yak tinum kamok maak imi sagaal diim abelup tiin mola imi weng uta kup waafuu kwep tubup umdii, nuyo tinum bemi sok de imola tinum maak imi bisop ogok ke-emin unang tinum kelan-temup kale, ulutap kale, utamin. Ibo fengmin umi weng uyo waafuu kwep tibip umdii, fengmin boyo tebe ibo sok de imolin kelu fengmin bomi yuum uyo ku-nilip kaanan-temip kale, mungkup ibo God imi weng uyo waafulip umdii, ibo tol kuguup uta kup waafuu kwep tabon-temip ko. 17Kale siin bole fengmin uyo tebe ibo sok de imolin kelu umi ogok uyo bisop waafu-bii-silip kuta, kamaa kota God iyo ilami weng uyo kwaala yak ipmi diim uyo abelu atin waafu-silip kale, boyo ipso niso nugol God iyo, “Misam o,” agan-bom-nulupta o ageta kale, 18ibo kuguup mafak umi ogok kemin unang tinum kesip kuta, fengmin tebe ipmi sok de imolin kesu uyo God iyo tebe talaa imda-nalata, imdep yak tol kuguup umi diim daalata, ibo tol kuguup umi ogok kemin unang tinum ke-silip ko. 19Kale ipmi aget fugunin uyo titil fagalin-tem albu kalaa age-nilita, tinum nulumi kuguup sang uta ibo baga-e-bii kale, siin uyo ipmi yaan aa sagaal aa uyo kwaalip yak fengmin diim abelu sa daga-bom kuguup mafak mafak uyo ke-bom kem-nuubip kuta, kamano koyo ipmi yaan aa sagaal aa uyo kwaalip yak kuguup tambal diim abelu uta kup waafuu kwep tebe-bom-nilipta, God imi man aligaap kelin o ageta ko.

20Kale siin uyo fengmin tebe ibo sok de imolin kelu kuguup mafak uyo waafu-bii-silip kota, ipmi aget uyo fugun-bom-nilipta, “Nuyo kuguup tambal uyo suun kup waafulum o,” agan-biisaalip kuta, 21kamano koyo ipmi siin kuguup bomi fitom uyo tebebebu kale, ibo bomi tem ku-tele intaben intaben mufekmufek tambal umaak ku-silip a? Umbae. Bo binim kale, kuguup boyo atin kaanamin umi kuguup kwep mitam daagamin umi kuguup uta kulbu kale minte, 22Ipmi fengmin tebe sok de imolin kesu uyo God ita tebe talaa imdalata, ibo ilami ogok tubulin unang tinum kelipta, God iyo dong dogobelata, ibo God imi man aligaap ke-nilipta, suun nin unang tinum ke-silip ko. 23Kale fengmin bota tebe ulumi ogok tubulin unang tinum bilip imi ogok umi kun uyo kupka-em-nuubu kale, bomi kun uyo atin kaanamin bota kuta, God imi kuguup tambal numi misiim kupka-em-nuuba uyo ki, yak Yesus Krais imi diim febalup yagal mitam numi Kamogim ke-nala tebe telela imo-se kale, son-temu uyo, imdep meng daalata, iso suun kup nan-temup ko.

God Imi Weng

© 1988, Wycliffe Bible Translators, Inc. All rights reserved. More Info | Version Index