Search form

Matalikilo 1

Leza mbwaakalenga julu a nyika

1Kumatalikilo Leza wakalenga julu anyika. 2Lino nyika tiiyakajisi ciimo cabubumbe alimwi tiiyakajisi cintu pe. Mudima wakavumbide maanzi manji, alimwi Muuya wa Leza wakali kweendeenda atala aamaanzi. 3Eelyo Leza wakati, «Akusalale.» Mpoonya kwakasalala ncobeni. 4Nkabela Leza wakabona kusalala ooku kuti nkubotu. Mpawo wakaandaanya kusalala kuzwa kumudima. 5Kusalala wakakuulika kuti, «Sikati,» mudima wakuuulika kuti, «Masiku.» Eelyo kwakaba masiku alimwi kwakaba sikati, oobu mbobuzuba bwakusaanguna.

6Lino Leza wakati, «Akube mweenya uuvungumene kuti waandaanye maanzi kuzwa kumaanzinyina.» Mpawo kwakacitika mbubonya oobo. 7Aboobo Leza wakacita mweenya uuvungumene, eelyo wakaandaanya maanzi aakali kunsi lyawo kuzwa kumaanzi aakali atala lyawo, nkabela kwakaba mbubonya oobo. 8Mweenya ooyu Leza wakuuulika kuti, «Julu.» Eelyo kwakaba masiku alimwi kwakaba sikati, oobu mbobuzuba bwabili.

9Lino Leza wakati, «Maanzi aali kunsi lyamweenya ooyu abungane antoomwe kutegwa insi njumu ilibonye.» Nkabela kwakaba mbubonya oobo. 10Insi njumu Leza wakiiulika kuti, «Nyika,» alimwi maanzi aakabungana wakaaulika kuti, «Lwizi.» Lino naakalanga mulimo ngwaakacita, wakabona kuti mmubotu. 11Eelyo Leza wakati, «Anyika akumene zisyango zizyala nseke alimwi amisamu iizyala micelo iijisi nseke, mbubonya mbuli misyobo yayo.» Nkabela kwakaba mbubonya oobo. 12Aboobo nyika yakamena zisyango zizyala nseke amisamu iizyala micelo iijisi nseke mukati mbubonya mbuli misyobo yayo. Mpoonya Leza wakabona kuti ncibotu. 13Eelyo kwakaba masiku alimwi kwakaba sikati, oobu mbobuzuba bwatatu.

14Lino Leza wakati, «Akube mimuni mumweenya wakujulu uuvungumene kuti yaandaanye sikati kuzwa kumasiku, akutondezya ziindi zyamazuba, aziindi zyamwaka. 15Mimuni eeyo ikkale mujulu akumunikila nyika.» Mpoonya kwakaba mbubonya oobo. 16Aboobo Leza wakalenga mimuni mipati yobilo, izuba kulela sikati, awalo mwezi kulela masiku, alimwi wakalenga anyenyezi. 17Eeyi mimuni wakiibikka mujulu kuti kiimunikila nyika 18akulela sikati amasiku, alimwi akwaandaanya mumuni kuzwa kumudima. Nkabela Leza wakabona kuti ncibotu. 19Eelyo kwakaba masiku alimwi kwakaba sikati oobu mbobuzuba bwane.

20Lino Leza wakati, «Mumaanzi amube makamu manji aamisyobo yazintu zyoonse zipona, abalo bayuni bauluke muluuwo.» 21Aboobo Leza wakalenga banyama bapati bayoosya bamumaanzi, azintu zyoonse zipona mumaanzi, eezyo zyakavula mbuli mumisyobo yazyo. Alimwi bayuni bamuluuwo, amisyobo yoonse yazintu zimwi zyuuluka azyalo zyakavuzyanya mbuli mumisyobo yazyo. Lino Leza wakabona kuti ncibotu. 22Nkabela Leza wakazileleka akuti, «Zintu zyoonse zyamumaanzi azizyalane akuzuzya lwizi, abalo bayuni bavule munyika.» 23Eelyo kwakaba masiku alimwi kwakaba sikati, oobu mbobuzuba bwasanu.

24Lino Leza wakati, «Amwalo munyika amube zyuumi, cimwi acimwi mbuli musyobo waco, banyama boonse bavubwa, zintu zikalaba, banyama bapati abaniini bamusokwe.» Nkabela kwakaba mbubonya oobo. 25Aboobo wakalenga misyobo yoonse yabanyama bavubwa, misyobo yoonse yabanyama bapati abaniini bamusokwe alimwi azikalaba zyoonse. Nkabela wakabona kuti ncibotu.

26Lino Leza wakati, «Atulenge muntu mucikozyanyo cesu, abe mbubonya mbuli ndiswe. Bakabe abwami bwakweendelezya nswi zyamumaanzi, bayuni bamuluuwo, banyama bavubwa, banyama boonse bapati abaniini bamusokwe, alimwi azyoonse zikalaba.» 27Aboobo Leza wakalenga muntu. Ooyo muntu wakalengwa mucikozyanyo cakwe mwini Leza. Wakalenga mwaalumi amukaintu. 28Nkabela Leza wakabaleleka wakati, «Amuzyalane, mukavuzyanye cakuti mukazuzye nyika yoonse akwiiendelezya. Ndamupa bwami bwakweendelezya nswi zyamumaanzi, abayuni bamuluuwo, alimwi abanyama boonse nibali buti.»

29Alimwi Leza wakaambila muntu wakati, «Ncobeni ndakupa misyobo yoonse yazisyango zizyala nseke amisyobo yoonse yamisamu iizyala micelo, kuti zikabe cakulya cako. 30Alimwi kubanyama boonse bapati abaniini, kubayuni boonse, akuzintu zikalaba kufumbwa cintu cili aabuumi muli ncico, ndapa kuti kazilya matu abwizu, cikabe ncecakulya cazyo.» Nkabela kwakaba mbubonya oobo. 31Leza wakabona zintu zyoonse zyaakalenga, nkabela zyakali zibotu kapati. Eelyo kwakaba masiku alimwi kwakaba sikati, oobu mbobuzuba bwacisambomwe.