Search form

Kulonga 1

Ba-Israyeli mbubakavula ku-Egepita

1-Ngaaya mazina aabana ba-Israyeli ibakeza ku-Egepita a-Jakobo, umwi aumwi aciinga cakwe: 2Rubeni, Simeoni, Levi, a-Juda, 3Isakara, Zebuloni, a-Benjamini, 4Dani, a-Nafitali, Gadi, a-Aseri. 5-Bantu aba boonse ibakazwa mucikungu ca-Jakobo bakali makumi aali musanu aabili, nkaambo Josefa kali kale mu-Egepita. 6-Lino Josefa wakafwa, abakulana bakwe boonse, abamusdanyina boonse. 7-Pele bana ba-Israydi bakazyalisya akuvulisya, bakaba banji akujata inguzu loko loko, mane nyika yakazula mbabo.

8-Lino kwakabuka mwami mupya mu-Egepita iwatakezi Josefa. 9-Oyu wakaambila bantu bakwe kuti, Amubone! Bantu babana ba-Israydi mbanji, alimwi mbayumu kwiinda ndiswe, 10-Atubacitile camaanu, nkaambo na kabaciya buvula, ambweni tulasikilwa inkondo, lino abalo bayoosangana abasinkondoma, bayootulwisya, bayooloboka kuzwa mucisi cesu. 11-Nkaambo kako bakababikila basikubabelesya cibbalo, kuti babapenzye amikuli, nkabela bakayakila Farao minzi yazilondwedo, Pitomu a-Ramese. 12Pele nebakainda kubapenzya, balo bakainda kuzyalisya akuvula. Aboobo bakali kubayoowa loko. 13Lino ba-Egepita bakabelesya bana ba-Israyeli milimo yalunya. 14-Bakaminya buumi bwabo amilimo miyumu yabulongo ayazitina amilimo yoonse yamyuunda. Mumilimo yoonse njibakali kumana, bakali kubabelesya calunya.

15Lino mwami wa-Egepita wakaambila basikutumbusya ba-Hebrayo. Izina lyaumwi kali Sifra aumwi kali Puwa. 16Wakati, Mwatumbusya banakazi ba-Hebrayo, mwababona azitumbukilo, na ngumulombe muleelede kumujaya, pele na musimbi, mumuleke apone. 17-Nekubaboobo basikutumbusya bakayoowa Leza, teebakacita mwami wa-Egepita mbwaakabalailila, bakali kufutusya balombe. 18Elyo mwami wa-Egepita wakaita basikutumbusya, wabaambila kuti, Ino nkaambonzi nemwacita obo? Nkaambonzi mwafutula bana balombe? 19-Basikutumbusya bakavwiila Farao kuti, Nkaambo kakuti banakazi ba-Hebrayo tabali mbuli banakazi baEgepita pe. Balafwamba kutumbuka, sikutumbusya katana kunjila mobabede. 20-Nkabela Leza wakacitila basikutumbusya kabotu, abalo bantu bakavulisya akujata inguzu loko. 21-Alimwi basikutumbusya mbubakali kuyoowa Leza, wakabacitila inzubo. 22-Lino Farao wakalailila bantu bakwe boonse kuti, Boonse balombe bazyalwa amubawaale mulwizi, basimbi boonse amubafutule.