Search form

Kulonga 13

Imwi milao yabana bataanzi ayazinkwa zitakwe bumena

1Lino Jehova wakaambila Musa kuti, 2-Undisalazizye mwana umwi aumwi mutaanzi uujalula mulyango wazyalilo akati kabana ba-Israyeli, naba muntu naba munyama. Boonse buyo babe bangu.

3-Nkabela Musa wakaambila bantu kuti, Amwiingasile buzuba obuno nemwazwa mu-Egepita kuzwa muŋanda yabuzike, nkaambo kunguzu zyajanza lyakwe Jehova wamupozya mucisi eci. Kutaligwi zinkwa zili abumena. 4-Buzuba obuno bwamumwezi wa-Abibi mwazwa. 5Lino Jehova naayoomusisya kunyika yaba-Kanana ayaba-Hiti ayaba-Amori ayabaHivi ayaba-Jebusi, nyika njindakasyomezya kulibamauso kumupa, nyika iikunka malili abuci, muleelede kubamba milimo eyi mumwezi uno. 6-Mazuba aali musanu aabili muleelede kulya zinkwa zitakwe bumena, lino mubuzuba bwamusanu aabili kuyooba ipobwe lya-Jehova. 7Zinkwa zitakwe bumena nzezyeelede kuligwa mazuba aali musanu aabili; takweelede kubonwa zinkwa zili abumena akati kanu; takweelede kubonwa bumena mucisi canu coonse. 8-Elyo mubuzuba obo uleelede kupandulwida mwana wako kuti, Nkaambo kaceeco Jehova ncaakandicitila nendakazwa ku-Egepita. 9-Ciyoomubeda mbuli citondezyo cakujanza lyako na mbuli ciibalusyo akati kameso aako, kuti mulao wa-Jehova ube mukanwa lyako, nkaambo Jehova wakamupozya kuzwa ku-Egepita ajanza ijumu. 10Nkaambo kako uleelede kubamba ciyanza eci kuciindi ceelede myaka yoonse.

11-Alimwi Jehova naayoomusisya kunyika yaba-Kanana mbubonya mbwaakasyomezya kulibamauso, akwiipa nduwe, 12-uleelede kulondweda Jehova kufumbwa uujalula izyalilo. Boonse bataanzi kuzyalwa baŋombe zyako, nkokuti bapoho, bayooba ba-Jehova. 13-Amutaanzi umwi aumwi wambongolo uleelede kumununuzya kabelele; watamununuzya uleelede kutyola insingo yakwe. Abalo bataanzi babana bako balombe uleelede kubanununa. 14-Lino kuciindi ciboola, mwanaako aakubuzya kuti, Nkutyeni eci? uleelede kumwaambila kuti, Kunguzu zyajanza lyakwe Jehova wakatupozya kuzwa ku-Egepita kuŋanda yabuzike. 15Nkaambo Farao naakaliyumya kukutukasya kuya, Jehova wakajaya bana bataanzi boonse bamucisi ca-Egepita, bana bataanzi babantu abana bataanzi baŋombe. Nkaambo kako ndapaizizya Jehova boonse baalumi bajalula izyalilo, pele boonse bataanzi akati kabana bangu ndabanununa. 16-Eci ciyanza cibe mbuli citondezyo cakujanza lyako na mbuli ciibalusyo akati kameso aako, nkaambo kunguzu zyajanza lyakwe Jehova wakatupozya kuzwa ku-Egepita.

Leza mbwaakapozya ba-Israyeli kuzwa ku-Egepita

17-Lino Farao naakaleka bantu kuti baye, Leza takwakabeenzya kunzila yakwiinda kucisi caba-Filisti, nekuba kuti yakali kukosola, nkaambo Leza wakati, Na bantu babona inkondo, ambweni balatama akupiluka ku-Egepita. 18-Leza wakeenzya bantu munzila iizyunguluka kunkanda ku-Lwizi Lusalala, Nkabela bana ba-Israyeli bakazwa kunyika ya-Egepita balilibambide kunkondo. 19-Alimwi Musa wakatolelela zifuwa zya-Josefa, nkaambo Josefa wakakonkezya loko bana ba-Israyeli, wati, Ncobeni Leza uyoomuswaya; lino muleelede kutolelela zifuwa zyangu kuzwa okuno. 20-Elyo bakalonga kuzwa ku-Sukoti, baakukala-kala ku-Etamu kumagolelo nankanda. 21-Nkabela Jehova wakali kubazulwida isikati amusumpululu wajoba kuti abatondezye inzila, amasiku amusumpululu wamulilo kuti abamunikile, kuti kabeenda amasiku asikati. 22-Taakwe naakabanyanzya musumpululu wajoba wasikati nuuba musumpululu wamulilo wamasiku.