Search form

Kulonga 14

Leza mbwaakavuna ba-Israyeli ku-Lwizi Lusalala

1Mpoonya awo Jehova wakaambila Musa kuti, 2-Ambila bana baIsrayeli kuti bapiluke, bayake zilao zyabo kunembo lya-Pihahiroti, akatikati ka-Migidoli alwizi kunembo lya-Baala-Zefoni. Amuyake zilao zyanu nkukonya oko kumbali lyalwizi. 3-Nkaambo Farao ulaamba aabana ba-Israyeli kuti, Balipatide munyika eyo; inkanda yabajalila. 4-Lino ndayumya moyo wa-Farao, nkabela ulabatobela; lino njoojana bulemu kuli-Farao akumpi yakwe yoonse, nkabela ba-Egepita bayooziba kuti ndime Jehova. Elyo bakacita obo.

5Lino mwami wa-Egepita naakalwiidwa kuti bantu baloboka, moyo wa-Farao abalanda bakwe wakasandukila bantu. Bakati, Ma! Twacitanzi? Twalekelanzi ba-Israyeli kuti batanoocitumanina milimo? 6Mpawo wakabopa inkalaki yakwe, abalo bantu bakwe wakabatolelela. 7Wakatola inkalaki zisalidwe zili myanda iili musanu aumwi, ankalaki zyoonse zyaku-Egepita, abasilutwe bazyo boonse. 8-Jehova wakayumya moyo wa-Farao mwami wa-Egepita, aboobo wakatobela bana ba-Israyeli, nkaambo ba-Israyeli bakali kuya ajanza ijumu. 9-Ba-Egepita bakabatobela, imbizi zyoonse zya-Farao ankalaki zyakwe abasimbizi bampi yakwe, babeenzya kulwizi nkubakayakide zilao, ku-Pihahiroti kunembo lya-Baala-Zefoni.

10-Lino Farao naakasika afwaafwi, bana ba-Israyeli bakatambya meso aabo, babona kuti ba-Egepita beza bubatobela. Mpawo bana ba-Israyeli bakayoowa loko, akukwiilila Jehova. 11-Nkabela bakaambila Musa kuti, Sa taakwe tubanda ku-Egepita? Watuletelanzi okuno kuti tufwe munkanda? Watugwisizyanzi ku-Egepita? 12-Sa teensi ngemakani aya ngaonya ngetwakakwaambila ku-Egepita? Sa teetwakaamba kuti, Tuleke, tubelekele baEgepita? Nkaambo kubelekela ba-Egepita nkubotu kulindiswe kwiinda kufwa munkanda. 13-Pele Musa wakaambila bantu kuti, Mutayoowi, amwiime, mubone lufutuko Jehova ndwasi mucitile buzuba obuno, Aba ba-Egepita mbomubwene sunu tamukooyoobabona limbi. 14-Jehova ulamulwida. Nywebo amuumune buyo.

15Lino Jehova wakaambila Musa kuti, Ulandikwiililanzi? Ambila bana ba-Israyeli kuti baye kunembo. 16-Ayebo, sumpula musako wako, utandabike ijanza lyako atala alwizi, ulwaandule, kuti bana ba-Israyeli bainde anyika injumu akati kalwizi. 17-Lino mebo ndayumya myoyo yaba-Egepita, kuti babatobele, aboobo njoojana bulemu kuli-Farao akumpi yakwe yoonse, kunkalaki zyakwe akulibasimbizi bakwe, 18Nkabela ba-Egepita bayooziba kuti ndime Jehova nenjoolemekwa kuli-Farao akunkalaki zyakwe akuli basimbizi bakwe.

19-Mpawo angelo wa-Leza iwakali kuzulwida makamu aaba-Israyeli wakajokela musule lyabo. Awalo musumpululu wajoba wakazwa kunembo lyabo, waima musule lyabo, 20-weza akatikati lyamakamu aaba-Egepita amakamu aaba-Israyeli, nkabela kali ijoba amudima. Lino masiku akamana, nkabela masiku oonse inkamu ezi zyobile tazikwe nezyakaswanaana.

21-Elyo Musa wakatandabika ijanza lyakwe atala alwizi, nkabela masiku oonse Jehova wakapilusya maanzi aalwizi amuuwo muyumu wakujwe, mane kwakaboneka nyika injumu akati kalwizi, amaanzi akapambukana. 22-Lino bana ba-Israyeli bakainda akati kalwizi anyika injumu, amaanzi akababeda mbuli bulambo kululyo akucimwensi. 23Mpawo ba-Egepita bakabatobela, imbizi zyoonse zya-Farao ankalaki zyakwe abasimbizi bakwe, banjila mukati kalwizi. 24Lino kubucedo Jehova wakalanga makamu aaba-Egepita kuzwa kumusumpululu wajoba awamulilo, wapilinganya makamu oonse aabaEgepita. 25Nkabela wakaangatizya mavwili aankalaki zyabo, wazyeenzya cakusililika. Lino ba-Egepita bakaamba kuti, Atucije ba-Israyeli, nkaambo Jehova nguubalwida kuba-Egepita.

26Lino Jehova wakaambila Musa kuti, Tandabika ijanza lyako atala alwizi, kuti maanzi aboole aba-Egepita, ankalaki zyabo abasimbizi babo. 27-Elyo Musa wakatandabika ijanza lyakwe atala alwizi, nkabela izuba nelyakapasula, maanzi aalwizi akaswanaana mbuli mbwaakabede lyoonse, aboobo ba-Egepita mukucija kwabo bakanjila mulindulo, nkabela Jehova wakabatapwida mulwizi. 28-Maanzi akapi luka, avumba inkalaki abasimbizi ampi yoonse ya-Farao, iyakabatobede mulwizi. Teekwakasyaala naba omwe, 29-Pele bana ba-Israyeli bakeenda anyika injumu akati kalwizi, amaanzi akababeda bulambo kululyo akulumwensi. 30-Mbuboobu Jehova mbwaakafutula ba-Israyeli buzuba obo kuzwa kumaanza aaba-Egepita, Ba-Israyeli bakabona ba-Egepita bafwide ankomwe yalwizi. 31-Elyo ba-Israyeli nebakabona milimo mipati Jehova njaakacitila ba-Egepita, bantu bakayoowa Jehova akusyoma Jehova amulanda wakwe Musa.