Search form

Kulonga 15

Lwiimbo ba-Israyeli ndobakalumbya Jehova

1-Lino Musa abana ba-Israyeli bakaimbila Jehova olu lwiimbo lwakuti,

Ndaimbila Jehova, nkaambo ulisumpukide loko;

Imbizi asikwiitanta wabawaala boonse mulwizi.

2-Jehova ninguzu zyangu alwiimbo lwangu,

Waba lufutuko lwangu.

Ngonguwe Leza wangu, ndamutembaula:

Ngu-Leza wabamatata, ndamulemeka.

3-Jehova ngusilumamba,

Jehova ndizina lyakwe,

4Inkalaki zya-Farao ampi yakwe, zyoonse waziwaala mulwizi;

Abasilutwe bakwe basalidwe bainkila mumaanzi aamu-Lwizi Lusalala.

5Impwampwa yabamena,

Babbila mumaanzi malamfu mbuli ibbwe.

6-Ijanza lyako lyalulyo, O Jehova, ndidemu kunguzu;

Ijanza lyako ndendilyo, O Jehova, ndelityolaula basinkondonyoko.

7-Mubulemu bwako bupati ulazunda basikukulwisya,

Ula tuma bukali bwako, lino bulabatenta mbuli zisiko.

8-Kuyooya kwampemo zyako kwakalundika maanzi,

Lwizi lwakaima mbuli mulwi,

Impwampwa yakaandwa akati kalwizi.

9-Basinkondoma bakati, Mbatobele, nkabeenzye,

Nkajane cisaalo, moyo wangu ukakute kulimbabo.

Nsomone ipanga lyangu, ijanza lyangu libanyonyoone.

10Elyo wakaungya muuwo wako, alwizi lwakabamena,

Bakabbila mbuli ibbwe mumaanzi malamfu,

11-Nguni uuli mbuli nduwe, O Jehova, akati kamizimu?

Nguni uuli mbuli nduwe, mulemu kukusalala,

Uuyoosya mumilimo, uucita maleele?

12Wakatandabika ijanza lyako lyalulyo,

Elyo nyika yakabamena,

13-Muluzyalo lwako weenzya bantu mbowakanununa;

Munguzu zyako wabasisya kucikalilo cako cisalala,

14-Bamasi balimvwide, balakankama,

Bantu bakede mu-Filisitiya bajatwa macise,

15-Basilutwe ba-Edomu balayoowa,

Abalo bapati ba-Moabu kukankama kwabajaya,

Abantu boonse ba-Kanana balebuluka.

16-Bawidwa buyoofu abukandu,

Nkaambo kunguzu zyajanza lyako batontola mbuli ibbwe,

Mane bantu bako bakaindilile, O Jehova,

Mane bakaindilile bantu mbowakanununa.

17-Ulabaleta, ulabasimpika kucilundu calukono lwako,

Busena mbobambide kuti bube cikalilo cako,

Cikombelo, O Mwami, maanza aako ncaakacita.

18Jehova ngunooendelezya lyoonse alyoonse.

19Nkaambo imbizi zya-Farao, ankalaki zyakwe abasimbizi bakwe, nizyakanjila mulwizi, Jehova wakaboozya maanzi aalwizi alimbabo, pele bana ba-Israyeli bakeenda anyika injumu akati kalwizi. 20-Mpoonya awo Miriamu musinsimi, mucizi wa-Aroni, wakabweza insaka mujanza lyakwe, abanakazi boonse bakamutobela ansaka akuzyana. 21Nkabela Miriamu wakabatungila cakwaamba kuti,

Amwiimbile Jehova, nkaambo ulisumpukide loko,

Imbizi asikwiitanta waba wa ala boonse mulwizi,

Maanzi aahu-Mara mbaakalula

22Elyo Musa wakasungula ba-Israyeli kuzwa ku-Lwizi Lusalala, nkabela bakaya kunkanda ya-Suri, Lino bakeenda mazuba otatwe mu nkanda kabatajene maanzi, 23-Basike buyo ku-Mata, bakakacilwa kunywa maanzi aaku-Mara, nkaambo akalula. Nciceeco oko kuntu ncikwakaulikilwa kuti ngu-Mara. 24Elyo bantu bakatongaukila Musa cakwaamba kuti, Ino tunywe nzi? 25-Lino wakakwiilila Jehova, nkabela Jehova wakamutondezya musamu. Auwaale mumaanzi musamu, maanzi akabota. Lino nkukonya oko bakabikilwa mulao amulazyo. Wakabasunka, 26-wati, Ncobeni na ulaswiilila ijwi lya-Jehova Leza wako, akucita milimo iiluleme mumeso aakwe akuswiilila milazyo yakwe, akubamba imbeta zyakwe, nsikooyookuletela malwazi ayo ngendakabikila ba-Egepita, Nkaambo ndime Jehova uukuponya.

27-Mpoonya awo bakasika ku-Elimu. Oko bakajana zikala zyamaanzi zili ikumi azibili atukunka tuli makumi aali musanu aabili, Nkabela bakayaka zilao nkukonya oko kumaanzi.