Search form

Kulonga 16

Ba-Israyeli mbubakasaninwa Mana abakancele

1-Lino kuzwa ku-Elimu imbungano yoonse yabana ba-Israyeli yakalonga mane bakasika kunkanda ya-Sini iili akatikati ka-Elimu a-Sinai. Bakasika nkuko mubuzuba bwakumi amusanu bwamwezi wabili nebakamana kusia Egepita. 2-Lino imbungano yoonse yabana ba-Israyeli yakatongaukila Musa a-Aroni oko kunkanda. 3-Bana ba-Israyeli bakabaambila kuti, Necakabota netwakafwa kujanza lya-Jehova kunyika ya-Egepita, netwakali kukala kumbali lyazijikilo zyanyama akulya insima cakukuta, nkaambo watusisya okuno kunkanda kuti ujazye imbungano yoonse inzala.

4-Mpawo Jehova wakaambila Musa kuti, Amubone! ndamuwisizya zilyo kuzwa kujulu. Bantu banooya buzuba bumwi abumwi kukubweza caabilo cabuzuba obo, kuti mbasunke, nzibe na banooenda mumulao wangu na pe. 5-Nkabela mubuzuba bwamusanu abumwi, babambe ncibaleta; cilainda kuli ncibabweza mazuba amwi, cilaba camazuba obile. 6-Elyo ba-Musa a-Aroni bakaambila bantu boonse ba-Israyeli kuti, Igoko muyooziba kuti Jehova nguwakamupozya kuzwa kunyika ya-Egepita, 7-alimwi cifumofumo muyoobona bulemu bwa-Jehova, nkaambo wamvwa kutongauka kwanu nkomumutongaukila Jehova, Swebo tuli anzi nemututongaukila? 8-Musa wakati, Jehova ulamupa nyama yakulya kuciindi cagoko, akumukutya insima cifumo, nkaambo Jehova wamvwa kutongauka kwanu nkomututongaukila. Aswebo tuli anzi? Teensi ndiswe mbemutongaukila pe, ngu-Jehova,

9Lino Musa wakaambila Aroni kuti, Ambila imbungano yoonse yabana ba-Israyeli kuti, Amuswene afwiifwi kuli-Jehova, nkaambo wamvwa kutongauka kwanu. 10-Nkabela Aroni naakali kwaambila imbungano yoonse yabana ba-Israyeli, bakalanga kunkanda, babona bulemu bwa-Jehova bwaboneka mujoba. 11Lino Jehova wakaambila Musa, 12-wati, Ndamvwa kutongauka kwabana ba-Israyeli, Kobaambila kuti, Ciindi calundindiwana muyoolya nyama, alimwi cifumo muyookuta insima, muzibe kuti ndime Jehova Leza wanu.

13-Lino ciindi cagoko kwakasika bakaneele banji, bazuzya malao, alimwi cifumo kwakaboneka mume cakuzyunguluka malao. 14-Elyo mume nowakakunkumuka, kwakaboneka ansi, awo ankanda, tuntu tuniini-niini mbuli caandwa cituba. 15-Bana ba-Israyeli batubone buyo, bakabuzyanya kuti, Ino ntuntunzi otu? Nkaambo kabatezi na ninzi. Nkabela Musa wakavuwa kuti, Ncecilyo Jehova ncamupa kuti mulye. 16-Lino mbuboobu Leza mbwaalailila. Amucibweze, umwi aumwi mbwakonzya kulya. Umwi aumwi abwezele bantu bamuŋanda yakwe, ceelelo caomeri comwe kumuntu umwi aumwi. 17Elyo bana ba-Israyeli bakacita obo. Bamwi bakabweza tunji, bamwi bakabweza tuniini, 18-pele nebakapima aceelesyo, oyo iwakabwezede tunji katajisi twiindilila, ayooyo iwakabwezede tuniini taakwe ncaakabulila. Bakabweza umwi aumwi mbuli kulya kwakwe. 19Mpawo Musa wakabaambila kuti, Kutabi muntu uusi sie kusikila cifumo. 20Neku-baboobo teebakabika myoyo yabo kumajwi aa-Musa. Bantu bamwi bakasia twacifumo, Lino twakaba amvunyu, twanunka, Nkabela Musa wakabakalalila. 21Mazuba oonse bakali kubweza-bweza cifumo, umwi aumwi mbuli kulya kwakwe. Pele izuba nelyakakasaazya, twakeenzunuka.

22Lino mubuzuba bwamusanu abumwi bakabweza zipanzi zyobile, nkokuti zyeelelo zyobile kumuntu umwi aumwi. Nkabela basilutwe bambungano nebakasika kuzoolwiida Musa, 23-wakabaambila kuti, Ncencico Jehova ncaakalailila. Junza mbobuzuba bwakulyokezya, buzuba busalalisya bwa-Sabata bwa-Jehova, Kufumbwa ncemuyanda kuyoka, amuciyoke; kufumbwa ncimuyanda kujika amucijike; lino cisyeede amucibambe, cibe cacifumo. 24-Elyo bakacibamba, mbubonya mbuli Musa mbwaakaamba. Teecakabija nekuba kuba amvunyu, pe. 25-Lino Musa wakati, Amucilye sunu, nkaambo sunu mbobuzuba bwa-Sabata bwa-Jehova, Sunu tamukooyoocijana musokwe pe. 26-Mazuba aali musanu abumwi munoobweza, pele buzuba bwamusanu aabili mbobuzuba bwa-Sabata, Tamukoonoojana mubuzuba obo pe. 27Lino nebwakaca buzuba bwamusanu aabili, bamwi bantu bakainka kuti babweze, pele teebakajana pe. 28-Mpoonya awo Jehova wakaambila Musa kuti, Ino mulaleka lili kukaka ku bamba milao yangu ambeta zyangu? 29Amubone! Jehova wamupa buzuba bwa-Sabata. Nkaambo kako mubuzuba bwamusanu aumwi ulamupa zilyo zyamazuba obile. Muntu umwi aumwi akale mpoonya awo mpabede. Kutabi muntu uuzwa kubukalo bwakwe mubuzuba bwamusanu aabili. 30Aboobo bantu bakalyokezya mubuzuba bwamusanu aabili.

31-Lino luzubo lwa-Israyeli wakacuulika izina lya-Mana. Cakali mbuli imbuto zyamabele, alimwi cakali kutuba, amucanka waco wakali mbuli tubunge tuvwelene abuci. 32Elyo Musa wakati, Mbuboobu Jehova mbwa-lailila. Zuzya ceelekelo, cibambilwe mazyalani aanu aaciza, kuti babone cilyo ncendakamusanizya munkanda nendakamupozya munyika ya-Egepita. 33-Nkabela Musa wakaambila Aroni kuti, Bweza cilongo, ucizuzye ceelekelo comwe ca-Mana, ucibike kunembo lya-Jehova, cibambilwe mazyalani aanu aaciza. 34-Lino mbubonya mbuli Jehova mbwaakalailila Musa, Aroni wakacibika kunembo lyabbokesi lyacizuminino, cilondolwe. 35-Nkabela bana ba-Israyeli bakali kulya Mana myaka iili makumi one, mane bakasika kunyika iili abantu, Bakali kulya mana mane bakasika kumugaano wacisi ca-Kanana. 36(Ceelelo caomeri ncecipanzi cakumi caefa.)