Search form

Kulonga 17

Maanzi mbwaakajanwa mundomba

1-Lino kuzwa kunkanda ya-Sini imbungano yoonse yabana ba-Israyeli yakali kuya bulonga-longa, mbubonya mbuli Jehova mbwaakalailila, mane lumwi bakasika ku-Refidimu, bakayaka zilao zyabo nkuko. Pele oko kakutakwe maanzi aakunywa. 2-Mpoonya awo bantu bakatalika kwaambana a-Musa, bati, Kotupa maanzi aakunywa. Nkabela Musa wakababuzya kuti, Ino nkaambonzi mwaambwida ndime? Nkaambonzi nomusunka Jehova? 3-Pele bantu bakakolwa nyota, aboobo bantu bakatongaukila Musa, bati, Wakatugwisizyanzi mu-Egepita, kuti utujazye nyota, swebo abana besu aŋombe zyesu? 4-Mpawo Musa wakakwiilila Jehova, wati, Mbacitilenzi aba bantu? Baamba kundifusa mabwe, 5-Elyo Jehova wakaambila Musa kuti, Inda kunembo lyabantu, utolelele bamwi babapati ba-Israyeli. Awalo musako wako ngowakaumya lwizi uutole mujanza lyako, uende. 6-Bona! Ndaima kubusyu bwako agale oko ku-Horebi, lino ukaume igale; mulindilyo maanzi alazwa, abantu balanywa, Elyo Musa wakacita mbubonya obo kumeso aabapati ba-Israyeli. 7-Nkabela oko kuntu wakakuulika izina lyaMasa, a-Meriba, nkaambo kakwaambana kwabana ba-Israyeli, akaambo kakuti bakasunka Jehova cakwaamba kuti, Sa Jehova mpali akati kesu na pe.

Ba-Israyeli mbubakalwana aba-Amaleki

8-Mpawo ba-Amaleki bakasika kuzoolwisya ba-Israyeli ku-Refidimu. 9-Nkabela Musa wakaambila Joshua kuti, Kotusalila bantu, uinke, ukalwanye ba-Amaleki. Junza njooima atala lyacilundu, amusako wa-Leza mujanza lyangu. 10Elyo Joshua wakacita mbubonya mbwaakamulailila Musa, waakulwisya ba-Amaleki, Nkabela ba-Musa a-Aroni a-Huri bakatanta atala lyacilundu. 11-Lino kufumbwa ciindi Musa naakasumpula ijanza lyakwe, ba-Israyeli bakali kuzunda, pele kufumbwa ciindi naakaleka kusumpula ijanza lyakwe, ba-Amaleki bakali kuzunda. 12Pele maanza aa-Musa akalema; nkaambo kako bakabweza ibbwe, balibika munsi lyakwe, wakala mpawo, nkabela ba-Aroni a-Huri bakatabilila maanza aakwe, umwi kulubazu oko aumwi kulubazu oko, aboobo maanza aakwe akaliimvwi nji mane kusikila kumabbililo aazuba. 13Lino Joshua wakawisya Amaleki abantu bakwe kupanga.

14-Mpawo Jehova wakaambila Musa kuti, Lemba aya makani mubbuku, kube ciibalusyo, alimwi amba mumatwi aa-Joshua. Ncobeni njooziminganya ciibalusyo coonse ca-Amaleki ansi ano. 15-Elyo Musa wakayaka cipaililo, wacuulika izina lya-Jehova-nisi, 16nkaambo wakati, Jehova wakonkezya kuti ulaba sinkondonyina Amaleki mumazyalani oonse.