Search form

Kulonga 21

Imwi milao yabuzike ayamakani amwi

1-Lino nzeezi imbeta nzoelede kubabikila. 2-Na waula muzike muHebrayo, uleelede kukumanina milimo myaka iili musanu aumwi, pele mumwaka wamusanu aibili uleelede kwaangunuka, alyeendele. 3Na waletwa katakwete, ainke alike buyo; na waletwa kakwete, ainke amwanakazi wakwe. 4-Na simalelaakwe wamupa mwanakazi, alimwi wazyala bana balombe na basimbi, mwanakazi abana bayooba basimalelaakwe; ulainka buyo alike. 5-Pele oyo muzike aamba kuti, Ndayandisya simalelaangu amukaangu, abana bangu nsikonzyi kwaangunuka, 6-elyo simalelaakwe uleelede kumutola kuli-Leza, amuswenye kumulyango na kumunsende; lino simalelaakwe adonkole kutwi kwakwe ansunda, amubelekele milimo lyoonse.

7-Na muntu waulisya mwanaakwe musimbi kuti abe muzike, teelede kwaangunuka mbuli bazike baalumi. 8Na tali mubotu mumeso aasimalelaakwe iwakayandide kumukwata, anunuke. Takonzyi kumuuzya kubazwamasi, pe, nkaambo wamucitila calweeno. 9Na ulayanda kumukwatya kumwanaakwe, uleelede kumucitila mbuli mwanaakwe musimbi mbwacitilwa. 10-Na wakwata aumbi, teelede kucesa kulya kwakwe na zyakusama zyakwe na zyeelelo zyauukwetwe. 11Na wakaka kumupa zintu ezi zyotatwe, aangunuke buyo, ainke.

12-Kufumbwa muntu uuma mweenzinyina calufu, ncobeni uleelede kujayigwa. 13-Nekubaboobo na katakwe kucita caali, pele canunzuunzu, njoomupa kuntu nkwakonzya kucijila. 14-Pele na muntu ulalindila mweenzinyina caali akumujaya calweeno, amumugwisye kucipaililo cangu kuti afwe.

15Kufumbwa muntu uuma wisi na banyina, ncobeni uleelede kujayigwa. 16-Kufumbwa muntu uubba muntunyina, na wamuuzya na wajanwa buyo mumaanza aakwe, ncobeni uleelede kujayigwa.

17-Kufumbwa muntu uutukila wisi na banyina, ncobeni uleelede kujayigwa.

18Na bantu balwana na umwi wauma mweenzinyina abbwe na ntuku, nekubaboobo oyo muntu tafwi, waciswa buyo, 19-lino na wabuka akweenda amusako, oyo iwakamuuma ulalekwa buyo, pele ulamuliya ciindi ncaakamusowela akumusilisya kabotu.

20-Na muntu wauma muzike wakwe, naba mwaalumi naba mwanakazi, amusako, nkabela muzike oyo wafwida mumaanza aakwe, ncobeni uleelede kupegwa mulandu, 21-Pele na muzike ucipona buzuba bomwe na mazuba obile, atapegwi mulandu pe, nkaambo muzike ngemali aakwe.

22-Na bantu balwana akuumikizya mwanakazi uuminsi, alimwi mwanakazi wasowa pele taciswi, ncobeni oyo iwakamuuma ulapegwa mulandu, aliye mbubonya mbwaamba mulumi; aliye mbobakosola babetesi. 23Pele na waciswa, kulaliigwa buumi kubuumi, 24-liso kuliso, lino kulino, ijanza kujanza, cituta kucituta, 25kupya kukupya, luumo kuluumo, mubunda kumubunda.

26-Na muntu wauma liso lyamuzike wakwe naliso lyamuzike wakwe mwanakazi akulinyonyoona, uleelede kwaangununa muzike oyo nkaambo kali so lyakwe. 27Na wakulumbula lino lyamuzike wakwe, naba mwaalumi naba mwanakazi, uleelede kwaangununa oyo muzike nkaambo kalino lyakwe,

28-Na iŋombe yayasa muntu, naba mwaalumi naba mwanakazi, nkabela wafwa, ncobeni eyo iŋombe ileelede kufuswa mabwe, anyama yayo tiikooligwa, pele mwiniŋombe tapegwi mulandu. 29Pele iŋombe na yazibila kuyasa, alimwi muleeyo wakacenjezegwa kale nekubaboobo taibambi, eyo iŋombe na yajaya mwaalumi na mwanakazi, iŋombe ileelede kufuswa mabwe, alakwe muleeyo uleelede kujayigwa, 30-Na wabbadela buyo, ulanunuzya buumi bwakwe kufumbwa cintu ncabikilwa. 31Na yayasa mwana, naba mulombe naba musimbi, kuleelede kucitwa mbubonya mbuli mulao oyo. 32-Na yayasa muzike, naba mwaalumi naba mwanakazi, muleeyo uleelede kuliya simalelo wamuzike oyo mali aali makumi otatwe, ayalo iŋombe ileelede kufuswa mabwe,

33Na muntu wasya mulindi nanka cikala, pele tacivumbi, nkabela iŋombe na imbongolo yawida mumo, 34mwinimulindi uleelede kuliya; uleelede kupa mwali munyama mali, pele mutunta ulaba wakwe.

35Na iŋombe yamuntu yayasa iŋombe yamweenzinyina, nkabela yafwa, baleelede kuulisya iŋombe iicipona akwaabana mali, ayalo iifwide baiabane. 36Pele na kulizibidwe kuti eyo iŋombe ilizibide kuyasa, nekubaboobo muleeyo taibambi, ncobeni uleelede kuliya inembe kuŋombe, alimwi iifwide ilaba yakwe.