Search form

Kulonga 22

Milao yakubba amilao imwi

1-Na muntu wabba iŋombe na imbelele akwiijaya nanka kwiiulisya, uleelede kuliya iŋombe zyosanwe mucimanga caŋombe yomwe, ambelele zyone mucimanga cambelele yomwe. 2-Na mubbi wajanwa uladonkola, alimwi waumwa calufu, taakwe mulandu wabulowa. 3-Pele na izuba lyamupaswida mpawo, kuli mulandu wabulowa, ncobeni uleelede kuliya, Na wabula cakuliya, auzigwe nkaambo kakubba kwakwe. 4-Na cakubba cajanwa mujanza lyakwe, niiba iŋombe niiba imbongolo niiba imbelele, uleelede kuliya zyobile.

5Na muntu walisya muunda na masaansa, nanka kuyandilila kwaŋombe zyakwe zyalida mumuunda wamweenzinyina, uleelede kuliya bubotu bwamuunda wakwe na bwamasaansa aakwe.

6Na mulilo wabuka akutenta lubaya lwamamvwa, aboobo kulatentwa milwi yamaila na maila aaciimvwi na muunda, ncobeni oyo muntu iwatenta mulilo uleelede kuliya.

7Na muntu wabika mali na imbono mumaanza amweenzinyina kuti azibambe, alimwi zyabbigwa kuŋanda yasikuzibamba, na mubbi wajanwa ncobeni uleelede kuliya kobile. 8Pele na mubbi tajanwi, mwiniŋanda aswene kuli-Leza, kuti kuzibwe na engwe wakabika ijanza lyakwe kumbono zyamweenzinyina. 9-Alimwi mumilandu yoonse yazintu ziswekede, naba musune niiba imbongolo niiba imbelele neziba zyakusama niciba cintu cimwi cili buti muntu ncaamba kuti, Nceeci, makani aabantu boonse bobile aletwe kuli-Leza. Lino oyo uupegwa mulandu kuli-Leza aliye mweenzinyina kobile.

10Na muntu wasisya imbongolo naba musune niiba imbelele naba munyama umwi kumweenzinyina kuti amubambile, alimwi oyo munyama wafwa nanka kulumwa nanka kutandwa katakwe uubona, 11-aba bantu bobile baleelede kukonkezyanya cikonke ca-Jehova, kuti kuzibwe na engwe iwakabika ijanza lyakwe kulubono lwamweenzinyina. Lino mwalimunyama alamwe. Takooliya pe. 12-Pele na ncobeni wabbigwa, uleelede kuliya mukamwini wayo. 13Na walumwa banyama bamusokwe, alete citondezyo. Takooliya cilume pe.

14Na muntu wakumbila cintu kumweenzinyina, lino canyonyooka nanka kufwa mulaaco natawo, ncobeni uleelede kuliya. 15Na mulaaco mpali, takooliya pe, nkaambo ncinga sikuvola, cakazida mali buyo.

16-Na mwaalumi woongelezya nakalindu uutana kukwatwa, weenda awe, ncobeni uleelede kubbadela lubono, abe mwanakazi wakwe. 17-Pele na wisi wakakilila kumupa, aliye mali aaelene alubono lwanakalindu.

18-Mutazumizyi mwanakazi muzyani kupona.

19-Kufumbwa muntu uulala amunyama ncobeni uleelede kufwa.

20-Kufumbwa uupaizizya leza umbi uutali Jehova alike, ajayigwe.

21-Mutapenzyi mweenzu nekuba kumubisizya, nkaambo anywebo mwakali beenzu munyika ya-Egepita. 22-Mutapenzyi mukamufu nanka mucaala naba umwi. 23-Na mwabapenzya, alimwi na bakwiilila ndime, ncobeni ndamvwa kukwiila kwabo, 24-lino bukali bwangu bulabuka, nkabela njoomujazya ipanga, elyo banakazi banu bayooba bamukabafu, abana banu bayooba bamucaala.

25-Na wakolotya muntu mucete naba umwi akati kabantu bangu mali, toelede kumubeda mbuli sikukolotya; utamubedi simpindu. 26-Na watola cikobela camweenzinyoko, cibe citondezyo, uleelede kucipilusya kulinguwe izuba kalitana kubbila, 27nkaambo ncencico luzutu ncalivumbya kumubili wakwe, Aone buti? Na wakwiilila ndime, njoomvwa, nkaambo ndisiluzyalo,

28-Utasampauli Leza nanka kutukila mweendelezi wabantu bako.

29-Utaneleeli kupaizya kabalwebalwe kamaila aako akawaini wako, Alimwi undipe mutaanzi akati kabana bako balombe. 30-Azyalo iŋombe zyako ambelele zyako, undicitile mbubonya obo. Mazuba aali musanu aabili mwana akale abanyina, lino mubuzuba bwamusanu aatatu mulandipa. 31-Amube bantu basalala kulindime. Nyama indume musokwe mutailyi pe; amwiisowele babwa.