Search form

Kulonga 23

Imwi milao yahucita bululami

1-Utazibwezi zilengelelo zyabuyo. Utagwasyanyi amuntu sizibi sikulengelela kaambo. 2-Utatobeli buleya kukucita zibi. Utaambi makani mulubeta kuti upambuke abantu banji kukubisya. 3-Utavundikizyi abusyu bwako kumakani aamucete.

4-Na wajana iŋombe yasinkondonyoko na imbongolo yakwe iliswekede, ncobeni uleelede kwiipilusya kulinguwe. 5Na wabona imbongolo yayooyo uukusulide iliimbidwe mukuli wayo, toelede kumulekelezya pe, ncobeni uleelede kumugwasya.

6-Utabi noobisya ceelede mucete mulubeta. 7-Cenjela makani aakubeja, Utajayi muntu uutakwe mulandu na muntu uululeme, nkaambo mebo nsikonzyi kululamika basizibi. 8-Utalyi makulo, nkaambo makulo aloofwaazya meso akubisizya makani aabaluleme.

9-Mutapenzyi beenzu. Mulizi moyo wamweenzu mbuubede, nkaambo anywebo mwakali beenzu mucisi ca-Egepita.

Amwi makani aamwaka amapobwe

10-Myaka iili musanu aumwi ulime nyika yako akutebula zilyo zyako, 11pele mumwaka wamusanu aibili uleke, ione, kuti bacete babantu bako balye abalo, aceeco cisyeede banyama bamusokwe bacilye. Ayalo myuunda yako yamasaansa amyuunda yamaolifa, uleelede kwiicitila mbubonya.

12-Mazuba aali musanu abumwi komana milimo yako, pele mubuzuba bwamusanu aabili ulyokezye, kuti basune bako ambongolo zyako zilyokezye, abalo bana babalanda bako basimbi abeenzu boonse bakatulukwe. 13-Amucenjele makani oonse ngendamwaambila. Mutaambi makani aabaleza bambi. Mazina aabo atamvwigwi mumilomo yanu.

14-Ziindi zyotatwe mumwaka amundicitile ipobwe. 15-Muleelede kucita ipobwe lyazinkwa zitakwe bumena; mazuba aali musanu aabili amulye zinkwa zitakwe bumena, mbubonya mbundakamulailila, kuciindi ceelede camumwezi wa-Abibi, nkaambo mulinguwo mwakazwa ku-Egepita. Kutabi uuza kulindime acinkwamaanza. 16-Alimwi amucite ipobwe lyakutebula, ipobwe lyakabalwebalwe kamilimo yako, micelo njowakabyala mumuunda wako; alyalo ipobwe lyalwiindi kumamanino aamwaka, nowamana kulimuna micelo yako yoonse yamumuunda. 17Ziindi zyotatwe mumwaka baalumi bako boonse baboneke kubusyu bwa-Mwami Jehova.

18Bulowa bwacipaizyo cangu toelede kubupaizya antoomwe abuswezyo. Aalo mafuta aamapobwe aangu taelede kusyaala mane bukace. 19-Micelo mitaanzi njiizyala nyika yako, uleelede kwiileta kuŋanda ya-Jehova Leza wako, Utajiki mwana wampongo mumukupa wabanyina.

Leza mbwaakasyomezya kubasisya ku-Kanana

20Amubone! Ndatuma angelo kunembo lyanu, kuti amubambe munzila akumusisya kubusena mbondakamubambila. 21-Amucenjele, muswiilile ijwi lyakwe, mutamukalazyi, nkaambo takooyoomulekelela milandu yanu, nkaambo izina lyangu molili mulinguwe. 22-Na ncobeni mwaswiilila ijwi lyakwe akucita zyoonse nzinamba, njooba sinkondonyina basinkondonyoko, njoobalwanya bamulwisya. 23-Lino angelo wangu namuzulwida akumusisya kuba-Amori akuba-Hiti akuba-Perizi akuba-Kanana akuba-Hivi akubaJebusi, njoobanyonyoona aba boonse. 24-Mutakotamini mizimu yabo nekuba kwiikomba. Mutaciti mbubacita pe. Amubamanisye, akumwaya minsemu yabo yamabwe. 25-Amukombe Jehova Leza wanu, lino njoolongezya zilyo zyanu amaanzi aanu, alimwi njoogwisya malwazi akati kanu. 26-Takukooyooba naba omwe mucisi canu uusowa nanka uutazyali, Njoozuzikizya mazuba aanu. 27-Njootuma ziyoosya zyangu kunembo lyanu, zipilinganye bantu boonse oko nkomuyoosika, nkabela basinkondonyoko boonse bayoomupa matako. 28-Njootuma manko kunembo lyanu, akabatande ba-Hivi aba-Kanana aba-Hiti. 29-Nsikooyoobatanda mumwaka omwe pe, kuti cisi citabi matongo, abanyama bamusokwe batamuvulili. 30Njoobatanda buniini buniini mane mukavule akuvuba nyika. 31-Nkabela njookukosweda migaano kuzwa ku-Lwizi Lusalala kusikila kulwizi lwabaFilisti, akuzwa kunkanda kusikila ku-Firate, nkaambo bantu bakede munyika njoobaaba mumaanza aanu, mubatande kubusyu bwanu. 32Mutatangani cizuminano ambabo nanka abaleza babo. 33-Tabeelede kukala munyika yanu, kuti batamuciti kuti mundibisizye, nkaambo na mwakomba baleza babo, ncobeni ciyoomubeda cilebyo.