Search form

Kulonga 29

Milimo yakusalazya bapaizi

1-Lino mbuboobu mboelede kubacitila kukubasalazya kuti bandimanine milimo yabupaizi. Bweza musune omwe ambelele zyobile zitakwe tumpenda, 2-azinkwa zitakwe bumena, azibunge zitakwe bumena zikandidwe amafuta, atubunge tutakwe bumena tunanikidwe mafuta, Zyoonse zicitwe abusu bwabulotwe butwidwe kabotu. 3Uzibike mucinzuma comwe akuzileta mumonya mucinzuma antoomwe amucende abagutu bobile. 4-Lino Aroni abana bakwe, ubaswenye kufwaafwi kumulyango watente lyambunganino akubasanzya maanzi. 5-Lino bweza zyakusama akusamika Aroni cikobela camanyengwe acibaki aefodi acisani cakaango, alimwi umusamike lukumba lwaefodi Iutungidwe camaanu. 6Lino umusamike citambala amutwe wakwe, akubika munsini uusalala acitambala. 7-Lino bweza mafuta aakunanika, akwaatila amutwe wakwe, umunanike. 8Abalo bana bakwe ubaswenye afwiifwi, ubasamike zikobela zyamanyengwe, 9-ubasamike inkumba akubazwaatika insulumani, Bupaizi buyooba bwabo: ngomulao walyoonse. Mbuboobo mboelede kubikila Aroni abana bakwe maanza.

10-Mpoonya awo ukalete musune kunembo lyatente lyambunganino. Aroni abana bakwe babike maanza aabo amutwe wamusune, 11mukajaye musune nkukonya oko kunembo lya-Jehova kumulyango watente lyambunganino. 12-Lino kombola bulowa bwamusune, ulambe ameja aacipaililo amunwe wako, abulowa bumwi boonse ubutile atako lyacipaililo. 13-Alimwi bweza lufuko alulyaŋanga lwamuni, ansa zyobile amafuta aazyo, uzitente acipaililo. 14-Pele nyama yamusune, atobo lyakwe, acifusi cakwe, zyoonse zitentwe mumulilo anze lyamalabba: ncecipaizyo cazibi.

15-Lino bweza umwi wabagutu, Aroni abana bakwe babike maanza aabo amutwe wamugutu. 16Nkabela ujaye mugutu, ubweze bulowa bwakwe akubutila koonse koonse cakuzinguluka cipaililo. 17Wamana buyo, tendaula mugutu, sanzya mala aakwe amyeendo yakwe akuzibika zyoonse antoomwe azituli zimwi amutwe, 18-utente mugutu woonse acipaililo: ncecipaizyo cakupaizya Jehova, cinunko cibotu citentelwa Jehova.

19-Elyo ubweze mugutu wabili, Aroni abana bakwe babike maanza aabo amutwe wamugutu, 20ukajaye mugutu, ukombole bulowa bwakwe akulamba impela yakutwi kwalulyo kwa-Aroni, ampela zyamatwi aalulyo aabana bakwe, azyaala zyamaanza aabo aalulyo azyaala zyakumaulu aabo aalulyo. Lino bulowa busyeede ubutile koonse koonse cakuzinguluka cipaililo. 21-Wamana obo, kombola bulowa buli acipaililo amafuta aakunana, usansaile Aroni azyakusama zyakwe abana bakwe azyakusama zyabana bakwe, aboobo ulasalala, walo azyakusama zyakwe, abana bakwe azyakusama zya bana bakwe boonse,

22Alimwi bweza mafuta aamugutu, amucila, alufuko, alulyaŋanga lwamuni, ansa zyobile, amafuta aazyo, amweendo walulyo, (nkaambo ngomugutu wakusalazya), 23-acinkwa comwe, acibunge comwe cikandidwe amafuta, akabunge komwe kuzwa kucinzuma cazinkwa zitakwe bumena zili kumeso aa-Jehova. 24Ezi zyoonse uzibike mumaanza aa-Aroni amumaanza aabana bakwe, muziyumbe kubusyu bwa-Jehova, zibe cipaizyo cakuyumba. 25-Kozitambula kuzwa kumaanza aabo akuzitenta acipaililo atala lyacipaizyo citentwa, kube cinunko cibotezya Jehova: ncecipaizyo citentelwa Jehova.

26-Lino bweza katiti kamugutu wakusalazya Aroni, ukayumbe kubusyu bwa-Jehova, kabe cipaizyo cakuyumba: kalaba caabilo cako. 27-Usalazye katiti kacipaizyo cakuyumba amweendo wacituuzyo ciyumbwa cipaizigwa kuzwa kumugutu wakusalazya Aroni abana bakwe. 28-Ezi zilaba zya-Aroni azyabana bakwe: ngumulao walyoonse akati kabana ba-Israyeli; ncecaabilo cabapaizi neebayoopegwa kuzwa kuzipaizyo zyabana ba-Israyeli; ncecituuzyo cabo kuli-Jehova.

29-Aakufwa Aroni, zikobela zyakwe zisalala ziyooba zyabana bakwe. Bayoonanikwa akusalazigwa mulinzizyo. 30-Oyo mwana uulya izina lyakwe uyoozisama mazuba aali musanu aabili naayoonjila mutente lyambunganino kukupaila mubusena busalala.

31-Lino mugutu wakusalazya uleelede kumutola akujika nyama yakwe mubusena busalala, 32-nkabela Aroni abana bakwe bayoolya nyama yamugutu azinkwa zyamucinzuma kumulyango watente lyambunganino. 33-Bayoolya zintu ezyo izyakabelesegwa kukumanya milandu yabo akukubabika mumilimo akubasalazya. Mweenzu teelede kuzilya pe, nkaambo zilasalala. 34Pele na kwasyaala nyama yakusalazya nanka cinkwa kusikila cifumo eco cisyeede uleelede kucitenta mumulilo; taciligwi pe, nkaambo cilasalala,

35-Mbuboobo mboelede kucitila Aroni abana bakwe, Cita zyoonse nzendakulailila, Milimo yakubasalazya ilatola mazuba aali musanu aabili. 36-Buzuba bumwi abumwi uleelede kupaizya musune wakumanya milandu, Acalo cipaililo, uleelede kucipaizizya cipaizyo cakumanya zibi zyaco, akucinanika, kuti ucisalazye. 37-Mazuba aali musanu aabili amupaizizye cipaililo akucisalazya, aboobo cipaililo cilasalalisya loko. Kufumbwa cintu ciguma cipaililo cilasalala.

38-Lino nzeezi zintu nzimweelede kutuula acipaililo: tubelele tulesi tobile mazuba oonse, 39-kabelele komwe kacifumo akabelele kabili kagoko; 40antoomwe akabelele kataanzi amutuule cipanzi cakumi cacisuwo cabusu bwabulotwe butwidwe, bukandidwe acipanzi cane cansazi yamafuta, acipanzi cane cansazi yawaini, cibe cipanzi cakutila, 41-Akabelele kabili, amukapaizye ciindi cagoko; kabe acipaizyo cako cabusu acipaizyo cako cawaini, mbubonya mbuli eco cacifumo, kabe cinunko cibotu citentelwa Jehova. 42-Mbuboobo mbokweelede kupaizigwa lyoonse, mumazyalani aanu oonse, kumulyango watente lyambunganino kubusyu bwa-Jehova. Nkukonya oko nkonjoomuswanina, akwaambaula ayebo. 43-Nkukonya oko nkonjooswanaana abana ba-Israyeli. Kuyoosalazigwa abulemu bwangu. 44-Njoosalazya itente lyambunganino, acipaililo; alakwe Aroni abana bakwe njoobasalazya kuti bandicitile milimo yabupaizi. 45-Njookala akati kabana ba-Israyeli, njooba Leza wabo, 46nkabela bayooziba kuti ndime Jehova Leza wabo iwakabagwisya munyika ya-Egepita kuti nkale akati kabo, Ndime Jehova Leza wabo.