Search form

Kulonga 3

Leza mbwaakalibonya kuli-Musa ku-Horebu

1-Lino Musa wakali kweembela imbelele zya-Jetero syanyinazyala, mupaizi wa-Midyani, nkabela wakasisya imbelele zyakwe kumbo lyankanda, wasika ku-Horebu, cilundu ca-Leza. 2-Nkabela angelo waJehova wakalibonya kulinguwe mumabangabanga aamulilo muciteo. Lino wakabona kuti citeo kaciyaka amulilo, nekubaboobo citeo kacitapyi. 3-Mpawo Musa wakati, Njiinke kuyoobona malweza aya mapati. Nkaambonzi citeo tacipyi, 4-Elyo Jehova naakabona ulainka kuyoobona, Leza wakamwiita kuzwa mukati kaciteo, wati, Musa, Musa, Wakati, Mpondi. 5-Wakati, Utasweni afwiifwi okuno pe, Samununa insangu zyakumaulu aako, nkaambo antu awa mpoimvwi mbusena busalalisya. 6-Alimwi wakati, Ndime Leza wabamauso, Leza wa-Abrahamu a-Leza wa-Isaka, a-Leza wa-Jakobo. Mpawo Musa wakalivumba kumeso, nkaambo wakayoowa kulanga Leza.

7-Lino Jehova wakaamba kuti, Ncobeni ndibwene mapenzi aabantu bangu bali mu-Egepita. Ndimvwide mbubalila nkaambo kabaabo bababelesya. Ndizi buusu bwabo mbobubede, 8-lino ndaseluka kuzoobavuna mumaanza aaba-Egepita akubapozya munyika eyo, mbatole kunyika imbotu iikwazeme, kunyika iikunka malili abuci, nkobabede ba-Kanana aba-Hiti aba-Amori aba-Perizi aba-Hivi aba-Jebusi. 9-Lino bona! Kulila kwabana ba-Israyeli kwasika kulindime, alimwi ndibwene mafwabi ngebabafwabya ba-Egepita. 10-Lino koya. Ndakutuma kuli-Farao, ukapozye bantu bangu ba-Israyeli kuzwa ku-Egepira, 11-Pele Musa wakaambila Leza kuti, Ma! Mebo inga ndainka buti kuli-Farao? Ingandapozya buti bana ba-Israyeli kuzwa ku-Egepita? 12-Wakati, Ncobeni ndaba ayebo. Lino nceeci citondezyo cakuti ndime ndakutuma. Wapozya bantu kuzwa ku-Egepita, muzoobelekela Leza milimo mpoonya ano acilundu ecino.

13-Lino Musa wakaambila Leza kuti, Nenjoosika kubana ba-Israyeli akubaambila kuti, Leza wabamausowanu wandituma kulindinywe, ambweni bakandibuzye kuti, Ngwani izina lyakwe? Nkabavwiile buti? 14-Mpawo Leza wakaambila Musa kuti, NDIME UULIWO LYOONSE. Wakati, Mbuboobu mboelede kwaambila bana ba-Israyeli, NDIME ngowakandituma kulindinywe. 15-Alimwi Leza wakaambila Musa kuti, Mbuboobu mboelede kwaambila bana ba-Israyeli, Jehova Leza wabamausowanu, Leza wa-Abrahamu, Leza wa-Izaka, Leza wa-Jakobo, wandituma kulindinywe, Ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani. 16-Koya, ukabunganye bapati baba-Israyeli, ukabaambile kuti, Jehova Leza wabamausowanu wandibonekela, Leza waAbrahamu a-Izaka a-Jakobo, wati, Ncobeni ndimubwene mbomucitilwa mu-Egepita. 17-Lino ndaamba kumugwisya mumapenzi aaku-Egepita, ndimutole kunyika yaba-Kanana ayaba-Hiti ayaba-Amori ayaba-Perizi ayaba-Hivi ayaba-Jebusi, kunyika iikunka malili abuci. 18-Lino bayooswiilila ijwi lyako, nkabela mukaye kumwami wa-Egepita, yebo abapati ba-Israyeli, mukamwaambile kuti, Jehova Leza waba-Hebrayo waswanaana aswe. Lino twakumbila kuti utuleke, tutole lweendo lwamazuba otatwe kuya munkanda, tukapailile Jehova Leza wesu. 19Ndizi kuti mwami waEgepita takooyoomuzuminina kuya, pe, cita asinikizigwe ajanza ijumu. 20-Aboobo njootandabika ijanza lyangu akuuma ba-Egepita amalweza aangu oonse ngenti cite akati kabo. Musule lyayaayo uyoomuzumizya kuya. 21-Lino njoocita kuti aba bantu bafwidwe luzyalo mumeso aaba-Egepita, nkabela mukwiinka kwanu tamukooyooinka acinkwamaanza pe. 22-Mwanakazi uyookumbila kumweenzinyina akuliyooyo uukala-kala muŋanda yakwe kuti amupe zibelesyo zyansiliva, azibelesyo zyangolida, azyakusama; elyo muyoozisamika bana banu balombe abasimbi, aboobo muyoosaala ba-Egepita.