Search form

Kulonga 32

Ba-Israyeli mbubakabisya kukucita moombe wangolida

1-Lino bantu nebakabona kuti Musa wamuka kuseluka kuzwa kucilundu, bantu bakayobolokela Aroni, bati, Buka utucitile baleza bakutuzulwida, nkaambo oyo Musa, muntu iwakatupozya mucisi ca-Egepita, tatuzi camusikila. 2-Mpoonya awo Aroni wakabaambila kuti, Amugwisye mankwintankwinta aangolida aali kumatwi aabanakazi banu abana banu balombe abasimbi, mwaalete kulindime. 3Lino bantu boonse bakagwisya mankwinta-nkwinta­ aangolida aamumatwi aabo akwaaleta kuli-Aroni. 4-Amane kwaatambula kumaanza aabo, wakaabumba-bumba acibelesyo, wapanga moombe uufulidwe. Elyo bakati, Mbaaba baleza bako, O Israyeli, ibakamupozya mucisi ca-Egepita, 5-Alakwe Aroni, naakabona, wakayaka cipaililo kunembo lyakwe. Nkabela Aroni wakalailila kuti, Junza kuli ipobwe lyaJehova. 6-Lino nebwakaca, bakafuma kubuka, batuula zipaizyo, baleta zipaizyo zyakutontozya. Elyo bantu bakakala kukulya akunywa, alimwi bakanyampuka kukusobana.

7-Mpawo Jehova wakaambila Musa kuti, Seluka, nkaambo bantu bako mbowakagwisya mucisi ca-Egepita babisya. 8-Bafwambaana kusia inzila njindakabalailila, balicitila moombe uufulidwe, bamukomba, bamupaizizya, bati, Mbaaba baleza bako, O Israyeli, ibakamupozya mucisi ca-Egepita. 9-Alimwi Jehova wakaambila Musa kuti, Ndibwene bantu aba. Mbantu bayumu myoyo. 10-Undileke kuti bukali bwangu bubabukile canguzu, nkabanyonyoone, lino ndakucita yebo ube musyobo mupati.

11-Elyo Musa wakakombelezya Leza wakwe, wati, O Jehova, nkaambonzi bukali bwako bwabukila bantu bako mbowagwisya mucisi ca-Egepita anguzu ziyoosya ajanza ijumu? 12Sa ncibotu kuti ba-Bgepita baambe kuti, Wakabapozezya bubi, kuti abajaye muzilundu akubanyonyoona, batabonwi limbi ansi. Leka bukali bwako buyoosya, utabisizyi bantu bako. 13-Ibaluka Abrahamu a-Izaka a-Israyeli balanda bako, mbowakakonkezya muzina lyako omwini cakwaamba kuti, Njoovuzya inyungu zyanu mbuli inyenyeezi zyakujulu, anyika eyi yoonse njendakasyomezya njooipa inyungu zyanu baivube lyoonse. 14-Mpawo Jehova wakalekelela bantu bakwe bubi mbwaakali kuyeeya kubacitila,

15-Elyo Musa wakapiluka, waseluka kuzwa kucilundu, amabwe aapapalete aamilao akali mumaanza aakwe. Ayo mabwe akalilembedwe koonse koonse, kumabazu oonse obile. 16-Mabwe akali mulimo wa-Leza, amalembo aalembedwe alingao Leza nguwakaalemba. 17Lino Joshua naakamvwa kuyobayoba kwabantu, wakaambila Musa kuti, Ndamvwa lupyopyongano lwankondo kumalabba. 18Pele wakati, Teensi majwi aabaabo bazunda nekuba bazundwa, pe. Ndamvwa majwi aabasikwiimba. 19Nkabela naakasika kufwaafwi kuzilao aku bona moombe akuzyana, bukali bwaMusa bwakabuka, nkabela mabwe wakaasowa kuzwa kumaanza aakwe, akwaapwaya nkukonya oko kunsi lyacilundu. 20Lino wakabweza moombe ngubakacitide, wamutenta mumulilo. Alimwi wakamuziya, wamwaya busu amaanzi, wanywisya bana ba-Israyeli.

21Lino Musa wakaambila Aroni kuti, Ino bantu aba bakubisizyanzi? Nkaambonzi wabacitya bubi obu bupati? 22Nkabela Aroni wakavuwa kuti, Bukali bwasimalelaangu butabuki. Ulizi bantu mbubabede. Myoyo yabo ilaanzikidwe kububi. 23Bakandaambila kuti, Utucitile baleza bakutuzulwida, nkaambo oyo Musa, muntu iwakatugwisya munyika ya-Egepita, tatuzi na wasikilwanzi. 24Elyo ndakabaambila kuti, Kufumbwa uujisi ingolida, aigwisye, ailete kulindime, Lino ndakaiwaala mumulilo, nkabela kwakazwa oyu moombe.

25Elyo Musa naakabona kuti bantu tabaciyoowi abuniini kucita zitondwa, nkaambo Aroni wakabalekelela, kuti abausye insoni kuli basinkondonyina, 26Musa wakaima kumulyango wamalabba, wati, Kufumbwa uuli kulubazu lwa-Jehova aboole kulindime. Elyo kwakamuyobolokela bana boonse ba-Levi. 27Nkabela wakabaambila kuti, Mbuboobu mbwaamba Jehova Leza waIsrayeli, Soma umwi aumwi ipanga lyakwe akasolo kakwe, lino kamuya bweendeenda kumulyango umwi aumwi koonse kumalabba, mukajaye umwi aumwi mwanaakwabo, aumwi aumwi mweenzinyina, aumwi aumwi sikamukowanyina. 28Elyo bana ba-Levi bakacita mbubonya mbwaakabalailila Musa, nkabela mubuzuba obo kwakajayigwa akati kabantu mbuli zyuulu zyotatwe. 29Lino Musa wakati, mwalikazika kuti mube bapaizi ba-Jehova, umwi aumwi kumwanaakwe akumwanaakwabo, aboobo ulamupa coolwe buzuba obuno.

30Nebwakaca Musa wakaambila bantu kuti, Mwacita zibi zipati. Lino ndainka kuli-Jehova, Ambweni ndakonzya kumuliyila mulandu. 31Elyo Musa wakapiluka kuli-Jehova, wati, Maawe! Bantu aba bacitazibi zipati. Balipangila baleza bangolida. 32-Sa inga ulakonzya kubalekelela zibi zyabo? Na tokonzyi, uziminganye izina lyangu mubbuku lyako ndowakalemba. 33-Pele Jehova wakaambila Musa kuti, Oyo uundibisizya ngonguwe ngonjooziminganya mubbuku lyangu. 34-Mbubo, koya, ukazulwide bantu akubasisya kubusena mbdundakakwaambila, Ncobeni angelo wangu ulamuzulwida, Nekubaboobo mubuzuba bwakubauma njoobauma nkaambo kazibi zyabo.

35-Nkabela Jehova wakaumya bantu malwazi nkaambo kakucita moombe ngwaakacita Aroni.