Search form

Kulonga 37

Zibelesyo zyamutente mbuzyakacitwa

1-Lino Bezaleli wakabeza ibbokesi lyamuunga. Bulamfu bwalyo bwakali tukokola tobile acisela, bwaamba bwalyo bwakali kakokola komwe acisela, abwiime bwalyo bwakali kakokola komwe acisela. 2Nkabela wakaliziluluzya ingolida iisalala koonse koonse, mukati aanze; alimwi wakalicitila moombe wangolida cakuzinguluka. 3Lino wakalifulila incoko zyone zyangolida amabazu aalyo one: incoko zyobile kulubazu lumwi, ancoko zyobile kulubazu alumwi. 4-Alimwi wakabeza miziyo yamuunga, waiziluluzya ingolida, 5-wabika miziyo muncoko kumabazu aabbokesi, ibe yakuyumuzya ibbokesi. 6-Alimwi wakacita cuuno caluzyalo cangolida iisalala. Bulamfu bwaco bwakali tukokola tobile acisela, abwaamba bwaco kakokola komwe acisela. 7Nkabela wakapanga bakerubi bobile bangolida yacifulamubisi kumpela zyobile zyacuuno caluzyalo; 8umwi kerubi kali kumpela imwi akerubi umwi kumpela imwi; bakalijatilide mucuuno caluzyalo kumpela zyaco zyobile. 9-Bakerubi bakalitandabikide maboko aabo kujulu cakuvumbilila cuuno caluzyalo, amasyu aabo akalilangene. Masyu aabakerubi­ akali kulanga cuuno caluzyalo,

10-Alimwi wakacita intafule yamuunga. Bulamfu bwayo bwakali tukokola tobile, bwaamba bwayo bwakali kakokola komwe, abwiime bwayo bwakali kakokola komwe acisela. 11Wakaiziluluzya ingolida iisalala, akwiifulila moongola wangolida cakuzyunguluka. 12Alimwi wakaicitila mubalo uuzingulukide uuli abwaamba bwajanza, ayooyo mubalo kauli amoongola wangolida koonse koonse. 13Alimwi wakaifulila incoko zyone zyangolida akubika incoko kuzyooko zyone zyakumaulu aayo. 14Kufwaafwi kumubalo kwakabikwa incoko, zijate miziyo yakuyumuzya intafule. 15Miziyo wakaibezya muunga, waiziluluzya ingolida, ibe yakuyumuzya intafule. 16-Azyalo zibelesyo zyantafule wakazicitya ingolida iisalala: mitiba yayo, azilongo zyayo, amfulu zyayo zyakupaizya.

17-Acalo ciimikilo camalampi wakacifuzya ingolida iisalala. Matako aaco amubili waco kaali acifulamubisi; inkomeki zyaco atunkuli twaco amalubaluba aaco zyoonse zyakajatilila mulincico. 18Nkabela mumabazu aaco mwakazwa mitabi iili musanu aumwi; yotatwe kulubazu lumwi alumwi lwaciimikilo. 19Mutabi umwi aumwi kaubezedwe ankomeki zyotatwe zili mbuli micelo yaalmondi, zili atunkuli amalubaluba; mitabi yoonse iili musanu aumwi iizwa kuciimikilo mbuyakacitidwe. 20-Aalo aciimikilo cini akabezwa inkomeki zyone zili mbuli micelo yaalmondi, zili atunkuli amalubaluba. 21Alimwi kwakali kankuli kunsi lyamitabi yobile, akamwi kunsi lyamitabi yobile, akamwi kunsi lyamitabi yobile, kumitabi yoonse iili musanu aumwi iizwa kuciimikilo. 22Tunkuli amitabi, zyoonse kazijatilide mulincico, coonse cacifulamubisi, ingolida iisalala. 23-Alimwi wakacicitila malampi aali musanu aabili, amano zyaco ankaye zyaco; zyoonse zyakali zyangolida iisalala. 24Ciimikilo azibelesyo zyaco zyoonse wakazicita atalenta lyomwe lyangolida.

25-Alimwi wakacita cipaililo cakutentela tununkilizyo; wakacicitya muunga, Bulamfu bwaco bwakali kakokola komwe, abwaamba bwaco bwakali kakokola komwe; kacili azyooko zyone zyeelene. Abwiime bwaco bwakali tukokola tobile. Ameja aaco kaakumbetene. 26Wakaciziluluzya ingolida iisalala: mutwe waco amabazu aaco ameja aaco. Alimwi wakacifulila moongola wangolida koonse koonse. 27Akunsi lyamoongola kumabazu aaco, kumabazu aaco oonse obile, wakacita incoko zyangolida zyakuseka miziyo yakuyumuzya. 28Ayalo miziyo wakaibezya muunga akwiiziluluzya ingolida. 29-Alimwi wakakondola mafuta aasalala aakunana, atununkilizyo tusalala tubotu, mbubonya mbwacita mweengi wamafuta.