Search form

Kulonga 38

1-Alimwi wakacita cipaililo camuunga cakutuuzya. Bulamfu bwaco bwakali tukokola tosanwe, abwaamba bwaco tukokola tosanwe; cakali azyooko zyone zyeelene; abwiime bwaco bwakali tukokola totatwe. 2Nkabela wakacicitila meja azyooko zyaco zyone. Meja aaco akalikumbetene aco. Lino wakaciziluluzya mukuba. 3-Alimwi wakacita zibelesyo zyoonse zyacipaililo: zilongo zyaco, amaliko aaco, amitiba yaco, aziyasyo zyaco, anzila zyaco. Zibelesyo zyoonse wakazicitya mukuba. 4Alimwi wakacitila cipaililo kansabwe kamukuba, Ako kansabwe wakakabika kunsi lyalupimpito lwacipaililo, kakalengelela bulamfu bwacisela cacipaililo. 5Alimwi wakafula incoko zyone kuzyooko zyone zyakansabwe kamukuba, zibe zyakujatilizya miziyo. 6Ayalo miziyo wakaibeza amuunga akwiiziluluzya mukuba. 7Elyo wakasekka miziyo muncoko zyakumabazu aacipaililo, kuti ibe yakuciyumuzya, Wakaciyaka bufokokede amapulanga.

8-Alimwi wakapanga cisambilo camukuba, atako lyaco lyamukuba; mukuba wakazwa kuziboniboni zyabanakazi ibakali kubungana kumulyango watente lyambunganino.

9-Alimwi wakacita lubuwa lwacikombelo. Kulubazu lwakumusanza zisitilizyo zyalubuwa zyakali zyamasani aalukidwe kabotu, aatukokola tuli mwanda. 10Misumpululu yazyo yakuli makumi obile, azikazikilo zyazyo zyakali makumi obile; zyoonse zyakalicitidwe amukuba, pele nembe zyamisumpululu aminkulu yayo zyakalicitidwe ansiliva. 11Akwalo kulubazu lwakunyika kakuli tukokola tuli mwanda. Misumpululu yazyo yakali makumi obile, azikazikilo zyazyo zyakali makumi obile. Zyakali zyamukuba, pele nembe zyamisumpululu aminkulu yayo zyakali zyansiliva. 12Akulubazu lwakumbo kakuli zisitilizyo, tukokola tuli makumi osanwe, Misumpululu yazyo yakali ikumi, azikazikilo zyazyo zyakali ikumi. Inembe zyamisumpululu aminkulu yayo zyakali zyansiliva. 13Alimwi kulubazu lwakujwe kakuli tukokola tuli makumi osanwe. 14Kuntu kulengelela masani kulubazu lumwi lwamulyango kakuli abulamfu bwatukokola tuli ikumi amusanu, Oko misumpululu yakali yotatwe, azikazikilo zyakali zyotatwe. 15Akwalo kuntu kulengelela masani kulubazu lwabili lwamulyango kakuli abulamfu bwatukokola tuli ikumi amusanu, Misumpululu yakali yotatwe, azikazikilo zyakali zyotatwe. 16Zisitilizyo zyoonse zyalubuwa kumabazu oonse zyakalitungidwe amasani aatuba aalukidwe kabotu. 17Matako aamisumpululu akali aamukuba, pele nembe zyamisumpululu aminkulu yayo zyakali zyansiliva. Ayalo mitwe yamisumpululu yakalizilulwidwe insiliva, amisumpululu yoonse yalubuwa yakali aminkulu yansiliva. 18-Nkabela cisitilizyo camulyango walubuwa cakalitungidwe amasani aanyanzabili amasani aakamwemvwe amasani aasalala pyu amasani aatuba aalukidwe kabotu. Bulamfu bwaco bwakali tukokola tuli makumi obile, abwaamba bwaco, nkokuti bwiime bwaco, bwakali tukokola tosanwe. 19Alimwi misumpululu yaco yakali yone, azikazikilo zyayo zyakali zyamukuba, Inembe zyazyo zyakali zyansiliva, ayalo mitwe yazyo aminkulu yazyo yakalizilulwidwe insiliva. 20-Zyoonse inkambilizyo zyatente azyalubuwa loonse zyakali zyamukuba,

21-Ngooyu mweelwe wazintu zyatente, nkokuti itente lyambunganino, izyakabalwa kukulailila kwa-Musa, zibe zyamilimo yaba-Levi ibakali mumaanza aa-Itamara mwana wa-Aroni mupaizi. 22-Bezaleli mwana wa-Uri muzukulu wa-Huri waluzubo lwa-Juda nguwakacita zintu zyoonse Jehova nzyaakalailila Musa. 23Kali antoomwe a-Aholiabu mwana waAhisamaki waluzubo lwa-Dani, similimo muuza, sikutunga masani aanyanzabili amasani aakamwemvwe amasani aasalala pyu amasani aatuba aalukidwe kabotu.

24-Ingolida yoonse iyakabelesegwa mumilimo yakuyaka cikombelo, ingolida yamulumbo, yakali matalenta aali makumi obile amusanu aane amasyekeli aali myanda iili musanu aibili amakumi otatwe, mbubonya mbuli isyekeli lyacikombelo. 25-Ayalo insiliva njibakapa basimbungano yakali matalenta aali mwanda amasyekeli aali cuulu amyanda iili musanu aibili amakumi aali musanu aabili amusanu, mbubonya mbuli isyekeli lyacikombelo. 26-Muntu umwi aumwi wakaliya beka (nkokuti cisela casyekeli, mbubonya mbuli isyekeli lyacikombelo), Mbubakacita boonse buyo ibakalembedwe, ibakali amyaka iili makumi obile na kusotoka, bantu bali zyuulu zili myanda iili musanu aumwi azyuulu zyotatwe amyanda yosanwe amakumi osanwe: 27-Ayo matalenta aansiliva aali mwanda akali aakufuzya zikazikilo zyacikombelo azikazikilo zyacisitilizyo. Zikazikilo zili mwanda zyakafulidwe amatalenta aali mwanda, nkokuti italenta lyomwe kucikazikilo cimwi acimwi. 28Alimwi masyekeli aali cuulu amyanda iili musanu aibili amakumi aali musanu aabili amusanu, ngengao ngaakabelesya kukufulila misumpululu inembe akukuziluluzya mitwe yayo akukwiicitila minkulu. 29Awalo mukuba iwakapegwa wakaba matalenta aali makumi aali musanu aabili amasyekeli aali zyuulu zyobile amyanda yone. 30Ngonguwo wakabelesegwa kukucita matako aamulyango watente lyambunganino, cipaililo camukuba akansabwe kaco kamukuba azibelesyo zyoonse zyacipaililo, 31-azikazikilo zyalubuwa lwaanze, azikazikilo zyamulyango walubuwa, anembe zyoonse zyacikombelo anembe zyoonse zyalubuwa lwaanze.