Search form

Kulonga 40

Itente lyambunganino mbulyakaimikwa

1Lino Jehova wakaambila Musa kuti, 2-Mubuzuba butaanzi bwamwezi mutaanzi uleelede kwiimika cikombelo catente lyambunganino. 3-Bika mulincico ibbokesi lyamilao, alimwi usitilizye ibbokesi acisitilizyo. 4-Njizya intafule akwiibamba mbokweelede. Acalo cikazikilo camalampi, ucinjizye akwiimika malampi aaco. 5-Alimwi bika cipaililo cangolida cakutentela tununkilizyo kunembo lyabbokesi lyamilao, akwiimika cisitilizyo camulyango wacikombelo. 6Acalo cipaililo cazituuzyo uciimike kunembo lyamulyango wacikombelo catente lyambunganino. 7-Alimwi bika cisambilo akatikati katente lyambunganino acipaililo, ubike maanzi mulincico. 8Alimwi bamba lubuwa lwakuzyungulusya akubika cisitilizyo kumulyango walubuwa. 9-Lino bweza mafuta aakunanika, ukananike cikombelo azintu zyoonse zili mulincico. Ucisalazye azibelesyo zyaco zyoonse, zisalale. 10-Alimwi unanike cipaililo cazituuzyo azibelesyo zyaco zyoonse, ukasalazye cipaililo, aboobo cipaililo cilasalalisya loko. 11Acalo cisambilo atako lyaco, uzinanike akuzisalazya. 12-Wamana obo, leta Aroni abana bakwe kumulyango watente lyambunganino, ubasanzye amaanzi. 13-Lino samika Aroni zyakusama zisalalisya, alimwi umunanike akumusalazya, andibelekele milimo yabupaizi. 14-Abalo bana bakwe ubaswenye afwaafwi akubasamika zibaki, 15-alimwi ubananike mbubonya mbowananika wisaabo, kuti bandibelekele milimo yabupaizi. Kunanikwa kwabo kunoobapa bupaizi butamani mumazyalani aabo oonse,

16Lino Musa wakacita obo. Wakacita zintu zyoonse buyo nzyaakamulailila Jehova. 17-Nkabela mumwezi mutaanzi wamwaka wabili, mubuzuba butaanzi bwamumwezi, cikombelo cakaimikwa. 18Musa wakaimika cikombelo, wakakazika zikazikilo zyaco, waimika impanda zyaco, wabika minkulu yaco, waimika misumpululu yaco. 19Alimwi wakavungulula itente atala lyacikombelo, wacivumbya itente, mbubonya mbuli Jehova mbwaakalailila Musa. 20-Elyo wakabweza ibbuku lyamilao, walibika mubbokesi. Alimwi wakanjizya miziyo yabbokesi, akubika cuuno caluzyalo atala lyabbokesi. 21-Lino wakanjizya ibbokesi mucikombelo, waanzika cisitilizyo cakusitilizya ibbokesi lyacizuminano, mbubonya mbuli Jehova mbwaakalailila. 22-Alimwi wakabika intafule mutente lyambunganino, kulubazu lwacikombelo lwakunyika, anze lyacisitilizyo, 23nkabela wakabamba zinkwa alindilyo kubusyu bwa-Jehova, mbubonya mbuli Jehova mbwaakalailila Musa. 24-Alimwi wakabika cikazikilo camalampi mutente lyambunganino cilangene antafule, kulubazu lwakumusanza lwacikombelo, 25-nkabela wakabika malampi alincico kubusyu bwa-Jehova, mbubonya mbuli Jehova mbwaakalailila Musa. 26-Lino wakabika cipaililo cangolida mutente lyambunganino kunembo lyacisitilizyo, 27-watenta tununkilizyo tubotu alincico, mbubonya mbuli Jehova mbwaakalailila Musa. 28-Alimwi wakabamba cisitilizyo cakuvumbya mulyango wacikombelo. 29-Acalo cipaililo cazituuzyo wakacibika kumulyango wacikombelo catente lyambunganino, watuula alincico cituuzyo citentwa acituuzyo cabusu, mbubonya mbuli Jehova mbwaakalailila Musa. 30-Alimwi wakabika cisambilo akatikati katente lyambunganino acipaililo, wabika maanzi aakusamba mulincico, 31kuti Aroni abana bakwe basambe kumaanza akumaulu. 32-Kufumbwa ciindi nebakali kunjila mutente lyambunganino, nanka kuswena afwaafwi kucipaililo, bakali kusamba, mbubonya mbuli Jehova mbwaakalailila Musa. 33-Alimwi wakaimika lubuwa lwakuzyungulusya cikombelo acipaililo, akubika cisitilizyo cakusitilizya mulyango walubuwa, Aboobo Musa wakamanisya milimo yoonse,

34-Elyo ijoba lyakavumbilila itente lyambunganino, nkabela bulemu bwa-Jehova bwakazuzya cikombelo. 35-Musa wakakacilwa kunjila mutente lyambunganino, nkaambo kakuti ijoba lyakalikede ajulu, abulemu bwaJehova bwakazuzya cikombelo. 36-Lino mukweenda kwabo koonse, na ijoba lyakazwa kucikombelo, bana ba-Israyeli bakatola lweendo lwabo, 37-pele na ijoba teelyakagwisigwa, kabateendi pe mane kusikila kubuzuba bwakugwisigwa kwalyo. 38-Nkaambo ijoba lya-Jehova lyakalikede acikombelo ciindi casikati, amulilo ciindi camasiku, mumeso aaluzubo lwa-Israyeli, mukweenda kwabo koonse.