Search form

Kulonga 5

Farao mbwaakaindilila kulemezya bamu milimo miyumu

1-Lino kusule lyayaaya, Musa a-Aroni bakaya kuli-Farao akumwaambila kuti, Mbuboobu mbwaamba Jehova Leza wa-Israyeli, Leka bantu bangu, baye kuyoondicitila ipobwe munkanda. 2-Pele Farao wakati, Ma! Nguni Jehova? Sa ndakonzya kuswiilila ijwi lyakwe akuleka ba-Israyeli? Nsizi Jehova na nguni, abalo ba-Israyeli nsikoobaleka pe. 3-Lino bakati, Leza waba-Hebrayo waswanaana aswebo, Utuleke, tutole lweendo lwamazuba otatwe kuya munkanda, tupailile Jehova Leza wesu, kuti atatuumyi malwazi na ipanga. 4-Pele mwami wa-Egepita wakabaambila kuti, Nywebo, Musa a-Aroni, mwalesezyanzi bantu kubeleka? Kamuya kumilimo yanu. 5-Alimwi Farao wakati, Ncobeni sunu bantu banyika bavula, lino mulabalesya milimo yabo. 6-Lino mubuzuba obo mbubonya Farao wakalailila basikubelesya bantu abasilutwe babo kuti, 7Mutapi bantu limbi bwizu bwakuumya zitina, mbumwali kucita mazuba aakainda. Baye kuyoomwa beni. 8Nekubaboobo mweelwe wazitina ngubakali kucita, bacicite mbubonya obo, Mutacesyi mweelwe pe, nkaambo mbatolo; nciceeco ncibalilila cakuti, Katuya, tukapailile Leza wesu. 9Bantu balemezegwe milimo miyumu, baicite, batabiki myoyo yabo kumajwi aakubeja.

10-Bamvwe obo, basikubelesya bantu abasilutwe babo bakaambila bantu kuti, Mbuboobu mbwaamba Farao. Nsikoomupa limbi bwizu. 11Kamuya, mukamwe bwizu nobeni kufumbwa nkomukonzya kubujana. Nekubaboobo milimo yanu tiielede kuceya, pe, abuniini. 12Mpawo bantu bakamwaika munyika yoonse ya-Egepita kuyooyandaula zisikosiko zyabwizu. 13Abalo basikubabelesya bakali kubafwanzya-fwanzya cakwaamba kuti, Amumanisye milimo yanu, milimo iielede yabuzuba bumwi abumwi mbubonya mbumwakali kucita nemwakajisi bwizu. 14-Abasilutwe babana baIsrayeli, basikubabelesya ba-Farao mbobakabikide, bakaumwa, Bakabuzigwa kuti, Nkaambonzi tamuna kumanisya mweelwe wanu wazitina sunu mbumwakali kucita muciindi cakamana? 15Elyo basilutwe babana ba-Israyeli bakaakulila kuli-Farao, bati, Ino nkaambonzi notucitila obo tobalanda bako? 16Tobalanda bako tatupegwi bwizu, nekubaboobo balatwaambila kuti, Amubumbe zitina. Swebo tobalanda bako tulaumwa, anukuti mulandu uli kubantu bako omwini. 17Wakati, Muli batolo, muli batolo, aboobo mulaamba kuti, Katuya, tukapailile Jehova. 18Lino kamuya, mukabeleke. Bwizu tamukooyoobupegwa pe, nekubaboobo muleelede kuzulizya mweelwe wazitina. 19Elyo basilutwe babana ba-Israyeli bakabona kuti makani abija, nkaambo bakaambilwa kuti, Tamukonzyi kuceesya mweelwe wazitina wabuzuba bumwi abumwi, tamukonzyi kuceesya abuniini. 20Nkabela nebakaswanaana a-Musa a-Aroni, ibakali kubalindila ciindi cakuzwa kuli-Farao, 21-bakabaambila kuti, Jehova alange, abeteke makani esu, nywebo aswebo, nkaambo mwasampauzya bwema bwesu mumeso aa-Farao amumeso aabalanda bakwe. Wabika ipanga mumaanza aabo, kuti batujaye.

22-Mpawo Musa wakapiluka kuli-Jehova, wati, O Mwami, nkaambonzi wacitila bantu aba bubi? Nkaambonzi nowakandituma? 23-Kuzwa kuciindi eco nindakataanguna kusika kuli-Farao kuzooamba muzina lyako, wacitila bantu aba bubi. Kuvuna tona kuvuna bantu bako pe.