Search form

Kulonga 7

Musa a-Aroni mbubakacita zitondezyo kubusyu bwa-Farao

1-Lino Jehova wakaambila Musa kuti, Bona! Ndakubika ube mbuli Leza kuli-Farao, alakwe munyoko Aroni uyooba musinsimi wako. 2Uleelede kwaamba zyoonse nzendakwaambila. Munyoko Aroni ulaambila Farao kuti aleke bana ba-Israyeli, bazwe mucisi cakwe. 3-Pele njooyumya moyo wa-Farao, aboobo njoovuzya zitondezyo zyangu amalele aangu munyika ya-Egepita. 4-Farao uyookaka kumumvwa, aboobo njoobika ijanza lyangu ku-Egepita, nkabela njoopozya impi zyangu abantu bangu bana ba-Israyeli kuzwa kunyika ya-Egepita ambeta impati. 5-Lino baEgepita bayooziba kuti ndime Jehova nenjootandabika ijanza lyangu ku-Egepita akupozya bana ba-Israyeli kuzwa akati kabo. 6Mpawo ba-Musa a-Aroni bakacita obo. Bakacita mbubonya mbuli Jehova mbwaakabalailila. 7-Musa kajisi myaka iili makumi aali musanu aatatu, alakwe Aroni kajisi myaka iili makumi aali musanu aatatu aitatu kuciindi eco nebakaambila Farao.

8Lino Jehova wakaambila ba-Musa a-Aroni kuti, 9-Farao aamwaambila kuti, Amupe citondezyo, uleelede kwaambila Aroni kuti, Bweza musako wako, uuwaale kumeso aa-Farao, elyo uyooba inzoka. 10-Mpawo ba-Musa a-Aroni bakainka kuli-Farao, bacita mbubonya mbuli Jehova mbwaakalailila. Aroni wakawaala musako wakwe kumeso aa-Farao akumeso aabalanda bakwe, nkabela wakaba inzoka. 11-Elyo Farao wakaita basongo abamucapi, nkabela abo basimabibo ba-Egepita abalo bakacita mbubonya kumabibo aabo. 12Bakawaala umwi aumwi musako wakwe ansi, elyo yakaba inzoka. Pele musako wa-Aroni wakamena misako yabo yoonse. 13-Lino moyo wa-Farao wakayuma, mbubonya mbuli Jehova mbwaakaamba,

Maanzi mbwaakasanduka kuba bulowa

14-Lino Jehova wakaambila Musa kuti, Moyo wa-Farao wayuma. Ulakaka kuleka bantu. 15-Koya kuli-Farao cifumo aakuya kumaanzi, ukamulindilile kunkomwe yalwizi. Amujanza lyako tola oyo musako iwakasanduka kuba inzoka. 16-Lino uleelede kumwaambila kuti, Jehova Leza waba-Hebrayo watutuma kulinduwe, wati, Leka bantu bangu, baye, bandimanine milimo munkanda, Pele tona kumvwa alino. 17-Mbuboobo mbwaamba Jehova. Mbuboobu mbokonzya kuziba kuti ndime Jehova. Bona! Musako oyu uuli mujanza lyangu ndauumya maanzi aali mulwizi, asanduke kuba bulowa. 18-Azyalo inswi zyoonse zyamulwizi zilafwa, alwizi lulanunka, nkabela ba-Egepita balasesemwa kunywa maanzi aamulwizi. 19-Lino Jehova wakaambila Musa kuti, Ambila Aroni kuti, Bweza musako wako, uvungulule ijanza lyako kumaanzi aa-Egepita, kumilonga yabo akulwizi lwabo akumaziba aabo akumikalo yabo yoonse, kuti maanzi abe bulowa. Munyika yoonse ya-Egepita muyooba bulowa muzinywido zyoonse, niziba zinywido zyazisamu niziba zinywido zyamabwe.

20-Lino ba-Musa a-Aroni bakacita mbubonya mbuli Jehova mbwaakalailila, Wakabweza musako, wauma maanzi aamulwizi, mumeso aa-Farao amumeso aabalanda bakwe, nkabela maanzi oonse aamulwizi akasanduka kuba bulowa. 21Azyalo inswi zyamulwizi zyakafwa, alimwi lwizi lwakanunka. Ba-Egepita bakakacilwa kunywa maanzi aamulwizi. Mucisi coonse buyo ca-Egepita mwakali bulowa. 22Pele basimabibo ba-Egepita abalo bakacita mbubonya abo amabibo aabo, aboobo moyo wa-Farao wakayuma, nkabela wakakaka kubaswiilila, mbubonya mbuli Jehova mbwaakaamba. 23-Elyo Farao wakafutamuka, wanjila muŋanda yakwe, katabiki moyo wakwe kumakani aya. 24Nkabela ba-Egepita boonse bakali kusya mikalo yakunywa maanzi kumbali alwizi, nkaambo bakakacilwa kunywa maanzi aamulwizi. 25Elyo kwakamana mazuba aali musanu aabili, Jehova naakamana kusofwaazya lwizi.