Search form

Kulonga 8

Ba-Egepita mbubakapenzegsua abacaande

1-Lino Jehova wakaambila Musa kuti, Njila muli-Farao, ukamwaambile kuti, Mbuboobu mbwaamba Jehova. Leka bantu bangu, baye, bandi­ kombe. 2-Na wakaka kubaleka, mebo ndauma nyika yako abacaande. 3-Lwizi lulazula bacaande. Balazwa nkuko, akunjila muŋanda yako, amukaanda kako kakoona, aatala lyabulo bwako oonse, amumaanda aabalanda bako, aakati kabantu bako, amuziko zyako, amuzyaambikwa zyako. 4Alinduwe aabantu bako aabalanda bako boonse buyo, bacaande balamusikila. 5-Elyo Jehova wakaambila ba-Musa a-Aroni kuti, Tandabika ijanza lyako amusako wako atala lyamilonga alwizi amalambwa, kuti kuze bacaande munyika yoonse ya-Egepita. 6-Mpawo Aroni wakatandabika ijanza lyakwe atala lyamaanzi aa-Egepita, nkabela kwakasika bacaande kuzuzya nyika yoonse ya-Egepita. 7-Pele basimabibo abalo bakacita mbubonya amabibo aabo akuleta bacaande munyika ya-Egepita,

8-Mpoonya awo Farao wakaita ba-Musa a-Aroni, wati, Amukumbile kuli-Jehova, kuti agwisye bacaande kulindime akubantu bangu, elyo ndaleka bantu kuti baye kuyoopaila kuli-Jehova. 9Lino Musa wakaambila Farao kuti, Mbubo, bulemu abube bwako. Kondaambila na ndeelede kukukumbilila lili, yebo abalanda bako abantu bako, kuti bacaande bamane kuzwa kulinduwe akumaanda aako, basyaale mulwizi amulike. 10-Wakati, Kube junza. Wakati, Ncibotu, kuyooba mbubonya mbuli majwi aako, kuti uzibe kuti taakwe naba omwe uuelene a-Jehova Leza wesu. 11Bacaande balazwa kulinduwe akumaanda aako akubalanda bako akubantu bako, balasyaala mulwizi luzutu. 12-Mpawo ba-Musa a-Aroni bakazwa kuli-Farao, nkabela Musa wakakwiilila Jehova nkaambo kabacaande mbaakabikilide Farao. 13Lino Jehova wakacita mbubonya mbuli mbwaakaamba Musa, nkabela bacaande bakafwa mumaanda amumbuwa amunyuunda. 14Elyo bakababungika muzilwi zilwi mane cisi cakanunka. 15-Pele Farao naakabona kuti wajana buyoyelo, wakayumya moyo wakwe, wakaka kubaswiilila mbubonya mbuli Jehova mbwaakaamba.

Ba-Egepita mbubakapenzegwa mansenya

16Lino Jehova wakaambila Musa kuti, Ambila Aroni kuti, Tandabika musako wako, uume bulongo bwaansi, kuti busanduke kuba mansenya mucisi coonse ca-Egepita. 17-Mpoonya awo Aroni waka cita obo: wakatandabika ijanza lyakwe amusako wakwe, wauma bulongo bwacisi, nkabela bwakasanduka kuba mansenya akati kabantu aakati kabanyama. Bulongo boonse bwacisi bwakaba mansenya mucisi coonse ca-Egepita. 18-Abalo basimabibo bakasoleka kucita mansenya mubucapi bwabo, pele bakakacilwa, aboobo kwakajanwa mansenya koonse koonse kubantu akubanyama. 19-Mpawo basimabibo bakaambila Farao kuti, Ngooyu munwe wa-Leza. Pele moyo wa-Farao wakayumisigwa, wakaka kubaswiilila, mbubonya mbuli Jehova mbwaakaamba.

Ba-Egepita mbubakapenzegwa mazi

20-Lino Jehova wakaambila Musa kuti, Fuma cifumo, ukaime kubusyu bwa-Farao, anooya kumaanzi, Uleelede kumwaambila kuti, Mbuboobu mbwaamba Mwami Jehova. Leka bantu bangu, baye, bandikombe. 21Na wakaka kuleka bantu bangu, bona! Ndamutumina, yebo abalanda bako abantu bako amumaanda aako, matanga matanga aamazi. Maanda aabaEgepita alazula mazi, aalo ansi mpobeenda. 22-Pele mubuzuba obo njooanzaanya cisi ca-Goseni, nkobakede bantu bangu, kuti kutabi mazi oko, kuti muzibe kuti ndime Jehova mukati kanyika. 23Njooanzaanya bantu bangu abantu bako. Eci citondezyo ciyooba junza. 24-Nkabela Jehova wakacita obo. Kwakasika matanga mapati aamazi muŋanda ya-Farao amumaanda aabalanda bakwe. Mucisi coonse ca-Egepita nyika yakanyonyooka nkaambo kamazi.

25Mpawo Farao wakaita ba-Musa a-Aroni, wati, Kamuya, mukapaile Leza wanu mumonya omuno munyika. 26Pele Musa wakati, Tacicitiki obo pe, nkaambo tulapaizizya Jehova Leza wesu zintu zisesemya ba-Egepira. Na twapaizya zintu zibasesemya kumeso aabo, sa tabakootufusa mabwe? 27-Tuleelede kutola lweendo lwamazuba otatwe kuya munkanda, kuti tuka-paile Jehova Leza wesu mbubonya mbwaatulailila. 28-Farao wakati, Mbubo, ndamuleka, kuti mukapaile Jehova Leza wanu munkanda, pele mutainki kule. Amundikumbilile. 29Musa wakati, Bona! Ndakusia buyo, ndakumbila kuli-Jehova, kuti junza agwisye matanga aamazi kuzwa kuli-Farao akubalanda bakwe akubantu bakwe. Pele Farao atatweeni limbi kukutaleka bantu kuti bakapaile Jehova. 30Mpawo Musa naakazwa kuliFarao, wakakumbila kuli-Jehova. 31-Nkabela Jehova wakacita mbubonya mbwaakaamba Musa. Wakagwisya matanga aamazi kuzwa kuli-Farao akubalanda bakwe akubantu bakwe. Taakwe neliba lyomwe lyakasyaala. 32-Nekubaboobo kuciindi eco acalo Farao wakayumya moyo wakwe, taakwe naakaleka bantu kuti baye.