Search form

Matalikilo 12

Abramu mbwaakalonga kuzwa ku-Harani kuya ku-Kanana

1-Lino Jehova wakaambila Abramu kuti, Kozwa munyika yako akucisi cabuzyale bwako akuluzubo lwauso, ukainke kucisi ncenti kutondezye, 2-Njoocita kuti ube musyobo mupati. Njookupa coolwe akulemya izina lyako, ube coolwe. 3-Kufumbwa muntu uukulongezya njoomulongezya, ayooyo uukusampaula Njoomusampaula. Alimwi mulinduwe misyobo yoonse yabantu iyoojana coolwe.

4Lino Abramu wakainka, mbubonya mbuli Jehova mbwaakamwaambila. Alakwe Loti wakainka awe. Nkabela Abramu kajisi myaka iili makumi aali musanu aabili amyaka yosanwe naakazwa ku-Harani. 5-Nkabela Abramu wakatolelela Sarai banakwe, a-Loti mwana wamwanike wakwe, ambono zyabo zyoonse nzibakavubide, abasiŋanda boonse mbobakajene ku-Harani, Bakainka kuya kunyika ya-Kanana, nkabela bakasika nkukonya oko kunyika ya-Kanana. 6-Lino Abramu wakainda akati kanyika mane wasika kuSekemu, kumubanga waku-More. Nkabela ba-Kanana bakacili munyika. 7-Lino Jehova wakalibonya kuli-Abramu, wakati, Nyika eyi njooipa lunyungu lwako. Elyo wakayakila Jehova cipaililo mpoonya awo Jehova mpaakalibonenya kulinguwe. 8Nkabela kuzwa oko wakalongela kucilundu cakujwe lya-Beteli, wayaka cilao cakwe nkuko, akatikati kaminzi yobile, Beteli kuuli kububbila, Ai kuuli kubuzwezuba. Aalo awo wakayakila Jehova cipaililo, wakomba muzina lya-Jehova. 9-Pele Abramu kaciya bweenda, kaciya buya kumusanza.

Abramu mbwaakaya ku-Egepita

10-Lino kwakaba ipamba munyika, nkabela Abramu wakainka ku-Egepita kuyookala-kala nkuko, nkaambo ipamba lyakabija munyika. 11-Lino naakasika afwaafwi kumugaano wa-Egepita, wakaambila Sarai mukaakwe kuti, Bona! Ndizi kuti uli mwanakazi mubotu uuebeka loko. 12-Ncobeni ba-Egepita, bakubona biyo, balaamba kuti, Ngooyu mwanakazi wakwe, Lino balandijaya, pele uwe balakusia. 13-Amba kuti, Ndime mucizi wakwe; aboobo makani alabota kulindime nkaambo kako. Muuya wangu upone nkaambo kanduwe. 14Lino Abramu naakasika ku-Egepita, ba-Egepita bakabona mwanakazi, babona kuti mubotu loko. 15-Nkabela bapati baFarao nebakamubona, bakamutembaula kubusyu bwa-Farao, aboobo mwanakazi wakatolwa kuŋanda ya-Farao. 16Alakwe Abramu wakacitilwa kabotu nkaambo kakwe, nkabela wakajana imbelele aŋombe ambongolo abazike abalanda banakazi ambongolo inzyazi ankamele.

17-Mpawo Jehova wakapenzya Farao abeŋanda yakwe mapenzi mapati nkaambo ka-Sarai muka-Abramu. 18-Lino Farao wakaita Abramu, wati, Ino ncinzi eci ncowandicitila? Nkaambonzi tokwe kundaambila kuti ngumukaintu wangu? 19Nkaambonzi nowakaamba kuti mucizi wangu? mane ndakamutola kulindime kuti abe mwanakazi wangu. Ncobeni ngumukaintu wako. Umutole, uinke awe. 20Nkabela Farao wakalailila bantu bakwe, nkabela bakamusindikizya, walo abanakwe aboonse mbaakali abo.