Search form

Matalikilo 13

Abramu a-Loti mbubakaanzaana

1Lino Abramu wakazwa ku-Egepita, walo abanakwe aboonse mbaakali abo a-Loti, wasika ku-Negebi. 2-Nkabela Abramu kali muvubi loko, kajisi iŋombe ansiliva angolida. 3Lino wakali kweendeenda kuzwa kuNegebi mane wakasika ku-Beteli, oko nkukonya nkwaakataanguna kuyaka zilao zyakwe, akatikati ka-Beteli a-Ai, 4-nkucakabede cipaililo ncaakayaka akutaanguna. Oko Abramu wakakomba muzina lya-Jehova. 5Alakwe Loti iwakali kweenda a-Abramu kajisi imbelele aŋombe amatente. 6-Nkabela nyika yakaceya; teebakakonzya kukala antoomwe pe, nkaambo kabajisi imbono zinji, aboobo bakakacilwa kukala antoomwe. 7-Lino kwakabuka inkondo akati kabasikweembela iŋombe zya-Abramu abasikweembela iŋombe zya-Loti. Kuciindi eco ba-Kanana aba-Perizi kabacikede munyika.

8-Elyo Abramu wakaambila Loti kuti, Wence kutabi inkondo akati kesu, yebo ambebo, abeembeli bako abeembeli bangu, nkaambo tuli bamukowa omwe. 9-Sa nyika yoonse tiili kubusyu bwako na? Atupambukane ambebo, Na ulayanda kuya kucimwesi, mebo ndaya kululyo; na ulayanda kuya kululyo, mebo ndaya kucimwesi. 10-Mpawo Loti wakatambya meso aakwe, wabona nkwaalale yoonse ya-Jordano, wabona kuti, koonse koonse ili amaanzi. Kuciindi eco, Jehova natakalina kunyonyoona Sodoma a-Gomora, yakali mbubonya mbuli muunda wa-Jehova, mbuli nyika ya-Egepita noya ku-Zoari. 11Lino Loti wakalisalila inkwaalale yoonse ya-Jordano, watozya kujwe. Mbuboobo mbubakaanzaana amweenzinyina. 12-Abramu kakede munyika ya-Kanana; Loti kakede muminzi yankwaalale, kaya buyakayaka zilao zyakwe mane wakasika ku-Sodoma. 13-Pele bantu ba-Sodoma bakali basizibi, bakali babi loko kumeso aa-Jehova,

14-Lino Jehova wakaambila Abramu, naakamana kwaanzaana a-Loti, wati, Tambya meso aako, ubone koonse koonse kuzwa mpobede, kunyika akumusanza, kujwe akumbo, 15-nkaambo nyika yoonse njowabona, njoipa nduwe alunyungu lwako, mane kukabe kutamani. 16-Njoovuzya lunyungu lwako, lube mbuli lusuko lwaansi. Na muntu ulakonzya kubala lusuko lwaansi, lino lunyungu lwako alwalo luyoobalika. 17Buka, koya bweendeenda mubulumfu boonse bwanyika akubwaamba bwayo boonse, nkaambo njooipa nduwe. 18Mpawo Abramu wakalonzya itente lyakwe, wiinka, waakukala kumibanga ya-Mamre iili ku-Hebroni, nkabela wakayakila Jehova cipaililo mpoonya awo.