Search form

Matalikilo 15

Cizuminano Leza ncakatangana a-Abramu

1-Amane makani ayo, ijwi lya-Jehova lyakasika kuli-Abramu mucilengano, liti, Utayoowi, Abramu; ndime intobo yako, bulumbu bwako buyooba bupati loko. 2Pele Abramu wakati, O Mwami Jehova, uyoondipanzi? Nsijisi mwana, asikulya izina lyaŋanda yangu ngooyu Eliezere wakuDamasko. 3Alimwi Abramu wakati, Bona! Tondipede lunyungu, aboobo muzike wamuŋanda yangu nguuyoondilida izina. 4-Mpawo ijwi lya-Jehova lyakamusikila, liti, Oyu muntu takooyoolya izina lyako pe, mwanaako uuzyalwa mumaala aako nguuyoolya izina lyako. 5-Lino wakamutola anze, wati, Langa kujulu, ubale tunyenyeezi, na ulakonzya kutubala. Nkabela wakamwaambila kuti, Mbubonya obo mbuluyooba lunyungu lwako. 6-Mpawo wakasyoma Jehova, nkabela lusyomo lwakwe lwakeelezegwa mbuli bululami.

7-Lino wakamwaambila kuti, Ndime Jehova iwakakugwisya ku-Uri wamucisi caba-Kasidi, kuti nkupe nyika eyi, uivube. 8-Pele wakati, O Mwami Jehova, ndaziba buti kuti njooivuba. 9Wakamuvwiila kuti, Undiletele impwizi iili amyaka yotatwe, impongo iili amyaka yotatwe, mugutu uuli amyaka yotatwe, inziba ankwilimba. 10Elyo wakamuletela ezi zyoonse, wazyaandula akati, wabika cipanzi cimwi acimwi kucipanzinyina, pele bayuni takwakabaandula pe. 11Lino makubi naakaseluka kuzoolya nyama, Abramu wakaatanda.

12-Lino nekwakaba kumabbililo aazuba, ŋonzi zyakamujaya Abramu, alimwi wakawidwa mudima uusia mbi uuyoosya. 13-Elyo wakaambila Abramu kuti, Koziba calusinizyo kuti, basilunyungu lwako bayooba beenzu mucisi cimbi. Oko bayooba bazike, nkabela bayoobapenzya myaka iili myanda yone. 14-Pele oyo musyobo uubanjizya mubuzike njooubeteka, lino kusule lyaceeci bayoopola ambono zinji. 15-Ayebo, uyoosika kulibamauso caluumuno, uyoozikwa muboongozi bubotu. 16-Nkabela bayooboola okuno mumusela wane, nkaambo milandu yaba-Amori tiina kuzula,

17Lino izuba nelyakamana kubbila, kwakasia mbi, nkabela kwakaboneka mulilo uusuka alampi lyamulilo, zyakainda akatikati kazipanzi. 18-Mubuzuba obo Jehova wakatanga cizuminano a-Abramu, wati, Lunyungu lwako ndalupa nyika eyi, nkokuti nyika yoonse kuzwa kumulonga wa-Egepita kusikila kumulonga mupati, mulonga Firate, 19nyika yaba-Keni ayabaKenizi ayaba-Kadimoni, 20ayaba-Hiti, ayaba-Perizi, ayaba-Refaimu, 21ayaba-Amori, ayaba-Kanana, ayaba-Girigasi ayaba-Jebusi.