Search form

Matalikilo 2

Leza mbwaakalyokezya buzuba bwamusanu aabili

1Lino ijulu anyika zyakamana, azyoonse zili mumo. 2-Nkabela mubuzuba bwamusanu aabili Leza wakaleka milimo yakwe njaakacitide. Mubuzuba obo bwamusanu aabili wakalyokezya kuzwa kumilimo yakwe yoonse njaakacita. 3-Aboobo Leza wakakondezya buzuba bwamusanu aabili akubusalazya, nkaambo mulimbubo wakalyokezya kuzwa kumilimo yakwe yoonse Leza njaakalenga akucita.

Muunda wa-Edeni

4Ngaaya makani aajulu anyika mbuzyakatalika nizyakalengwa, Mubuzuba obuya Jehova Leza naakacita nyika ajulu, 5-ziziki zyamusokwe zyoonse nizyatakalina kuboneka munyika, amisamu yamusokwe niyatakalina kumena, (nkaambo Jehova Leza katana kuwisya imvula anyika, alimwi katakwe muntu wakupanda nyika, 6pele mwakazwa izambangulwe munyika, lyakali kutetya nyika yoonse), 7-Jehova Leza wakabumba muntu, Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi. 8-Lino Jehova Leza wakalima muunda kujwe ku-Edeni, nkabela mpempawo mpaakabika oyo muntu ngwaakabumba. 9-Elyo Jehova Leza wakameneka mpoonya awo anyika misamu yoonse iiebeka kumeso amisamu mibotu yakulya. Awalo musamu wabuumi wakaumeneka akati kamuunda, amusamu wakuziba bubotu abubi.

10-Nkabela mumonya mu-Edeni mwakazwa mulonga wakuteteesya muunda, elyo wakapambukanya, waba zipanzi zyone. 11-Izina lyacitaanzi ngu-Pisoni, ncencico cizyunguluka nyika yoonse ya-Havila, ingolida nkwiibede. 12Ingolida yanyika eyo nimbotu, alimwi nkukonya oko kuli mundaalila amabwe mayandisi aaonukisi. 13Azina lyamulonga wabili ngu-Gihoni, ngonguwo uuzyunguluka nyika yoonse ya-Kusi. 14-Azina lyamulonga watatu ngu-Hidekeli, ngonguwo uutola kujwe ku-Asuri. Amulonga wane ngu-Firate. 15Lino Jehova Leza wakabweza oyo muntu, wamubika mumuunda wa-Edeni kuti aulime akuubamba. 16Nkabela Jehova Leza wakalailila muntu kuti, Misamu yoonse yamumuunda ncobeni uyooilya, 17cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.

18Lino Jehova Leza wakati, Tacili cibotu kuti muntu akale alike pe, Atumucitile sikumugwasya uumweelede. 19-Mpawo Jehova Leza wakabumba bulongo, wacita banyama boonse bamusokwe, abayuni boonse bakujulu, wabaleta kumuntu, abone na ulabaulika buti. Nkabela banyama boonse, kufumbwa mazina muntu ngaakabaulika, bakaulikwa mbubonya. 20Aboobo muntu wakaulika iŋombe zyoonse abayuni bakujulu abanyama boonse bamusokwe mazina. Nekubaboobo teekwakajaninwa muntu sikugwasya uumweelede. 21-Elyo Jehova Leza wakaoneka muntu iŋonzi impati, Nkabela naakacili mukoona, wakabweza kamwi katumpango twakwe, wasinka cipulo cako. 22-Lino ako kampango nkaakagwisya mumuntu, Jehova Leza wakakabumbya mwanakazi, wamuleta kumuntu. 23-Mpawo muntu wakaamba kuti, Ma! Ncobeni oyu ulijisi zifuwa mbubonya mbuli zifuwa zyangu anyama mbubonya mbuli nyama yangu. Uleelede kuulikwa mukaintu, nkaambo wazwa mumuntu. 24-Nkaambo kako mwaalumi uleelede kusia wisi abanyina akukakatila kumwanakazi wakwe, babe nyama yomwe buyo. 25-Nkabela boonse bobile bakali basizinswe, mwaalumi abanakwe, pele kabatakwe insoni.