Search form

Matalikilo 20

Abrahamu mbwaakacita ku-Gerari

1-Lino kuzwa oko Abrahamu wakalonga, waya kunyika ya-Negebi, waakukala akatikati ka-Kadesi a-Suri. Nkabela wakakala-kala mu­ Gerari. 2-Lino Abrahamu wakaamba aa-Sara mukaakwe kuti, Ngumucizi wangu, Mpawo Abimeleki mwami wa-Gerari wakatuma batumwa, watola Sara. 3-Nkabela Leza wakasikila Abimeleki muciloto camasiku, wati, Bona! Uli mufu buyo nkaambo kamwanakazi ngotolede, nkaambo ulikwetwe mwaalumi, 4-Nkabela Abimeleki katanaswanana awalo, aboobo wakaamba kuti, Akaka Mwami! Sa ulayanda kujaya musyobo uululeme? 5Sa teensi nguwe iwakandaambila kuti, Ngumucizi wangu? Alakwe mwanakazi wakaamba kuti, Ngumunyinandumi wangu. Cintu eci ncindacita, ndacicita amoyo uululeme amaanza aasalala. 6-Leza wakamwaambila muciloto kuti, Ambebo ndakaziba kuti wacicita amoyo uululeme. Nkaambo kako ndakakukasya kubisya kulindime, teendakakuzumizya kumuguma. 7-Lino bweedezezya muntu mwanakazi wakwe, nkaambo mulunguzi, Uyookukombela, aboobo uyoopona. Pele na wakaka kumubweedezya, zibisya kuti ncobeni ulafwa, webo aboonse mboli abo.

8Nibwakaca, Abimeleki wakafuma, waita balanda bakwe boonse, wabalwiida makani aya oonse. Nkabela bantu bakayoowa loko. 9-Elyo Abimeleki wakaita Abrahamu, wamubuzya kuti, Ino ncinzi eci ncowatucitila? Ndakabisyanzi kulinduwe? Nkaambonzi noyanda kutuletela, mebo acisi cangu, mulandu mupati. Wandicitila zintu ziteelede kucitwa. 10Alimwi Abimeleki wakaambila Abrahamu kuti, Waba anzi noyanda kucita cintu cili obo? 11-Lino Abrahamu wakamuvwiila kuti, Ndakacita obo nkaambo kakuti ndakali kuyeeya kuti, Ncobeni banti bakookuno tabayoowi Leza, balandijaya nkaambo kamukaangu. 12-Alimwi ngumucizi wangu ncobeni, nkaambo ngumwana wataata nekuba kuti tali mwana wabama, nkabela ndakamukwata. 13-Lino Leza naakandituntulisya kuzwa kuŋanda yataata, ndakamwaambila kuti, Mbuboobu mboelede kundigwasya. Kufumbwa oko nkutusika, amba kuti, Ngumunyinandumi wangu. 14-Mpawo Abimeleki wakabweza imbelele aŋombe abalanda balombe abasimbi, wapa Abrahamu, alimwi wakamubweedezya Sara mwanakazi wakwe. 15-Nkabela Abimeleki wakati, Bona! Nyika yangu ili kubusyu bwako, Kala kufumbwa kukubotela. 16-Alakwe Sara, wakamwaambila kuti, Bona! Ndapa munyinandumi wako mali aansiliva aali cuulu. Ncitanzyansoni kulinduwe akuliboonse mboli abo, makani aako alulame mumeso aabantu boonse. 17-Elyo Abrahamu wakakomba Leza, nkabela Leza wakaponya Abimeleki amwunakazi wakwe abalanda bakwe, nkabela bakazyala. 18-Nkaambo Jehova wakalisinkide inzyalilo zyoonse zyaluzubo lwa-Abimeleki nkaambo kamakani aa-Sara muka-Abrahamu.