Search form

Matalikilo 21

Izaka mbwaakazyalwa

1-Lino Jehova wakaswaya Sara, mbubonya mbwaakaambide, nkabela Jehova wakacitila Sara mbubonya mbwaakaamba. 2-Elyo Sara wakamima, wazyalila Abrahamu mwana mulombe mubucembele bwakwe, kuciindi ceelede Leza ncaakamwaambilide. 3-Nkabela Abrahamu wakaulika oyo mwanaakwe ngwaakazyalilwa, Sara ngwaakamuzyalila, izina lya-Izaka. 4-Mpawo Abrahamu wakapalula mwanaakwe Izaka naakajisi mazuba aali musanu aatatu aakuzyalwa, mbubonya mbuli Leza mbwaakamulailila. 5Abrahamu kajisi myaka iili mwanda, mwanaakwe Izaka naakazyalwa. 6-Lino Sara wakati, Leza wandipa cisesyo; kufumbwa uumvwa impuwo ulaseka ambebo. 7-Wakati, Nguni wakakonzya kwaambila Abrahamu kuti Sara uyoonyonsya bana? Nkaambo ndamuzyalila mwana mubucembele bwakwe.

Hagare a-Ismayeli mbubakatandsaa

8Elyo mwana wakakula. Cibe ciindi wakalesegwa, nkabela Abrahamu wakacita ipobwe ipati mubuzuba obo Izaka naakalesegwa. 9-Lino Sara wakabona mwana wa-Hagare mu-Egepita ngwaakazyalila Abrahamu ulaseka. 10-Mpawo wakaambila Abrahamu kuti, Tanda oyu mwanakazi muzike amwanaakwe, nkaambo mwana wamuzike oyu takooyooba alukono antoomwe amwanaangu Izaka. 11-Lino makani akabija loko mumeso aa-Abrahamu nkaambo kamwanaakwe. 12-Pele Leza wakaambila Abrahamu kuti, Makani atabiji mumeso aako. Utalipenzyi nkaambo kamwanaako amwanakazi muzike wako. Zyoonse buyo Sara nzyaakwaambila, swiilila ijwi lyakwe muzintu zyoonse, nkaambo muli-Izaka moziyooambwa imbuto zyako. 13-Alakwe mwana wamwanakazi muzike, njoocita kuti abe cisi cipati, nkaambo nimbuto yako. 14-Lino nibwakaca, Abrahamu wakafuma, wabweza zinkwa ankomo yamaanzi, wapa Hagare, wazibika akuko lyakwe, amwana, aboobo wakamutanda. Nkabela naakainka, wakali kuya bweendeenda munkanda ya-Bcereseba,

15-Lino maanzi aamunkomo naakamaninina, wakasowa mwana kunsi lyaciteu cimwi, 16-waakukala alike kulekule, mbuli intaamu yamuvwi, nkaambo wakati, Ntaboni kufwa kwamwana. Wakakala bulangene awe, woomoka, walila. 17-Mpawo Leza wakamvwa ijwi lyamulombe, nkabela angelo wa-Leza wakaita Hagare kuzwa kujulu, wamwaambila kuti, Waba anzi, Hagare? Utayoowi, nkaambo Leza wamvwa ijwi lyamulombe awo mpabede. 18-Nyampuka, bweza mulombe, umujate kujanza, nkaambo njoocita kuti abe musyobo mupati. 19-Elyo Leza wakabbanuna meso aakwe, nkabela wakabona cikala camaanzi, wainka, wazuzya inkomo maanzi, wanywisya mulombe. 20-Lino Leza kali amulombe, nkabela naakakomena wakakala munkanda, waba simata. 21-Kakede munkanda ya-Parani, nkabela banyina bakamujanina mukazi munyika ya-Egepita.

Abrahamu mbwaakatanga cizuminano a-Abimeleki

22-Lino kuciindi eco Abimeleki a-Fikolo silutwe wampi yakwe bakaambila Abrahamu kuti, Leza uli ayebo muzintu zyoonse nzyocita. 23-Lino kondikonkela muzina lya-Leza mpoonya ano kuti tokooyoocita cakweena kulindime nikuba kubana bangu nikuba kulibasikamukowa bangu boonse. Mbubonya mbundakakufwida luzyalo, ayebo uleelede kucita mbubonya kulindime akucisi nkokala-kala. 24Abrahamu wakati, Ndakonka.

25-Lino Abrahamu wakanyontokela Abimeleki nkaambo kacikala camaanzi balanda ba-Abimeleki ncobakakasizye. 26Pele Abimeleki wakati, Nsizi na ngwani wakacita obo. Tokwe nowakandaambila pe, akumvwa nsina kunvwa pe mane sunu. 27-Mpawo Abrahamu wakabweza imbelele aŋombe, wapa Abimeleki, nkabela boonse bobile bakatangana cizuminano. 28Alimwi Abrahamu wakabweza intumbe zyambelele zili musanu azibili, wazibika zilike. 29-Lino Abimeleki wakabuzya kuli-Abrahamu kuti, Ino nkokutyeni ezi intumbe zili musanu azibili nzowabika zilike? 30-Wakavuwa kuti, Ezi intumbe zili musanu azibili, uleelede kuzitambula kumaanza aangu, zibe citondezyo cakuti ndime ndasya cikala eci. 31-Nkaambo kako kuntu oko kwakaulikwa izina lya-Beereseba, nkaambo nkonkuko boonse bobile nkubakakonkela. 32-Bakatangana cizuminano oko ku-Beereseba, elyo Abimeleki a-Fikolo silutwe wampi yakwe bakanyamuka, bapiluka kunyika yaba­-Filisti. 33-Lino Abrahamu wakazikila musika nkukonya oko ku-Beereseba, wakomba izina lya-Jehova Leza Uuteeli. 34Nkabela Abrahamu kakede munyika yaba-Filisti mazuba manji.