Search form

Matalikilo 24

Izaka mbwaakakwata Rebeka

1-Abrahamu wakacembaala, kali amyaka minji, nkabela Jehova kapede Abrahamu coolwe muzintu zyoonse. 2-Lino Abrahamu wakaambila mulanda wakwe, mupati wabasiŋanda bakwe, iwakali kulanga imbono zyakwe zyoonse, kuti, Bika ijanza lyako kunsi lyacibelo cangu; 3-lino ndakucita kuti ukonkezye muzina lya-Jehova Leza wakujulu a-Leza waansi kuti tokooyookwatya mwanaangu umwi wabana basimbi baba-Kanana mbenkede akati kabo. 4-Uleelede kuya kucisi cangu akuluzubo lwangu, ukajanine mwanaangu Izaka mukazi nkukonya oko. 5Lino mulanda wakamwaambila kuti, Ambweni mwanakazi takonzyi kuzumina kunditobela kuza okuno kunyika ino, Sa ndeelede kupilusya mwanaako kucisi eco nkowakazwa, 6-Abrahamu wakamuvwiila kuti, Ne! Toelede kupilusya mwanaangu oko abuniini. 7-Jehova Leza wakujulu, iwakandigwisya munanda yataata amu nyika yabuzyalwe bwangu, iwakandaambila akukonka kuti, Njoopa lunyungu lwako nyika eyi, ulatuma angelo wakwe kunembo lyako, nkabela uyoobwezela mwanaangu mukazi kuzwa oko. 8-Pele na mwanakazi tazumini kukutobela, yooangunuka kuzwa kucikonke cangu. Toelede kupilusya mwanaangu oko pe. 9Mpawo mulanda wakabika ijanza lyakwe kunsi acibelo-ca-Abrahamu simalelaakwe, wakonkezya mumakani aya.

10-Lino mulanda wakatolelelaikumi lyankamele zyasimalelaakwe, wainka, waya azintu zibotu zyoonse zyasimalelaakwe mujanza lyakwe. Wakanyamuka, waya ku-Mesopotamiya kumunzi wa-Nahori. 11-Nkabela wakafugamya inkamele anze amunzi kumbali kucikala camaanzi Kuciindi camangolezya, banakazi nibakali kuteka maanzi. 12-Nkabela wakaamba kuti, O Jehova, Leza wasimalelaangu Abrahamu, undipe coolwe buzuba obuno akucitila simalelaangu Abrahamu caluzyalo. 13Bona! Ndiimvwi kumbali akasensa kamaanzi, abana basimbi babantu bamunzi baleza kukuteka maanzi. 14-Lino na ndaambila musimbi kuti, Wence sendeka inongo yako, nywe alimwi oyo musimbi ulaamba kuti, Nywa, nkabela njootekela inkamele zyako azyaloabe ngonguwe ngosalilide mulanda wako Izaka. Mbuboobo mbunjooziba kuti wacitila simalelaangu luzyalo.

15-Lino naakatalina kumana kwaamba, kwakasika Rebeka, ngonguwe iwakazyalilwa Betueli mwana wa-Milika muka-Nahori muzyalwanyina Abrahamu. Wakeza anongo yakwe akuko lyakwe. 16-Oyo musimbi keebeka loko, alimwi kali nakalindu, katana kweebwa mwaalumi, Nkabela naakasika kukasensa, wakazuzya nongo yakwe, wazwa. 17-Mpawo mulanda wakazuzaana kuyoomuswana, wati, Wence undinywisye twaanzi munongo yako. 18-Wakavuwa kuti, Nywa, mwami. Nkabela wakafwambaana kusendeka nongo yakwe mujanza lyakwe, wamunywisya. 19Amane kumunywisya, wakati, Ndatekela inkamele zyako azyalo, mane zimane kunywa zyoonse. 20Mpawo wakafwambaana kutulida nongo yakwe mucinywido, wazuzaanina kucikala kukuteka alimwi. Nkabela wakatekela inkamele zyoonse. 21-Lino muntu wakali kumulangisya cakuumuna, wali kulindila kuziba na Jehova wabotezya lweendo lwakwe na pe,

22-Lino inkamele nizyakamana kunywa, muntu wakabweza kasi ta kangolida ikakali abulemu bwacisela casyekeli, ankaya zyobile zyakusamika maboko aakwe izyakali abulemu bwamasyekeli aali ikumi. 23Nkabela wakabuzya kuti, Wence undaambile na uli mwana wani? Sa tulakonzya kujana busena bwakoona kuliuso? 24Wakavuwa kuti, Ndime mwana musimbi waBetueli, mwana wa-Milika ngwaakazyalila Nahori. 25-Alimwi wakati, Bwizu nkubuli kulindiswe, azilyo zinji, abusena bwakoona. 26-Mpawo muntu wakakotama, wakomba Jehova, 27-wati, Alumbwe Jehova Leza wasimalelaangu Abrahamu! Tana kuleka buuya bwakwe alusyomo lwakwe kulisimalelaangu. Lino mebo, Jehova wandeenzya munzila, wandisisya kuŋanda yamunyina simalelaangu.

28Lino musimbi wakazuzaana, walwiida basiŋanda babanyina aya makani. 29-Nkabela Rebeka kajisi munyinandumi, izina lyakwe kali Labani. Oyo Labani wakazuzaanina kucikala muntu nkwaakabede. 30Abone buyo kasita ankaya zyakumaboko aamucizi wakwe, alimwi naakamvwa majwi aa-Rebeka mucizi wakwe aakuti, Mbuboobu muntu mbwaandaambila, wakainka oko muntu nkwaakabede. Wakamujana uliimvwi kunembo lyankamele kukasensa. 31-Mpawo wakati, Njila, webo opedwe coolwe kuliJehova! Nkaambonzi noima anze? Ndabamba iŋanda abusena bwankamele. 32-Elyo muntu wakanjila waangununa inkamele, Nkabela wakaleta bwizu abulilu bwankamele, amaanzi kuti asambe kumaulu, walo abantu mbaakeza abo. 33-Mpawo wakabambilwa zyakulya, pele wakati, Nsikoolya, cita ntaangune kwaamba makani aangu, Wakati, Amba.

34Lino wakaamba kuti, Ndime mulanda wa-Abrahamu. 35-Jehova ulipede. Simalelaangu coolwe cipati abulemu. Ulimupede imbelele aŋombe, insiliva angolida, balanda baalumi abanakazi, ankamele ambongolo. 36-Lino Sara mukazi wasimalelaangu wakazyalila simalelaangu mwana mulombe naakacembaala, nkabela zyoonse nzyaajisi wazipa oyo mwana. 37-Lino simalelaangu wakandisungilizya kukonkezya kuti, Toelede kukwatya mwanaangu mwanakazi wabana basimbi baba-Kanana mbendikede abo munyika ino, pe. 38Uleelede kuya kunaada yataata akuluzubo lwangu, ukaselele mwanaangu nkuko, 39Mpoonya awo ndakaambila simalelaangu kuti, Ambweni mwanakazi tayandi kunditobela. 40-Pele wakati, Jehova ngunjenda awe ulatuma angelo wakwe kubusyu bwako kuti abotye lweendo lwako, mane ukajanine mwanaangu mukazi kuzwa kuluzubo lwangu akuŋanda yataata. 41-Wamana kucita obo waangunuka kucikonke cangu, Pele wasika kuluzubo lwangu, na tabakupi, mbubo, waangunuka kuzwa kucikonke cangu. 42-Lino sunu, nindasika kukasensa, ndaamba kuti, O Jehova Leza wasimalelaangu Abrahamu, na wabotya lweendo lwangu ndundatola, 43-bona! Ndiimvwi kumbali lyakasensa kamaanzi. Na kwasika kamwale kuzooteka maanzi, alimwi na ndamwaambila kuti, Kondinywisya twaanzi twamunongo yako, 44-na ulandaambila kuti, Nywa, nkabela ndatekela inkamele zyako azyalo—oyo abe mwanakazi Jehova ngwasalilide mwana wasimalelaangu. 45-Lino nindacili kwaamba mumoyo wangu, kwasika Rebeka, weza anongo yakwe akuko lyakwe, waya kukasensa kuti ateke, Mpawo ndamwaambila kuti, Wence undinywisye. 46Nkabela wafwambaana kusendeka nongo yakwe, wati, Nywa, nkabela ndatekela inkamele zyako azyalo. Aboobo ndanywa, azyalo inkamele zyanywa. 47-Mpawo ndamubuzya kuti, Ino uli mwana wani? Wavuwa kuti, Ndime mwana waBetueli mwana wa-Nahori, ngwaakamuzyalila Milika. Elyo ndamusamika kasita mumpemu yakwe ankaya amaboko aakwe. 48-Mpawo ndakotama, ndakomba Jehova, ndalumba Jehova Leza wasimalelaangu Abrahamu iwakandeenzya munzila iiluleme kuti nkwatye mwana wasimalelaangu mwana musimbi wamunyina. 49-Lino amundaambile. Sa mulacitila simalelaangu caluzyalo acakusyomeka? Na mwazumina na mwakaka, amundaambile, nkazibe inzila njinjeelede kutola, niiba yalulyo niiba yalumwensi.

50-Mpawo Labani a-Betueli bakavuwa kuti, Makani azwa kuli-Jehova: swebo tatukonzyi kwaamba cintu niciba comwe, niciba cibotu niciba cibi. 51-Bona! Ngooyu Rebeka. Komutola, akwiinka awe, abe mukazi wamwana wasimalelaako, mbubonya mbuli Jehova mbwaamba,

52Lino mulanda wa-Abrahamu, naakamvwa majwi aabo, wakavundama ansi, wakomba Jehova. 53-Nkabela mulanda wakagwisya zintu zyansiliva azintu zyangolida azyakusama, wapa Rebeka. Alakwe munyinandumi wakwe, abanyina, wakabapa zintu ziyandisi. 54-Lino bakalya akunywa, walo abantu mbaakali abo, nkabela bakoona nkukonya oko. Nibwakaca, bakabuka, elyo wakati, Amundisungule kuya kulisimalelaangu, 55Pele munyinandumi wakwe abanyina bakati, Musimbi kacikede kulindiswe mazuba mace nanka ikumi, Amana, ulaya. 56-Wakabaambila kuti, Mutandicelezyi, nkaambo Jehova wandipa coolwe mulweendo lwangu. Amundisungule, njiinke kulisimalelaangu. 57Bakati, Atwiite musimbi, tuswiilile mbwaamba mwini. 58Mpawo bakaita Rebeka, bamubuzya kuti, Sa ulayanda kwiinka amuntu oyo? Wakavuwa kuti, Ndainka. 59-Aboobo bakasungula Rebeka mucizi wabo asikumulela wakwe amulanda wa-Abrahamu abantu bakwe. 60-Nkabela bakalongezya Rebeka, bati, O mucizi wesu, koba banyina bazyuulu zyazyuulu zyabantu, alunyungu lwako luvube mulyango wabaabo balusulide. 61Mpawo Rebeka wakanyampuka abasimbi bakwe, batanta ankamele, batobela muntu oyo. Mbuboobo mulanda mbwaakatola Rebeka akwiinka awe.

62-Lino Izaka kalongede kuzwa ku-Cikala ca-Lahai-roi, kakede munyika ya-Negebi. 63-Nkabela Izaka wakali kuya bweendeenda musokwe ciindi cagoko; elyo naakatambya meso aakwe wakabona inkamele zileza. 64-Alakwe Rebeka wakatambya meso aakwe, wabona Izaka, elyo wakaseluka kuzwa kunkamele yakwe, 65-wabuzya mulanda kuti, Ino nguni oyu mwaalumi uuza bweendeenda musokwe kuzootuswanaanya? Mulanda wakati, Ngonguwe simalelaangu, Mpawo wakabweza kaputi, walivumba kumeso. 66Lino mulanda wakalwiida Izaka zintu zyoonse nzyaakacitide. 67Nkabela Izaka wakanjizya Rebeka mutente lya-Sara banyina. Wakatola Rebeka, abe mukazi wakwe, nkabela wakamuyandisya. Aboobo lzaka wakaumbulizigwa.