Search form

Matalikilo 25

Bana ba-Ketura

1Lino Abrahamu wakakwata aumwi mwanakazi, izina lyakwe kali Ketura. 2-Nkabela wakamuzyalila Zimirani, a-Jokisani, a-Medani, a-Midyani, a-Isibaki, a-Sua, 3Alakwe Jokisani wakazyala Seba a-Dedani. Abana ba-Dedani mbaaba: ba-Asuri aba-Letusi aba-Leumi. 4Abana ba-Midyani mbaaba: Efa a-Eferi a-Hanoki a-Abida a-Elidaa, Aba boonse kabali bana ba-Ketura. 5-Nkabela zintu zyoonse nzyaakajisi, Abrahamu wakazipa Izaka. 6-Bana babasimamambe Abrahamu mbaakajisi, Abrahamu wakabapa zipo akubamwaisya kuzwa kuli-Izaka mwanaakwe naakacili muumi, nkabela bakaya kujwe kunyika yakujwe.

Abrahamu mbwaakafwa

7Lino mazuba aabuumi bwa-Abrahamu ngaakapona akasika kumyaka iili mwanda amakumi aali musanu aabili amusanu. 8-Nkabela kumamanino, Abrahamu naakafwa, kali abucekulu bubotu, kacembeede loko, Elyo wakaya kulibasinsiku bakwe. 9-Lino Izaka a-Ismayeli bana bakwe bakamuzika musempo lya-Makipela kumuunda wa-Efroni mwana wa-Zohari mu-Hiti uuli kunembo lya-Mamre, 10-ngonguwo muunda Abrahamu ngwaakaulide kubana ba-Heti, Nkuko Abrahamu nkwaakazikwa a-Sara mukaakwe. 11-Lino Abrahamu naakamana kufwa, Leza wakalongezya Izaka mwanaakwe, Nkabela Izaka kakede ku-Cikala ca-Lahai-roi.

Bana ba-Ismayeli

12-Ngaaya mazyalani aa-Ismayeli mwana wa-Abrahamu, ngonguwe Hagare mu-Egepita mulanda wa-Sara ngwaakazyalila Abrahamu. 13Ngaaya mazina aabana ba-Ismayeli, balilembedwe mbubakazyalwa: mwana mutaanzi wa-Ismayeli kali Nebayoti, a-Kedara, a-Adibeli, a-Mibisamu, 14a-Misma, a-Duma, a-Masa, 15Hadada, a-Tema, a-Jeturi, a-Nafisi, a-Kedema, 16-Mbaabo bana ba-Ismayeli. Ngaayo mazina aabo mutunzuunzi twabo amumakalilo aabo, bami bali ikumi ababili muzisi zyabo. 17-Lino ngooyu mweelwe wamyaka yabuumi bwa-Ismayeli: myaka iili mwanda amakumi otatwe amusanu aibili, Elyo lumwi wakafwa, waya kulibasinsiku bakwe. 18-Bakali kukala koonse koonse kuzwa ku-Havila kusikila ku-Suri, kunembo lya-Egepita kulubazu lwakuya ku-Asuri.

Jakobo a-Esau mbubakazyalwa

19-Lino ngaaya mazyalani aa-Izaka mwana wa-Abrahamu. Abrahamu wakazyala Izaka, 20-nkabela Izaka naakaba amyaka iili makumi one, wakakwata Rebeka mwana musimbi wa-Betueli mu-Aramu waku-Padanaramu, mucizi wa-Labani mu-Aramu. 21-Nkabela Izaka wakakumbilila mukazi wakwe kuli-Jehova, nkaambo kali musundi, nkabela Jehova wakaswiilila, elyo Rebeka mukaakwe wakaminta. 22-Lino bana bakali kuzundana mwida lyakwe. Mpawo wakati, Na makani ali boobo, nkaambonzi nencipona? Lino wakaya kukubuzya kuli-Jehova. 23-Nkabela Jehova wakamwaambila kuti,

Muli misyobo yobile muzyalilo lyako;

Amikowa yobile iyoozwa mwida lyako.

Umwi musyobo uyoojata inguzu kwiinda musyobonyina,

Amupati uyoobelekela muniini milimo.

24Lino ciindi cakutumbuka nicakasika, kwakabonwa mayanga muzyalilo lyakwe. 25-Mutaanzi wakazwa kasalala, amubili akwe woonse kauli mbuli cibaki caboya, nkabela bakamuulika izina lya-Esau. 26-Musule lyayooyo kwakazwa mwanike wakwe, nkabela ijanza lyakwe lyakalijisi kasindi ka-Esau, aboobo bakamuulika izina lya-Jakobo. Nkabela Izaka kajisi myaka iili makumi aali musanu aumwi naakabazyala.

Esau mbicaakauzya bupati bakwe

27-Lino balombe nibakakula, Esau wakaba sikuvwima, bwizubwesaka, pele Jakobo kali muntu waamunzi. 28-Nkabela Izaka kayandisya Esau, nkaambo wakali kulya nyama yakwe, pele Rebeka kayandisya Jakobo.

29Cimwi ciindi Jakobo naakali kujika musinza, Esau wakazwa musokwe, ulikateede. 30Mpawo Esau wakaambila Jakobo kuti, Wence undisusuzye oyo musinza uusalala, nkaambo ndakataala. (Nciceeco ncaakapedwa izina lya-Edomu.) 31Jakobo wakavuwa kuti, Taanguna kunduuzizya bupati bwako. 32Esau wakati, Langa! Ndaamba kufwa. Obu bupati bulandigwasyanzi? 33-Elyo Jakobo wakati, Taanguna kukonka. Wakakonka, wauzizya Jakobo bupati bwakwe. 34-Mpawo Jakobo wakapa Esau insima amusinza wanyangu. Lino wakalya, wanywa, wanyampuka, waya. Mbuboobo Esau mbwaakasampaula bupati bwakwe.