Search form

Matalikilo 26

Izaka mbwaakakala-kala ku-Gerari

1-Lino kwakaba inzala munyika; (nkukuti inzala imbi, iteensi intaanzi yamumazuba aa-Abrahamu), nkabela Izaka wakainka kuli-Abimeleki mwami waba-Filisti ku-Gerari. 2-Lino Jehova wakamubonekela, wati, Utainki ku-Egepita pe, kala munyika njindakwaambila. 3-Kala-kala munyika ino, nkabela njooba ayebo, njookupa coolwe, nkaambo webo alunyungu lwako njoomupa zisi ezi zyoonse, aboobo njoozuzikizya cikonke ncindakakonka kuli-Abrahamu uso. 4-Njoovuzya lunyungu lwako mbuli inyenyeezi zyakujulu, alimwi njoopa lunyungu lwako nyika ezi zyoonse, elyo mulunyungu lwako zisi zyoonse moziyoojana coolwe, 5-nkaambo kakuti Abrahamu wakaswiilila ijwi lyangu akubamba imbeta zyangu, milazyo yangu, indayo zyangu amulao wangu.

6Lino Izaka wakakala ku-Gerari. 7-Nkabela bantu bakooko, nibakamubuzya makani aamukaakwe, wakati, Ngumucizi wangu. Wakayoowa kwaamba kuti, Ngumukazi wangu, nkaambo wakati, Ambweni bantu bakookuno balandijaya nkaambo ka-Rebeka, nkaambo kali aciwa cibotu. 8Lino nicakaba ciindi cilamfu, Abimeleki mwami waba-Filisti wakasondela mumpulungwizyo, nkabela wakabona Izaka ulasobana a-Rebeka mukaakwe. 9Mpoonya awo Abimeleki wakaita lzaka, waamba kuti, Ve! Ngumukazi wako. Waambilanzi kuti, Ngumucizi wangu? Izaka wakamuvwiila kuti, Ndakaamba kuti, Ambweni ndafwa nkaambo kakwe. 10-Lino Abimeleki wakaamba kuti, Ma! Ncinzi ncowakatucitila? Ambweni umwi wabantu bangu kaba lala amukaako, aboobo wali kunootuletela mulandu. 11-Mpawo Abimeleki wakalailila bantu boonse kuti, Kufumbwa muntu uuguma mwaalumi oyo amwanakazi wakwe, ncobeni ulafwa.

12-Lino Izaka wakalima munyika eyo nkabela mumwaka oyo nguwonya wakatebula camwanda, Jehova wakamupa coolwe, 13-aboobo muntu wakaba mupati, Wakali kuya bukomena lyoonse, mane lumwi wakaba mulemu loko. 14-Kajisi imbono zinji, imbelele aŋombe, abasimilimo banji, aboobo ba-Filisti bakamufwida ibbivwe. 15-(Lino zikala zyoonse balanda bawisi nzibakasya mumazuba aa-Abrahamu wisi, ba-Filisti bakazisinka akuzivwikila.) 16-Nkabela Abimeleki wakaambila Izaka kuti, Atupambu-kane ayebo, nkaambo uli singuzu loko kwiinda ndiswe.

17Mpawo Izaka wakalonga kuzwa nkuko, waakuyaka zilao mukuti lya-Gerari akukala mpoonya awo, 18-Nkabela Izaka wakafumbulula zikala zyamaanzi nzibakataangwine kusya mumazuba aa-Abrahamu wisi, nkaambo ba-Filisri bakalizisinkide musule lyalufu lwa-Abrahamu. Nkabela wakazipa mazina ayo ngaonya ngaakazipede wisi. 19Pele balanda ba-Izaka, niba-kafumba mudonga akujana kasensa kamaanzi aacomoka, 20-basikweembela baku-Gerari bakakazyanya abasikweembela ba-Izaka, bati, Maanzi ngeesu. Lino cikala eco wakacuulika izina lya-Eseki (Inkondo), nkaambo bakali kukazyanya awe. 21Elyo bakasya cikala acimwi. Acalo bakali kucilwanina, nkabela wakacuulika izina lya-Sitina. 22-Kuzwa oko wakalonga, waakusya cikala acimwi, Lino eco, teebakali kucilwanina pe, Nkaambo kako wakacuulika izina lya-Rehoboti, nkaambo wakati, Lino Jehova watupa busena kuti tuvule munyika.

23Kuzwa oko wakainka ku-Beereseba. 24-Lino Jehova wakamubonekela masiku ayo ngaonya, wati, Ndime Leza wa-Abrahamu uso. Utayoowi, nkaambo ndi ayebo. Njookupa coolwe akuvuzya lunyungu lwako nkaambo kamulanda wangu Abrahamu. 25-Elyo wakayaka cipaililo nkukonya oko, wakomba izina lya-Jehova, wayaka cilao cakwe nkukonya. Akwalo balanda ba-Izaka bakasya cikala.

Izaka mbwaakatangana cizuminano a-Abimelehi

26-Mpoonya awo kwakamuswaya Abimeleki kuzwa ku-Gerari; wakeza a-Ahuzati mweenzinyina a-Fikolo silutwe wampi yakwe. 27-Lino Izaka wakababuzya kuti, Ino nkaambonzi mweza kulindime? Sa tamundisulide akunditanda kuzwa kulindinywe? 28-Bakavuwa kuti, Ncobeni twabonesya kuti Jehova uli ayebo, Lino twaamba kuti, Kube kukonka akati kesu, swebo ayebo, Atutangane ayebo cizuminano. 29-Kosyomezya kuti tokooyootucitila bubi, mbubonya mbuli iswe mbututana kukubisizya, nkaambo twakucitila bubotu bulike, alimwi twakaanzaana ayebo caluumuno. Sunu wajana coolwe kuli-Jehova. 30-Mpawo wakabacitila ipobwe. Bakaiya, banywa. 31-Nibwakaca, bakafuma, bakonkezyanya. Bamane kucita obo, bakalayana a-Izaka, bainka kulimbabo caluumuno. 32Lino mubuzuba obo mbubonya balanda ba-Izaka bakeza kulinguwe kuzoomulwiida makani aacikala ncibakaside. Bakati, Twajana maanzi. 33-Lino wakacuulika izina lya-Siba. Nciceeco izina lyamunzi ncuuambilwa kuti ngu-Beereseba, mbucaambwa asunu.

34-Lino Esau naakajisi myaka iili makumi one, wakakwata Juditi mwana musimbi wa-Beeri mu-Hiti, a-Basemati mwana musimbi wa-Eloni mu-Hiti. 35-Aba bakakataazya myoyo ya-Izaka a-Rebeka.