Search form

Matalikilo 27

Rebeka a-Jakobo mbubakabbida Esau kulongezegwa kwakwe

1-Lino Izaka naakacemaala, alimwi meso aakwe akaba agubi, wakaita Esau mwanaakwe mupati, wati, Mwanaangu, Wakavuwa kuti, Mpondi. 2-Wakati, Bona! Ndacemaala, Nsizi buzuba bwalufu lwangu na buyooba lili. 3-Lino bweza zivwimyo zyako, inkomo yako abuta bwako, uinke musokwe, undijayile nyama, 4-undijikile nyama iili amunse mbubonya mbunjandisya, akwiileta kulindime, kuti ndye, nkakulongezye nencipona.

5Lino Rebeka wakali kuswiilila, ciindi eco Izaka naakali kwaambila mwanaakwe Esau, nkabela Esau naakainka musokwe kuyoovwima nyama akwiileta, 6Rebeka wakaambila Jakobo mwanaakwe kuti, Swiilila! Ndamvwa uso ulaambila mupati wako Esau, wati, 7Kondijayila nyama, undijikile nyama iili amunse, ndye, kuti nkulongezye muzina lya-Jehova nentana kufwa. 8-Mbubo, mwanaangu, swiilila ijwi lyangu akucita mbubonya mbunsi kulailile. 9Koya kutanga, ulete tupongo tobile tubotu, nkajikile uso nyama yamunse mbuli mbwayanda. 10-Lino uleelede kwiitola kuli uso, alye, akulongezye naatana kufwa. 11-Mpawo Jakobo wakaambila banyina Rebeka kuti, Bona! Mupati wangu Esau ngusimavwele, mebo ndinkwizinge. 12-Ambweni taata ulandaampa-ampa, lino njooba mbuli sikweena mumeso aakwe, aboobo njooliletela loombololo, nsikooyooliletela lukondezyo pe. 13-Banyina bakamwaambila kuti, Loombololo lwako lube alindime, mwanaangu. Koswiilila buyo ijwi lyangu; koya, ukazilete. 14-Mpawo wakainka, wazibweza, wazileta kulibanyina, nkabela banyina bakajika nyama yamunse mbubonya mbuli wisi mbwaakali kuyandisya. 15-Lino Rebeka wakabweza zyakusama zibotu zya-Esau mwanaakwe mupati, nzyaakajisi muŋanda, wazisamika Jakobo mwanaakwe muniini. 16Azyalo zikutu zyatupongo, wakazisamika kumaanza aakwe, akunsingo yakwe nkwaakali nkwizinge, 17elyo nyama yamunse ansima njaakajikide wakazibika mumaanza aaJakobo mwanaakwe.

18Lino wakanjila mwaakabede wisi, wati, Taata! Wakavuwa kuti, Mpondi.

Nduweni, mwanaangu? 19-Nkabela Jakobo wakaambila wisi kuti, Ndime Esau, mwanaako mutaanzi, Ndacita mbubonya mbowandaambila. Buka, ukale, ulye nyama yangu, undilongezye. 20-Elyo Izaka wakaambila mwanaakwe kuti, Ino wafwambaana buti kwiijana, mwanaangu? Wakavuwa kuti, Nkaambo kakuti Jehova Leza wako wandipa coolwe. 21-Lino Izaka wakaambila Jakobo kuti, Swena afwiifwi, kuti nkwaampa-ampe, mwanaangu, nzibe na ncobeni nduwe mwanaangu Esau na pe. 22Mpawo Jakobo wakaswena afwaafwi kuli-Izaka wisi, nkabela wakamwaampa-ampa. Lino wakati, Ijwi ndijwi lya-Jakobo, pele maanza ngaa-Esau. 23-Takwakamuziba pe, nkaambo maanza aakwe akali mbuli maanza aa-Esau mukulana wakwe, akali aboya, aboobo wakamulongezya. 24-Wakamubuzya kuti, Sa ncobeni nduwe mwanaangu Esau? Wakati, Ndime. 25Elyo wakati, Swena kufwaafwi, kuti ndye nyama yamwanaangu, nkulongezye. Mpawo wakaswena kufwaafwi kulinguwe, nkabela wakalya. Alimwi wakamuletela waini, nkabela wanywa, 26Elyo Izaka wisi wakamwaambila kuti, Swena afwaafwi, undimyonte, mwanaangu. 27-Lino wakaswena afwaafwi, wamumyonta. Mpawo wakamvwa bweema bwazyakusama zyakwe, nkabela wakamulongezya, wati,

Bona bweema bwamwanaangu mbububede!

Buli mbuli bweema bwamuunda Jehova ngwaalongezya,

28-Leza akupe mume wakujulu,

Azintu zilweela zyaansi,

Amaila manji awaini.

29-Misyobo yabantu ikumanine milimo,

Amasi oonse akukotamine.

Koba mwami akati kamukowa wako,

Abalo bana babanyoko bakukotamine.

Abe alutuko kufumbwa uukutuka.

Abe acoolwe kufumbwa uukupa coolwe.

30Lino Izaka naakamana kulongezya Jakobo, Jakobo naakazwa buyo kuli­ Izaka wisi, mpoonya awo wakaboola Esau mukulana wakwe kuzwa mukuvwima. 31-Lino wakajika nyama yamunse alakwe, waletela wisi, waambila wisi kuti, Abuke taata, alye nyama yamwanaakwe, kuti undilongezye. 32Mpawo Izaka wisi wakamubuzya kuti, Ino nduweni? Wakavuwa kuti, Ndime mwanaako mupati, Esau. 33-Amvwe obo, Izaka wakakankama kukankama kupati loko. Wakabuzya kuti, Maawe! Ngwani oyo iwakajaya nyama akwiileta kulindime? Ndalya yoonse kotana sika, alimwi ndamulongezya, aboobo ngonguwe uuli acoolwe. 34-Elyo Esau, naakamvwa majwi aawisi, wakalila acililo cipati ciyoosya loko, waambila wisi kuti, Undilongezye, undilongezye ambebo, taata. 35-Wakati, Munyoko wakeza calweeno, wakubbida lulongezyo lwako. 36-Wakati, Ma! Ncobeni izina lyakwe lya-Jakobo lyamweelela, nkaambo wandilya kobile, Wakatola bupati bwangu, lino sunu watola lulongezyo lwangu. Sa tokwe nowandisyaazizya lulongezyo ambebo? 37-Izaka wakavwiila Esau kuti, Bona! Ndamubika kuti abe mwami wako, abasikamukowanyina boonse ndamupa mbabo kuti babe balanda bakwe, alimwi ndamusanizya maila awaini. Lino webo, mwanaangu, nkucitilenzi? 38-Esau wakaambila wisi kuti, Sa ulijisi lulongezyo lomwe buyo, taata? Undilongezye ambebo, taata, Nkabela Esau wakakwiila, walila. 39--Mpawo Izaka wisi wakamuvwiila kuti,

Ncobeni cikalilo cako ciyooba akati kazintu zilweela zyanyika,

Alume lwakujulu.

40-Uyoopona kupanga lyako,

Nkabela uyoomanina munyoko milimo,

Pele caakuba ciindi uyooangunuka,

Elyo uyoopwaya ijoko lyakwe ansingo yako.

41-Lino Esau wakali kusula Jakobo nkaambo kalulongezyo wisi ndwaakamulongezya, nkabela Esau wakaamba mumoyo wakwe kuti, Mazuba aakulila taata aswena afwaafwi, lino njoojaya Jakobo. 42-Nkabela Rebeka wakalwiidwa majwi ngaakaamba Esau mwanaakwe mupati, lino wakaita jakebo mwanaakwe muniini, wamwaambila kuti, Swiilila! Mukulana wako Esau ulakanza kukujaya. 43-Nkaambo kako mwanaangu, swiilila ijwi lyangu, Nyampuka, ucijile kuli-Labani munyinandumi wangu ku-Harani, 44ukakale kulinguwe mazuba mace, mane lumwi munyoko aleke bukali bwakwe. 45Naazooleka bukali bwakwe akuluba ncowamucitila, njootuma akukuboozya kuzwa nkuko, Sa cilabota na ndamulobelwa nyoonse nyobile mubuzuba bo mwe.

46-Lino Rebeka wakaambila Izaka kuti, Bandikataazya bana basimbi ba-Heti. Na Jakobo wakwata umwi wabana basimbi ba-Heti bali mbuli aba, umwi wabana basimbi bakookuno, buumi bwangu buyooba amilimonzi kulindime?