Search form

Matalikilo 28

Jakobo mbwaakatumwa ku-Padanaramu

1-Mpoonya awo Izaka wakaita Jakobo, wamulongezya, wamulailila kuti, Toelede kukwata mwanakazi wabana ba-Kanana pe. 2Buka, ukainke ku-Padanaramu, kuŋanda ya-Betueli wisi banyoko, ukakwate mwanakazi nkuko, umwi wabana basimbi ba-Labani mukulana wabanyoko. 3-Leza Singuzuzyoonse akupe coolwe, akuzyazye loko, akuvuzye, kuti ube mikowa minji. 4-Akupe lulongezyo lwa-Abrahamu, webo alunyungu lwako, ukavube nyika yabusimutuntuli bwako, Leza njaakapa Abrahamu. 5Mbuboobo Izaka mbwaakatuma Jakobo, nkabela wakainka ku-Padanaramu, kuli-Labani mwana wa-Betueli mu-Aramu, mukulana wa-Rebeka banyina Jakobo a-Esau,

6Lino Esau wakabona Izaka mbwaakalongezya Jakobo akumutuma kuPadanaramu kuti akwate mwanakazi wakooko, ambwaakamulailila mukulongezya kwakwe kuti, Toelede kukwata mwanakazi wabana basimbi ba-Kanana, 7alakwe Jakobo mbwaakaswiilila wisi abanyina akwiinka ku-Padanaramu. 8-Alimwi Esau naakabona kuti bana basimbi ba-Kanana mbabi mumeso aa-Izaka wisi, 9-Esau wakaya kuli-Ismayeli, waakukwata Mahalati mwana musimbi wa-Ismayeli mwana wa-Abrahamu, mucizi waNebayoti, waalikila banakazi mbaakakwete kale.

Ciloto ca-Jakobo ncaakalota ku-Beteli

10-Lino Jakobo wakazwa ku-Beereseba, watola inzila yakuya ku-Harani. 11Asike kubusena bumwi, wakalala nkuko, nkaambo izuba lyakamubbilila. Nkabela wakabweza limwi lyamabwe aakooko, walisegezya kumutwe wakwe, woona nkukonya oko. 12-Elyo wakalota. Muciloto cakwe wakabona itantilo liimvwi ansi, ampela yalyo yakasika kujulu, nkabela baangelo ba-Leza bakali kuya butanta akuseluka alindilyo. 13-Alakwe Jehova wakaliimvwi atala alyo, nkabela wakati, Ndime Jehova, Leza wa-Abrahamu uso, a-Leza wa-Izaka. Nyika eyi mpolede alinjiyo, ndaipa nduwe alunyungu lwako. 14-Nkabela lunyungu lwako luyoovula mbuli bulongo bwaansi, luyoomwaala kumbo akujwe akunyika akumusanza, alimwi mulinduwe amulunyungu lwako inzubo zyoonse zyanyika moziyoojana coolwe. 15-Bona! Ndi ayebo, njookubamba koonse nkoya, alimwi njookuboozya kunyika eyi. Nsikooyookulekelezya pe mane lumwi nkacite ncenambide. 16-Mpawo Jakobo wakasinsimuka, wati, Ncobeni Jehova mpali mpoonya ano, pele mebo teendezi. 17Nkabela wakayoowa, wati, Ma! Bulayoosya busena obuno! Ncobeni njeŋanda ya-Leza, ngomulyango wakujulu.

18Nibwakaca, Jakobo wakafuma, wabweza ibbwe elyo ndyaakalisegamizizye, waliimika kuti libe malende, watila mafuta amutwe walyo. 19-Lino obo busena, wakabuulika izina lya-Beteli, pele kukutaanguna izina lyamunzi kauli Luzi. 20-Elyo Jakobo wakakonka cikonke, wati, Na Leza wazumina kuba ambebo aku ndi bamba mulweendo olu nduntolede, alimwi ulandipa insima yakulya azikobela zyakusama, 21-akundiboozya caluumuno kuŋanda yataata, elyo Jehova uyooba Leza wangu, 22-alyalo ibbwe eli ndinjiimikide kuti libe male nde liyooba iŋanda ya-Leza. Alimwi kufumbwa nzondipa, ncobeni njooboozya cipanzi cakumi cazyo kulinduwe.