Search form

Matalikilo 30

1-Lino Rakele naakabona kuti tazyalili Jakobo bana, wakafwida mucizi wakwe ibbivwe. Nkabela wakaambila Jakobo kuti, Kondipa bana. Watandipa bana, ndafwa. 2-Mpawo bukali bwa-Jakobo bwakabukila Rakele. Wakati, Sa ime ndi mucibaka ca-Leza iwakukasya micelo yamwida? 3-Elyo wakati, Ngooyu mulanda wangu musimbi, Biliha. Koswanaana awe, akazyale amazwi aangu, kuti ambebo nkayakilwe luzubo kuzwa kulinguwe. 4-Aboobo wakamupa Biliha mulanda wakwe musimbi, kuti amukwate, nkabela Jakobo wakaswanaana awe. 5Lino Biliha wakaminta, wazyalila Jakobo mwana mulombe. 6-Mpawo Rakele wakaamba kuti, Leza wabeteka makani aangu, waswiilila ijwi lyangu, wandipa mwana mulombe. Nkaambo kako wakamuulika izina lya-Dani. 7Elyo Biliha mulanda musimbi waRakele wakaminta alimwi, wazyalila Jakobo mwana wabili. 8-Nkabela Rakele wakaamba kuti, Ndazundana amukulana wangu anzundano impati, ndazunda. Aboobo wakamuulika izina lya-Nafitali.

9Alakwe Leya, naakabona kuti waleka kuzyala, wakabweza mulanda wakwe musimbi Zilipa, wapa Jakobo, kuti amukwate. 10Lino Zilipa mulanda musimbi wa-Leya wakazyalila Jakobo mwana mulombe. 11Nkabela Leya wakati, Ndajana coolwe; aboobo wakamuulika izina lya-Gadi. 12Elyo Zilipa mulanda musimbi wa-Leya wakazyalila Jakobo mwana mulombe wabili. 13-Nkabela Leya wakati, Ndajana lukondo, nkaambo banakazi bazoondaamba kuti ngusilukondo. Aboobo wakamuulika izina lya-Aseri.

14-Lino kuciindi cakutebula bulotwe, Rubeni wakaya mumuunda, wajana micelo yakusinkula izyalilo, waileta kuli-Leya banyina. Mpawo Rakele wakaambila Leya kuti, Wence undipe imwi yamicelo yamwanaako. 15-Wakamuvwiila kuti, Sa ncintu ciniini buyo ncowandicitila kundinyanzya mulumi wangu? Sa ulayanda kundinyanzya ayalo micelo yamwanaangu? Nkabela Rakele wakamwaambila kuti, Mbubo, uyoolala ayebo masiku aya nkaambo kamicelo yamwanaako. 16Lino Jakobo naakazwa kumuunda ciindi camangolezya, Leya wakaya kuyoomucinga, wamwaambila kuti, Sunu uleelede kunjila kulindime, nkaambo ndakuula amicelo yamwanaangu. Aboobo wakalala awe masiku ayo. 17Lino Leza wakaswiilila Leya, nkabela wakaminta, wazyalila Jakobo mwana mulombe wasanu. 18Mpawo Leya wakati, Leza wandipa muulo wangu, nkaambo ndakapa mulumaangu mulanda wangu musimbi. Aboobo wakamuulika izina lya-Isakara. 19Elyo Leya wakaminta alimwi, wazyalila Jakobo mwana mulombe wamusanu aumwi. 20Mpawo Leya wakati, Leza wandaabila caabilo cibotu, Ncobeni lino mulumaangu ulandilemeka, nkaambo ndamuzyalila bana balombe bali musanu aumwi. Nkabela wakamuulika izina lya-Zebuloni. 21Kusule lyabaaba wakazyala mwana musimbi, wamuulika izina lya-Dina. 22-Mpawo Leza wakaibaluka Rakele. Leza wakamuswiilila akujalula izyalilo lyakwe. 23-Wakaminta, wazyala mwana mulombe, wati, Leza wamanisya lusampuko lwangu. 24-Nkabela wakamuulika izina lya-Josefa, wati, Jehova andiyungizizye mwana mulombe aumwi.

Jakobo mbwaakajana imbono kuli-Labani

25-Lino Rakele naakamana kuzyala Josefa, Jakobo wakaambila Labani kuti, Undileke, njiinke kulindime akunyika yangu. 26-Undipe banakazi bangu abana bangu mbendakakubelekela, njiinke, nkaambo ulizi mbwiibede milimo yangu njindakakubelekela. 27-Mpawo Labani wakamuvwiila kuti, Na ndabota mumeso aako, kala okuno, nkaambo ndakasonda, ndajana kuti Jehova wandipa coolwe nkaambo kako. 28-Alimwi wakati, Amba zyakuvola zyako mbuzyeelede kuba, lino ndakupa. 29-Jakobo wakati, Ulizi mbundakakubelekela, aŋombe zyako mbuzyakabede mumaanza aangu. 30-Nkaambo imbono zyako zyakali zice buyo nkentanasika, lino sunu zyavula loko, alimwi Jehova wakupa coolwe nkaambo kakuza kwangu. Pele njoobamba lili iŋanda yangu ambebo? 31Elyo wakamubuzya kuti, Nkupenzi? Jakobo wakati, Utandipi cintu niciba cimwi. Na wazumina kundicitila cintu eci buyo, njooboola kweembela matanga aako akwaabamba. 32-Ndainda sunu akati kamatanga aako, ndagwisya imbelele zyoonse zili abusaasa azili amyambo, atubelele toonse tusia, azyalo impongo zili abusaasa azili amyambo. Ezi nzeziyooba zyakuvola zyangu. 33-Mbuboobo bululami bwangu mbubuyooboneka mumazuba aaboola, waakusika kuzoolingula zyakuvola zyangu: kufumbwa impongo zitakwe busaasa na myambo, akabelele katasii, zyoonse ziyooambwa kuti nzyakubba na zyajanwa mumaanza aangu. 34Lino Labani wakaamba kuti, Mbubo. Akube mbubonya obo mboamba. 35Elyo mubuzuba obo mbubonya wakagwisya basijembwe boonse ibakajisi busaasa na myambo, ampongo zyoonse izyakajisi busaasa na myambo, azyoonse izyakali kutubatuba, atoonse tubelele tusiya, wazibika mumaanza aabana bakwe. 36Nkabela wakalyaandaanya a-Jakobo musinzo wamazuba otatwe, Lino Jakobo wakali kweembela imbelele zya-Labani izyakasyeede.

37-Mpawo Jakobo wakabweza inti zitete zyamiingili azyamuluba azya-muse, wazinyemba manywengwe aatuba, kuti kuboneke kutuba mumisamu. 38Lino inti ezyo nzyaakanyemba, wakazibika muzinywido imbelele mozyakali kunywida maanzi, kunembo lyambelele, nkabela imbelele zyakali kuminta nizyakeza kuzoonywa. 39Imbelele zyakali kuminta kunembo lyanti, aboobo zyakazyala zili abusaasa azili amyambo azili amabala mabala. 40Alimwi Jakobo wakaandaanya tubelele, nkabela wakalanzya meso aambelele kulizeezyo zili amabala mabala azisia mubu tanga bwa-Labani. Nkabela wakabika matanga aakwe alike, taakwe naakaabika antoomwe ambelele zyaLabani. 41Nkabela kufumbwa ciindi imbelele zitulumuka zyamubutanga nizyakali kuzyalana, Jakobo wakabika inti kumeso aambelele muzinywido, kuti zizyalane akati kanti, 42pele tudandala twambelele, taakwe naakatubikila inti pe, aboobo tudandala twakaba twa-Labani, zitulumuka zyakaba zya-Jakobo. 43-Aboobo muntu oyu wakaba muvubi loko, kajisi imbelele zinji, abalanda baalumi abanakazi, ankamele ambongolo.