Search form

Matalikilo 32

1-Alakwe Jakobo wakacili kuya butola lweendo lwakwe, nkabela baangelo ba-Leza bakaswanana awe. 2-Ababone buyo, Jakobo wakati, Njeeyi impi ya-Leza. Aboobo kuntu oko wakakuulika izina lya-Mahanaimu.

Jakobo mbwaakalibamba kuswanaana a-Esau

3-Lino Jakobo wakatuma batumwa kuti bamuzulwide kuyooswanaana a-Esau mukulana wakwe munyika ya-Seiri, cisi ca-Edomu. 4-Nkabela wakabalailila kuti, Mbuboobu mbumweelede kwaambila Esau simalelaangu. Mbuboobu mbwaamba mulanda wako Jakobo. Ndakakala-kala kuliLabani. Nkondakabede akusikila sunu. 5-Ndijisi iŋombe, imbongolo, imbelele, balanda abalanda basimbi. Lino ndatuma kukulwiida mupati wangu kuti nkafwidwe luzyalo kulinguwe.

6-Elyo batumwa bakaboola kuli-Jakobo, bati, Twakasika kumukulana wako Esau. Lino uleza kuzookuswanaana, uli abantu bali myanda yone. 7-Mpawo Jakobo wakayoowa loko akupenga. Nkabela bantu mbaakali abo, ambelele aŋombe ankamele zyoonse, wakababamba mumakoka obile, 8wati, Na Esau wasika kukoka lyomwe akulilwisya ikoka lisyeede liyoofutuka.

9-Lino Jakobo wakati, O Leza wa-Abrahamu taata, Leza wa-Izaka taata, Jehova iwakandaambila kuti, Bweeda kunyika yako akumukowa wako nkabela njookubamba kabotu, 10--mebo nsielede abuniini milimo yako yaluzyalo ayalusyomo njowandicitila ndemulanda wako. Nkaambo ndazubuka oyu Jordano amufunko wangu buyo, lino sunu ndaba makoka obile. 11-Wence kondivuna kuzwa kumaanza aamukulana wangu, kuzwa kumaanza aa-Esau, nkaambo ndamuyoowa. Ndayoowa kuti ambweni uleza kutuuma abana abamanyina babo boonse. 12--Pele webo wakaamba kuti, Ncobeni njookubamba kabotu akuvuzya lunyungu lwako lube mbuli musenga wakunkomwe yalwizi uutabaliki nkaambo kakuvula kwawo.

13-Elyo wakoona mpoonya awo masiku ayo, nkabela wakabweza zimwi zyambono nzyaakali azyo zibe cipo cakupa Esau munyina. 14Wakabweza impongo zili myanda yobile abagutu bali makumi obile, imbelele zili myanda yobile abasijembwe bali makumi obile, 15inkamele zinyonsya zili makumi otatwe abana bazyo, impwizi zili makumi one abacende bali ikumi, imbongolo impwizi zili makumi obile ambongolo incende zili ikumi, 16elyo ezi zyoonse wakazibika mumaanza aabalanda bakwe, itanga limwi alimwi alilike, nkabela wakaambila balanda bakwe kuti, Amuzulule kunembo lyangu, alimwi amutalamukane itanga limwi atanganyina. 17Nkabela wakalailila sitanga mutaanzi kuti, Akuswana Esau mukulana wangu, akubuzya kuti, Uli wani? Uya kuli? Azeezi nzojisi nzizyani? 18Uleelede kwaamba kuti, Nzyamulanda wako Jakobo. Ncipo catumwa kuli-Esau simalelaangu. Alakwe mwali musule. 19Awabili awatatu abasimatanga bakali musule, boonse buyo wakabalailila kuti, Mbuboobu mbumweelede kwaambila Esau, mwamujana. 20-Alimwi kamwaamba kuti, Alakwe Jakobo mulanda wako mwali musule. Nkaambo wakali kuyeeya kuti, Nkamutontozye acipo eci ncendatuma. Musule aceeci tuyoobonana kubusyu. Ambweni ulanditambula. 21Aboobo cipo cakatumwa kunembo, pele walo mwini wakoona masiku ayo mpoonya awo amalabba,

Jakobo mbwaakasinana a-Leza

22-Lino masiku ayo ngaonya wakanyampuka, wabweza banakazi bakwe bobile abalanda bakwe basimbi bobile abana bakwe bali ikumi aumwi, wazubuka kucito ca-Jaboki. 23Wakabatola, wabazubusya kalonga, azyalo zintu zyoonse nzyaakali azyo. 24-Elyo Jakobo wakasyaala alike, nkabela kwakeza muntu kuzoosinana awe masiku oonse mane kubucedo. 25-Nkabela naakabona kuti tamuzundi, wakaampa intelebelo yacibelo cakwe, aboobo intelebelo yacibelo ca-Jakobo yakakwiduka mukusinana kwabo. 26-Elyo wakati, Undileke njiinke, nkaambo bwaamba kuca. Pele wakavuwa kuti, Nsikookuleka pe, cita utaangune kundilongezya. 27Wakamubuzya kuti, Nduweni izina lyako? Wakati, Ndime Jakobo. 28-Wakati, Izina lyako talikooyooambwa limbi kuti nduwe Jakobo, pe, izina lyako liyooba Israyeli, nkaambo wazundana a-Leza abantu, alimwi wazunda. 29-Mpawo Jakobo wakamubuzya kuti, Wence undilwiide izina lyako. Wakati, Ino nkaambonzi wabuzya izina lyangu? Elyo wakamulongezya mpoonya awo. 30-Elyo Jakobo wakaulika oko kuntu izina lya-Penueli, nkaambo wakati, Ndabona Leza busyu kubusyu, nekubaboobo buumi bwangu mpobucili. 31Lino izuba lyakapasula naakazubuka ku-Penueli, nkabela wakali kuya busunkuta nkaambo kacibelo cakwe. 32Nciceeco bana ba-Israyeli ncibatalidi mulambi wakasolo uubambene antelebelo yacibelo mane kusikila sunu, nkaambo kakuti wakaampa intelebelo yacibelo ca-Jakobo kumulambi wakasolo.