Search form

Matalikilo 33

Jakobo mbwaakaswanaana a-Esau

1-Lino Jakobo wakatambya meso aakwe, wabona kuti Esau uleza abantu bali myanda yone. Abone obo, wakapambukanya bana a-Leya a-Rakele abalanda basimbi bobile. 2Nkabela balanda basimbi abana babo wakababika kunembo, musule lyabo wakabika Leya abana bakwe, musule lyabaabo wakabika Rakele a-Josefa. 3-Lino walo mwini wakainda kunembo, wakali kuya bukotama ansi ziindi zili musanu azibili mane wakasika kumukulana wakwe.

4-Pele Esau wakazuzaana kukumuswanganya, wamukumbata, wawida ansingo yakwe, wamumyonta. Nkabela balila. 5-Lino Esau naakatambya meso aakwe, wakabona banakazi abana, nkabela wakabuzya kuti, Ino mbobani aba mboli abo? Wakavuwa kuti, Mbaaba bana Leza siluzyalo mbaakapa mulanda wako. 6Mpawo balanda basimbi abana babo bakaswena afwaafwi, bakotama. 7Alakwe Leya wakaswena abana bakwe, bakotama. Kumanizya, bakaswena Josefa a-Rakele, bakotama. 8-Elyo Esau wakabuzya kuti, Nkokutyeni aya makamu makamu ngendakaswana? Wakavuwa kuti, Nkokujana buuya mumeso aamwami wangu. 9Esau wakuti, Ndijisi kale zinji, mwanike; kolibambila nzojisi. 10-Pele Jakobo wakati, Akaka! Na ndijene luzyalo mumeso aako, wence tambula cipo cizwa kumaanza aangu, nkaambo kubona busyu bwako kuli mbubonya mbuli kubona busyu bwa-Leza. Wanditambula kabotu. 11-Wence tambula cilumbyo cangu ncowaletelwa, nkaambo Leza wandifwida luzyalo, alimwi ndijisi zinji. Aboobo wakamukombelezya mane wakatambula.

12Mpawo Esau wakati, Atweende, ndakuzulwida. 13Pele wakamuvwiila kuti, Mwami wangu ulizi kuti bana mbaniini, alimwi ndijisi imbelele atjombe zinyonsya, Na bazibingisya buzuba bomwe, imbelele zyoonse zilafwa. 14-Mwami wangu aye kunembo lyamulanda wakwe, Mebo nooza bweenda kabotu kabotu, mbuli mbuzikonzya kweenda iŋombe, ambuli mbubakonzya kweenda bana, mane nkasike kumwami wangu ku-Seiri.

15-Lino Esau wakati, Nkusiile bamwi babantu mbondi abo, Pele wakati, Nkaambonzi? Nkajane buuya mumeso aasimalelaangu. 16Mpawo Esau wakanyampuka mubuzuba obo mbubonya kuti apiluke ku-Seiri. 17-Pele Jakobo wakaya ku-Sukoti, waakuliyakila iŋanda. Azyalo iŋombe zyakwe wakaziyakila zibaya. Nciceeco oku kuntu ncikuulikidwe izina lya-Sukoti.

18-Nkabela Jakobo wakasika kabotu kumunzi wa-Sekemu munyika yaKanana, naakazwa ku-Padanaramu. Wakayaka zilao zyakwe kunembo lyamunzi. 19-Nkabela cipanzi canyika mpaakayakide zilao zyakwe wakacuula kubana ba-Hamori wisi Sekemu. Wakaula amali aakesita aali mwanda. 20-Elyo wakayaka cipaililo mpoonya awo, wacuulika izina lyaElelohe-Israyeli.