Search form

Matalikilo 35

Jakobo mbwaakayaka cipaililo caku-Beteli

1-Lino Leza wakaambila Jakobo kuti, Nyampuka, uye ku-Beteli, ukale nkuko, uyake cipaililo ca-Leza oyo nguwenya iwakalibonya kulinduwe ciindi eciya nowakacija kubusyu bwa-Esau mukulana wako. 2-Mpawo Jakobo wakaambila luzubo lwakwe aboonse mbaakali abo kuti, Amusowe baleza beenzu bali akati kanu, alimwi amulisalazye akuvundununa zyakusama zyanu. 3-Atunyamuke, tuye ku-Beteli, nkayake cipaililo, cibe ca-Leza oyo iwakandivuwa mubuzuba bwamafwabi aangu, iwakandisindikila mukweenda kwangu koonse. 4-Mpawo bakapa Jakobo baleza beenzu boonse ibakali mumaanza aabo amacoco aamumatwi aabo, nkabela Jakobo wakazisisa kunsi lyamubanga waku-Sekemu.

5-Elyo mukweenda kwabo, buyoofu buzwa kuli-Leza bwakajata minzi iyakeengelede, aboobo teebakatobela bana ba-Jakobo. 6-Lino Jakobo wakasika ku-Luzi (ngonguwo Beteli) munyika ya-Kanana, walo abantu boonse mbaakali abo. 7-Nkabela wakayaka cipaililo mpoonya awo, waulika kuntu oko izina lya-El Beteli, nkaambo kakuti nkukonya oko Leza nkwaakamubonekela ciindi eco naakacija kubusyu bwamukulana wakwe. 8-Lino Debora muleli wa-Rebeka wakafwa, nkabela wakazikwa kunsi lyamubanga oko ku-Beteli, aboobo oyo musamu wakaulikwa izina lya-Aloni-Bakuti.

9-Lino Leza wakabonekela Jakobo alimwi naakamana kuzwa ku-Padanaramu, wamulongezya. 10-Nkabela Leza wakamwaambila kuti, Izina lyako nduwe Jakobo, pele tokooyooambwa limbi kuti nduwe Jakobo pe, izina lyako liyooba Israyeli. Mbuboobo mbwaakaulikwa izina lya-Israyeli. 11-Alimwi Leza wakamwaambila kuti, Ndime Leza Singuzuzyoonse, Zyalisya, ukavule; mulinduwe mulazwa musyobo ankamu yamisyobo, amucikungu cako muyoozwa bami. 12-Alimwi nyika eyo njindakapa Abrahamu a-Izaka, ndaipa nduwe, alwalo lunyungu lwako luciza njoolupa nyika eyo. 13-Mpawo Leza wakapiluka kujulu, wamusia nkukonya oko nkwaakaambaula awe. 14-Nkabela Jakobo wakaimika malende, nkokuti malende aamabwe, nkukonya oko nkwaakaambaula awe, Nkabela wakatila cipaizyo cakunywa alingawo, alimwi wakatila insazi yamafuta. 15Mbuboobo Jakobo mbwaakaulika oko kuntu Leza nkwaakaambaula awe izina lya-Beteli.

Rakele mbwaakafwa naakazyala Benjamini

16Elyo bakalonga kuzwa ku-Beteli, nkabela nekwakacisyeede kasinzo kusika ku-Efrata, Rakele wakatumbuka, pele wakapenga mukutumbuka kwakwe. 17-Lino naakacili kusunda mukutumbuka kwakwe, sikumutumbusya wakamwambila kuti, Utayoowi, nkaambo sunu ulazyala mwana mulombe aumwi. 18Nkabela muuya wakwe nowakaamba kumusia (nkaambo wakafwa) wakamuulika izina lya-Benoni, pele wisi wakamuulika izina lya-Benjamini. 19-Aboobo Rakele wakafwa, nkabela wakazikwa munzila yaku-Efrata (ngonguwo Betelehemu). 20-Lino Jakobo wakaimikizya malende atala lyakabanda kakwe. Ngengao malende aakabanda ka-Rakele mbwaacibede asunu.

Amwi makani aa-Jakobo abana bakwe, Izaka mbwaakafwa

21-Lino Israyeli wakalonga, waakuyaka cilao cakwe kunembo lyaŋanda indamfu ya-Ederi. 22-Nkabela Israyeli naakacikede mucisi eco, Rubeni wakalala a-Biliha simamambe wawisi, nkabela Israyeli wakamvwa makani.

Lino bana ba-Jakobo bakali ikumi ababili. 23-Bana ba-Leya mbaaba: Rubeni (mwana mutaanzi wa-Jakobo), a-Simeoni, a-Levi, a-Juda, a-Isakara a-Zebuloni. 24Bana ba-Rakele mbaaba: Josefa a-Benjamini. 25Abana ba-Biliha mulanda musimbi wa-Rakele mbaaba: Dani a-Nafitali. 26Abana ba-Zilipa mulanda musimbi wa-Leya mbaaba: Gadi a-Aseri, Mbaabo bana ba-Jakobo mbaakazyala ku-Padanaramu.

27-Mpawo Jakobo wakasika kuli-Izaka wisi ku-Mamre, ku-Kiriyati-ariba (ngonguwo Hebroni), Abrahamu a-Izaka nkubakali kukala-kala. 28Nkabela mazuba aabuumi bwa-Izaka akasika kumwanda amakumi aali musanu aatatu. 29-Elyo Izaka wakazanga, wafwa, wainka kulibasinsiku bakwe naakacembaala Bucembele buzwide, nkabela Esau a-Jakobo bana bakwe bakamuzika.