Search form

Matalikilo 37

Josefa mbwaakaba muzike mucisi ca-Egepita

1-Lino Jakobo kakede munyika yabweenzu bwabamawisi, nkokuti munyika ya-Kanana. 2-Ngaaya makani aamazyalani aa-Jakobo, Josefa naakajisi myaka iili ikumi amusani aibili, wakali kweembela imbelele abakulana bakwe, Kali mulombe antoomwe abana ba-Biliha abana baZilipa banakazi bawisi, nkabela Josefa wakaletela wisi makani aabo mabi. 3-Israyeli kayandisya Josefa kwiinda bana bakwe boonse nkaambo kali mwana wabucembele bwakwe, nkabela wakamucitila ijansi lili amaboko. 4-Pele bakulana bakwe, nebakabona kuti wisi ulamuyandisya kwiinda beenzinyina, bakamusula, kabataamba caluumuno kulinguwe.

5Lino Josefa wakalota ciloto, walwiida bakulana bakwe, nkabela bakaindilila kumusula. 6Wakabaambila kuti, Amuswiilile eci ciloto ncindalota. 7-Ndakabona kuti twakali kwaanga misunta yamaila mukati kamuunda, elyo musunta wangu wakabuka, waimikila, amisunta yanu yakuuzyunguluka, yaukotamina. 8Mpawo bakulana bakwe bakamwaambila kuti, Ma! Sa uyooba mwami wesu? Sa uyootweendelezya swebo? Nkabela bakaindilila loko kumusula nkaambo kaziloto zyakwe amajwi aakwe. 9-Mpoonya awo wakalota ciloto acimwi, walwiida bakulana bakwe, wati, Amuswiilile! Ndalota cilota acimwi. Ndalota kuti izuba amwezi anyenyeezi zili ikumi aimwi zyoonse zyandikotamina. 10-Wakalwiida wisi abakulana bakwe, nkabela wisi wakamutapatila, wati, Ma! Ncilotonzi eci ncowalota? Sa ncobeni tuzoosika, mebo abanyoko abakulana bako, kukukotama ansi kunembo lyako? 11-Lino bakulana bakwe bakali kumufwida ibbivwe, pele wisi wakajata majwi mumoyo wakwe.

12Lino baku la na bakwe bakainka kuyooembela imbelele zyawisaabo ku-Sekemu. 13Nkabela Israyeli wakaambila Josefa kuti, Bona! Sa bakulana bako tabali mukweembela ku-Sekemu? Koza, nkutume kulimbabo. Wakavuwa kuti, Ndaya. 14-Wakamwaambila kuti, Mbubo, koya, ukabone bakulana bako na bali kabotu, azyalo imbelele na zili kabotu, uzoondaambile makani, Aboobo wakamutuma kuzwa kukuti lya-Hebroni, nkabela wakasika ku-Sekemu. 15Lino umwi muntu wakamujana ulaingaila musokwe, nkabela oyo muntu wakamubuzya kuti, Uyandaulanzi? 16-Wakavuwa kuti, Ndayandaula bakulana bangu, Wence undaambile na baleembelelai? 17-Wakati, Bazwa okuno, nkaambo ndakamvwa majwi aabo aakuti, Katuya ku-Dotani. Amvwe obo Josefa wakatobela bakulana bakwe, wabajana ku-Dotani. 18-Pele naakacili kule, bakamubona, nkabela naatakaina kusika, bakamuvwiya kuti bamujaye. 19Bakaambilana umwi aumwi kumweenzinyina kuti, Ngooyo siziloto wasika. 20-Atweende, tumujaye, tumuwaale muli limwi lyamalindi, lino tulaamba kuti, Cinyama cibi camujaya. Tulabona na ziloto zyakwe zilaba buti. 21-Pele Rubeni naakamvwa, wakamuvuna mumaanza aabo, wati, Tutamujayi pe. 22Rubeni wakabaambila kuti, Mutatili bulowa pe; amumutumpukisye omo mudindi elyo lyamubbuwa, pele mutamubikili maanza aanu, Wakaamba obo kuti amuvune kumaanza aabo akumupilusya kuliwisi. 23Elyo Josefa naakasika kufwaafwi kubakulana bakwe, bakamusamununa ijansi lyakwe, ijansi idamfu lili amaboko ndyaakasamide, 24elyo bakamujata, bamutumpukizya mudindi. Idindi lyakali maya, kamutakwe maanzi mulindilyo.

25-Lino bakakala kulya insima, nkabela nibakatambya meso aabo bakabona inkamu yabasinyenda ba-Ismayeli balazwa ku-Gileadi, bali ankamele zyabo ziyumwide zilisyo amisamu atununkilizyo, balaya kuzisambala ku-Egepita. 26-Mpawo Juda wakaambila beenzinyina kuti, Cilatugwasyanzi na twajaya mwanike wesu akuvumba bulowa bwakwe? 27-Atweende, tumusambale kuba-Ismayeli, pele tutamutambiki maanza esu, nkaambo ngumwanike wesu, ninyama yesu, Nkabela beenzinyina bakamuswiilila. 28-Elyo basambazi ba-Midyani nibakainda, bakagwisya Josefa kuzwa mudindi, bamuulisya kuba-Ismayeli mali aansiliva aali makumi obile, aboobo bakasisya Josefa ku-Egepita.

29-Mpawo Rubeni naakaboola kudindi akujana kuti Josefa tacimo, wakadeluula zyakusama zyakwe, 30-wapiluka kubeenzinyina, wati, Mwana taciwo. Lino mebo, njiinke kuli? 31Elyo bakabweza ijansi lya-Josefa, bajaya mujembwe wampongo, bajovweka ijansi mubulowa. 32-Nkabela bakatuma ijansi lili amaboko kuliwisaabo, bati, Twajana eci. Langa, ubone na ndendilyo ijansi lyamwanaako na pe. 33-Mpoonya awo wakaliziba, wati, Ndejansi lyamwanaangu. Cinyama cibi camulya. Ncobeni Josefa wadeIuulwa. 34-Lino Jakobo wakadeluula zyakusama zyakwe, wasama zisani zyamasaka mucikungu cakwe, walila mwanaakwe mazuba manji. 35-Nkabela bana bakwe balombe abana bakwe basimbi boonse bakabuka kuti bamuumbulizye, pele wakakaka kuumbulizigwa. Wakati, Ncobeni njooselukila mukabanda mwaabede mwanaangu cakulila. Mbuboobo wisi mbwaakamulila. 36-Pele ba-Midyani bakamuulisya mu-Egepita, Bakamuulisya kuli-Potifara, umwi wabasilutwe wa-Farao, sikulanga wabasikutabilila.