Search form

Matalikilo 40

Josefa mbwaakapandulwida balanda ba-Farao ziloto

1-Kabe kaindi, sikukutaukila mwami wa-Egepita amujiki wakwe bakabisizya simalelaabo mwami wa-Egepita. 2-Mpawo Farao wakakalalila abo balanda bakwe bobile, simutwe wabakutausi asimutwe wabajisi, 3-wabaanga muŋanda yamulangi wabatabilizi, muntolongo Josefa mwaakaangilidwe­. 4Lino mulangi wabatabilizi wakababika mumaanza aa-Josefa, kuti abakutaukile, nkabela bakakala mazuba manji muntolongo. 5Elyo oyo sikukutaukila mwami wa-Egepita amujisi wakwe bakaleta ziloto. Boonse bobile bakalota, umwi aumwi ciloto cakwe, mubusiku bomwe. Ciloto cimwi acimwi kacijisi kupandulula kwaco. 6Nkabela nebwakaca Josefa wakeza kulimbabo, wajana kuti baluusene. 7Lino wakabuzya abo basilutwe ba-Farao mbaakali abo balaangidwe muŋanda yasimalelaakwe kuti, Nkaambonzi masyu aanu abija sunu? 8-Bakamuvwiila kuti, Twalota ziloto, alimwi taakwe uukonzya kuzipandulula. Josefa wakabaambila kuti, Sa teensi Leza uukonzya kupandulula! Amundilwiide.

9Mpoonya awo silutwe wabakutausi wakalwiida Josefa ciloto cakwe. Wakati, Muciloto cangu ndakabona musaansa kunembo lyangu. 10Mumusaansa kamuli mitabi yotatwe, Usyuuke biyo, wafulula malubaluba, elyo masankinya aamasaansa akabizwa ndilyonya. 11Alimwi inkomeki ya-Farao yakali mujanza lyangu, nkabela ndakacela masaansa, ndakasinina munkomeki ya-Farao, ndapa mujanza lya-Farao. 12-Lino Josefa wakamwaambila kuti, Mbuboobo mbocipandululwa. Mitabi yotatwe nkokuti mazuba otatwe. 13-Amana mazuba otatwe Farao uyoobusya mutwe wako akukuboozya kumilimo yako, nkabela uyoopa inkomeki mujanza lyakwe mbubonya mbowakali kucita lyoonse nowakacili mukutausi wakwe. 14-Pele kwabota kulinguwe, wence kondiyeeya mebo akundifwida luzyalo, ukaambe makani aangu mumatwi aa-Farao akundigwisya omuno muŋanda. 15-Nkaambo ncobeni ndakabbigwa munyika yaba-Hebrayo, alimwi okuno taakwe ncendakabisya kuti bandi bike muntolongo.

16Elyo simutwe wabajisi, naakabona kuti ciloto cakapandululwa kabotu, wakaambila Josefa kuti, Ambebo ndalota, Muciloto cangu ndakali azisewe zyotatwe zyazibunge amutwe wangu. 17Mucisewe caatala kamuli zilyo zyamisyobo misyobo nzyajika mujisi, zyajikilwa Farao. Nkabela bayuni bakali kuzilida, mucisewe cakali atala amutwe wangu. 18Mpawo Josefa wakavuwa, wati, Mbuboobu mbucipandululwa. Zisewe zyotatwe nkukuti mazuba otatwe. 19Amana mazuba otatwe, Farao uyookosola mutwe wako akukwaanzika amusamu, elyo bayuni bayoolya nyama yamubili wako,

20-Lino buzuba bwatatu nibwakaca, bwakali buzuba bwakuzyalwa kwa-­Farao, nkabela wakacitila balanda bakwe boonse ipobwe. Mpawo wakabusya mutwe wamukutausi mupati amujisi mupati akati kabalanda bakwe. 21-Mukutausi mupati wakamuboozya mubukutausi bwakwe, aboobo wakapa inkomeki mujanza lya-Farao. 22-Pele mujisi mupati wakamwaanzika, mbubonya mbuli Josefa mbwaakapandulula. 23-Nekubaboobo mukutausi mupati takwakayeeya Josefa pe, wakamuluba buyo.